Impaka zitangiye kuba urudaca ku ijyanwa ry’abanyamakuru mu Itorero ry’Igihugu

Yanditswe na

Mihigo Jean Baptiste

Kuya 7 Ukwakira 2015 saa 06:31
Yasuwe :
0 0

Ubuyobozi bw’Itorero ry’Igihugu buvuga ko abanyamakuru batazitabira itorero riri gutegurwa aho bazigishwa indangagaciro na kirazira bazaba ari ibigwari mu gihe bamwe muri bo batarikozwa kuko ngo ‘n’abarijyamo barenga bagakora amakosa adahesha isura nziza igihugu.’

Umuyobozi w’Itorero ry’Igihugu Boniface Rucagu yavuze ko hari gutegurwa uburyo abanyamakuru bajyanwa mu itorero bakigishwa indangagaciro nyarwanda, ndetse ko nyuma yo gukora ubukangurambaga, umunyamakuru uzumva ko ataryitabira ‘azaba ari ikigwari’.

Rucagu yabwiye IGIHE ko bari kunoza inyigo y’uburyo abanyamakuru bakorera ibitangazamakuru byo mu Rwanda bazajyanwa mu itorero mu gihe cya vuba.

Yagize ati “ Baramutse bavuze ngo ntibabishaka… iyo bagenzi bawe bakwise ikigwari, imbaga yose ikamenya ko wiswe ikigwari, wanze kujya mu gitaramo cy’abandi bana b’u Rwanda bagamije kucyubaka, nawe aho ukandagiye ntibifata, urakandagira bikajya guhirima, ugira ipfunwe mu bantu bose. Tuzabareka rero bagenzi babo bazabita ibigwari, Abanyarwanda bazabita ibigwari.”

Rucagu yavuze ko bashaka ko abanyamakuru barijyamo kubera ko bafite ijambo mu muryango nyarwanda. Yongeyeho ko nabo ari abatoza, mu gihe bavugiye ijambo mu gitangazamakuru runaka rishobora kuyobya cyangwa kuyobora imbaga.
Akomeza avuga ko itangazamakuru rigomba gukorwa rihereye ku ndangagaciro.

Dr Kayumba Christophe, umwarimu mu ishuri ry’itangazamakuru muri Kaminuza y’u Rwanda akaba n’inzobere muri uyu mwuga yabwiye IGIHE ko abanyamakuru nibajyayo bizaba ari byiza kuko bashora kuhavana ubundi bumenyi.

Ariko agaragaza amakenga y’uko mu itorero baramutse babigishije uko itangazamakuru rikorwa bitaba ari byo kubera ko atari byo bashinzwe.

Yagize ati: “Byaba ari byiza ariko niba ari ibintu bijyanye no kwigisha abanyamakuru ukuntu bakora itangazamakuru, ntago ari byo kubera ko abigisha ibijyanye n’itangazamakuru ari amashuri abishinzwe.”

Tariki ya 5 Ukwakira 2015, nibwo Ishyirahamwe ry’Abanyamakuru bo mu Rwanda n’Inama Nkuru y’Itangazamakuru basohoye itangazo rishishikariza abanyamakuru gutangira kwiyandikisha kugira ngo bamenye abazitabira iri torero. Gusa kugeza ubu, itariki iri torero rizatangiriraho ntiramenyekana.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .