Imiterere y’igitero cy’i Nyaruguru: Abaturage hari abo bamenye mu bakigabye

Yanditswe na Prudence Kwizera
Kuya 27 Kamena 2020 saa 05:36
Yasuwe :
0 0

Ahagana saa Sita z’ijoro ryo kuri uyu wa Gatandatu tariki ya 27 Kamena 2020 nibwo abagizi ba nabi baturutse mu Burundi, bateye ibirindiro by’Ingabo z’u Rwanda biherereye mu Murenge wa Ruheru mu Karere ka Nyaruguru.

Ibirindiro by’ingabo z’u Rwanda byatewe biherereye mu Mudugudu wa Uwimbogo mu Kagari ka Uwumusebeya. Ni ibirindiro biri nko kuri kilometero imwe hafi y’umupaka w’u Rwanda n’u Burundi.

Ku ruhande rw’u Burundi naho hari ikigo cya Gisirikari ahitwa Gihisi; nko kuri kilometero imwe hakurya uvuye ku mupaka w’u Rwanda.

Mu gitondo cyo kuri uyu wa Gatandatu, Umunyamakuru wa IGIHE yageze aho imirwano yabereye; hari imirambo ine ya bamwe mu bagizi ba nabi bateye; batatu muri bo barasiwe nko muri metero 10 hepfo gato y’ibirindiro by’ingabo z’u Rwanda, bigaragara ko barwanaga bashaka kubyinjiramo naho undi umwe yasanzwe mu rugo ruri hepfo nko muri metero 50 bigaragara ko bagenzi be bamwirukankanye bakamuta mu nzira.

Aho abo bagizi ba nabi batatu barasiwe bigaragara ko habereye isibaniro kuko bavuyanze ingano zihahinze bahahindura imbuga; hagaragara ibisigazwa by’amasasu byinshi na zimwe mu ntwaro bahataye zirimo imbunda, gerenade n’amasasu. Hagaragara kandi bimwe mu bikoresho bari bitwaje birimo imihoro, inzoga ziri mu ducupa duto, amandanzi, isukari na Saradine zanditseho ko zagenewe Abasirikari b’u Burundi.

Abarashwe bari bambaye inkweto za bote, imyenda itandukanye ya gisivile barengejeho amakoti ya gisirikari.

Bigaragara ko baje barwana bashaka kwinjira mu birindiro by’ingabo z’u Rwanda zirabarasa bakwira imishwaro, batatu muri bo bafatwa mpiri.

Umwe mu basirikare b’u Rwanda wari ahagabwe igitero yasobanuye ko abo bagizi ba nabi baturutse mu Burundi banyuze mu kabande kari ku mupaka uhuza u Rwanda n’u Burundi, bageze hafi y’ibirindiro by’Ingabo z’u Rwanda bicamo ibice bibiri.

Igice kimwe cyashatse kwinjira mu birindiro by’ingabo z‘u Rwanda ikindi gishaka kwinjira mu Mudugudu w’icyitegererezo wa Yanza (IDP Model Village Yanza) watujwemo abaturage, ariko basanga ingabo z’u Rwanda ziri maso zirabarasaba bakwira imishwaro.

Mu byangiritse bigaragara aho harimo ingano zihinze mu murima w’umuturage witwa Nzibirinda Viateur, n’inzu ye bateyeho igisasu ku gisenge no ku gikuta. Iyo nzu iri hafi y’ibirindiro by’ingabo z’u Rwanda.

Nzabirinda Viateur yavuze ko imirwano igitangira yari mu nzu ari kumwe n’abana be batanu baryamye, yumvise amasasu menshi ahita abasaba kuryama hasi mu nzu, ababuza gusohoka hanze.

Yagize ati “Hari nka Saa sita z’ijoro numva batangiye kurasa noneho umwana wanjye muto arashiguka, mpita mbwira abana bose ngo baryame hasi ntihagire usohoka. Barasanye igihe kirekire noneho numva bateye igisasu hano ku gisenge cy’inzu nshururizamo ubuconco. Mu gitondo nasanze ikindi gisasu bagiteye hano ku gikuta cy’inzu.”

Abaturage bamenye bamwe mu bateye

Bamwe mu baturage bo mu Mudugudu wa Uwimbogo bavuga ko mu bagizi ba nabi bane barashwe bamenyemo babiri kuko hari abazaga kuhakora akazi k’ubukarani mu bihe byashize.

Akimana Perusi ati “Hari babiri namenyemo muri bariya barashwe kuko bazaga kugura ibirayi hano Abarundi bakiza hano mu Rwanda, bakajya baza rero ari abakarani b’abo Barundi baje kurangura ibirayi. Ubwo rero uwo nabashije kumenyamo ni Sarihungu wo ku Gihisi n’uwitwa Desire na we wo ku Gihisi baturanye.”

Nzabirinda Viateur na we avuga ko mu bagizi ba nabi barashwe yamenyemo babiri ndetse harimo n’uwashatse umugore mu Rwanda.

Ati “Bamwe twabamenye batuye hano hakurya, uwaguye hepfo atuye hakurya aha i Burundi, buriya twari duturanye yashatse n’umukobwa wa hano haruguru ku mugabo witwa Hakiza.”

Abaturage bo mu Mudugudu wa Uwimbogo baganiriye na IGIHE bavuze ko igitero cyagabwe cyabateye ubwoba ku buryo ijoro ryose batasinziriye ariko mu gitondo ingabo z’u Rwanda hamwe n’ubuyobozi bw’Akarere ka Nyaruguru baje kubahumuriza.

Akimana ati “Twaraye imitima ihagaze tudasinziriye ariko mu gitondo abasirikare bacu n’abayobozi baje kuduhumuriza kandi ikindi twishimira ni uko nta muturage bishe cyangwa ngo bamukomeretse.”

Abaturage bahumurijwe bizezwa umutekano usesuye

Umuyobozi w’Akarere ka Nyaruguru, Habitegeko François, yavuze ko Ingabo z’u Rwanda zamenye amakuru ko hari abagizi ba nabi bafite imigambi mibi yo gutera Umudugudu w’icyitegererezo wa Yanza no kwica abaturage bawutuyemo, ziyemeza kubarinda.

Ati “Nyuma y’uko ingabo zacu zimenye amakuru ko hari abagizi ba nabi bifuza gutera Umudugudu ntangarugero wa Yanza bakica abaturage, zaje kuwurinda. Iri joro haje abagizi ba nabi baje kwica abaturage basanga ingabo zacu ziri maso.”

Yasobanuye ko baje bicamo ibice bibiri harimo abaje bashaka kwinjira mu Mudugudu w’icyitegererezo ngo batangire kwica abaturage no kubasahura, n’abandi baje basa n’abayobya uburari bagana ku birindiro by’ingabo z’u Rwanda.

Ati “Ariko hose basanze Ingabo z’u Rwanda zihari zirabarasa zicamo bane ndetse zafashemo batatu”.

Habitegeko yahumurije abaturage avuga ko umutekano wabo urinzwe, abasaba ubufatanye n’inzego z’umutekano batanga amakuru igihe babonye umuntu batazi kandi bakitabira kurara amarondo.

Aba bagizi ba nabi bari bafite umugambi wo kwica abaturage batuye muri uyu mudugudu w'icyitegererezo wa Yanza
Umudugudu wa Yanza uturanye na Pariki ya Nyungwe mu Murenge wa Ruheru
Abagizi ba nabi bane bishwe abandi batatu bafatwa mpiri
Aho abasirikare barasaniye hasigaye ibimenyetso by'amasasu
Abagabye igitero birutse basiga inyuma imirambo ine ya bagenzi babo
Ingabo z’u Rwanda (RDF) zemeje ko abantu bagera ku 100 bitwaje intwaro zirimo n’inini baturutse mu Burundi, bateye ku birindiro byazo mu Murenge wa Ruheru mu Karere ka Nyaruguru, zibicamo benshi zinabatesha ibikoresho birimo intwaro, mu gihe abasirikare batatu bakomeretse byoroheje. RDF yafashe bimwe mu bikoresho by'abagabye igitero
Urugo rw'umuturage umwe rwateweho igisasu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .