Imishinga minini y’imihanda yitezweho guhindura ubwikorezi n’ubuhahirane mu gihugu

Yanditswe na Rabbi Malo Umucunguzi
Kuya 4 Ugushyingo 2020 saa 05:21
Yasuwe :
0 0

Guverinoma y’u Rwanda ikomeje imishinga myinshi y’ubwubatsi bw’imihanda, yitezweho kunoza uburyo abantu bahahirana, ndetse urujya n’uruza rw’ibinyabiziga rukarushaho kwihuta.

Byonyine nko mu mwaka wa 2019/2020, hubatswe hanasanwa imihanda itanu ya kaburimbo ifite uburebure bwa 313.5 km, hagamijwe guteza imbere urwego rw’ubwikorezi.

Umuyobozi Mukuru wungirije w’ Ikigo cy’Igihugu gishinzwe Iterambere ry’Ubwikorezi (RTDA) Baganizi Patrick Emile, yabwiye IGIHE ko kugeza ubu ibilometero amagana birimo kubakwa, ndetse imihanda imwe yamaze kuzura ku buryo mu minsi mike izashyikirizwa guverinoma.

Irimo uva Kagitumba-Kayonza-Rusumo, ubu harimo kurangizwa imirimo ya nyuma. Ugizwe n’igice cya Kagitumba –Gabiro (60km), Gabiro-Kayonza (56km) na Kayonza-Rusumo (92km). Mu yamaze kuzura harimo n’uwa Base-Rukomo (51km) na Kitabi-Huye (53km).

Baganizi yagize ati “Muri gahunda ya NST1 twateganyaga kubaka ibilometero 800 by’imihanda ya kaburimbo, turebye aho tugeze ubu turi nko kuri hafi 75%, ariko urebye imihanda dukeneye ya kaburimbo tugendeye ku bipimo mpuzamahanga n’akamaro imihanda idufitiye, turacyari hasi kuko imihanda ya kaburimbo ubu irenze ibilometero 2000, kandi dufite imihanda irenze ibikometero 38000.”

Ni imihanda ikomeje kwiyongera, mu gihe mbere ya Jenoside yakorewe Abatutsi mu 1994, mu Rwanda hari ibilometero by’imihanda ya kaburimbo bitarenga 1000.

Imihanda igikorwa

Uretse imihanda imaze kuzura, hari imihanda irimo gukorwa, harimo izarangira muri uyu mwaka w’ingengo y’imari n’izageza mu mwaka utaha.

Harimo umuhanda Ngoma-Nyanza ugizwe n’ibice bibiri, birimo icya Ngoma-Ramiro (53km) n’igihuza Kibugabuga mu Bugesera na Nyanza (66km).

Baganizi yakomeje ati “Igice cya Ngoma-Ramiro turimo gutanga isoko ry’uzagikora, ariko icya Kibugabuga kugera i Nyanza cyo ubu umushinga ugeze hafi kuri 35%. Ni umushinga dushaka ko uzadufasha, urabona imodoka ziva i Rusumo zazaga zikagera i Kigali zigakomeza za Huye cyangwa mu bindi bice, zizajya zica ahongaho maze zikomeze zihingukire i Nyanza zitaje guca mu Mujyi wa Kigali.”

“Undi mushinga dufite munini ni umuhanda uva Nyagatare ukagera mu Rukomo (73km), uzaza ugahura n’uva mu Rukomo ukagera kuri Base. Nawo uzafasha ko imodoka ziva Kagitumba, aho kugira ngo zize i Kigali zigiye mu Burengerazuba, zice mu Rukomo, zigakomeza kuri Base, zikaba zakomeza za Rubavu.”

Umuhanda Nyagatare-Rukomo ugeze kuri 60% wubakwa. Undi muhanda munini ni Huye-Kibeho-Munini-Ngoma (66km), uyu munsi imirimo yo kuwubaka igeze hafi kuri 60%.

Hari n’umuhanda Pindura-Bweyeye (32km) urimo gushyirwamo kaburimbo, ubu imirimo iri hagati ya 5-10%, n’undi wenda gutangira kubakwa mu Burasirazuba wa Kibaya-Rukira-Nasho (35km).

Harimo n’umuhanda uzwi nka Kivu Belt ku gice cya Gisiza-Rubavu (20km) - imirimo yararangiye harimo gukorwa iy’inyongera - hakaba n’igice cya Karongi-Muhanga, ubu umuhanda urimo gukorwa ku gice cya Rubengera-Rambura n’uduhanda dushamikiyeho (20km).

Hari n’umuhanda Base-Butaro-Kidaho (63km), wo harimo gukorwa ibishoboka kugira ngo utangire kubakwa, mu mwaka utaha. Haza n’umuhanda Ngororero-Nyakinama-Musanze-Cyanika (62km) na Nyanza-Karongi (84km).

Ni imihanda yitezweho guhindura imiterere y’ubwikorezi ndetse ikavana abaturage mu bwigunge, bakabasha kugeza umusaruro wabo ku masoko.

Umuyobozi w’Akarere ka Nyaruguru, Habitegeko François, yabwiye IGIHE ko umuhanda Huye-Kibeho-Munini waje bawukeneye, bikaba umwihariko kuko ari uwo bemerewe na Perezida Kagame.

Ni umuhanda ufite ishami rijya ku Minini ku bitaro, ukagira n’irindi shami rigenda rikagera ku muhanda ujya ku mupaka w’Akanyaru.

Yakomeje ati "Icya mbere uzafasha mu guteza imbere hano muri Nyaruguru ni ibijyanye n’ishoramari, cyane cyane abakeneye gushora imari mu bijyanye n’ubukerarugendo nyobokamana (i Kibeho), harimo amahoteli n’ibindi.”

“Ariko n’abaturage bari bakeneye umuhanda mwiza kuko hari imihanda itari myiza, y’ibitaka, mu zuba ugasanga ivumbi ni ryinshi cyane, mu gihe cy’imvura nabyo bikabagora cyane kubera ubunyereri. Ariko igikomeye cyane ni ubuhahirane, kugeza ibyo bahinga ku isoko, harimo icyayi, harimo n’ibindi bihingwa bihingwa hano mu karere ka Nyaruguru.”

Meya Habitegeko yavuze ko uyu muhanda umaze no gutanga akazi ku baturage benshi cyane mu Karere.

Yakomeje ati “Kuva ku munsi wa mbere umuhanda utangira, batangiranye n’abakozi bahemba, abacuruza amabuye, abacuruza imicanga, ku buryo inyungu zitangira ku munsi wa mbere zigakomeza na nyuma umuhanda umaze kuboneka.”

Imihanda igiye kuvugururwa mu turere dutandatu

Baganizi yavuze ko hari n’imihanda ingana na kilometero 450 z’imihanda yari isanzwe, izubakwa neza mu Turere twa Nyabihu (90km), Gakenke (58km), Nyaruguru (68km), Nyagatare (78km), Gatsibo (79km) na Rutsiro (77km).

Ati “Imirimo nibwo igitangira ariko ntabwo iragera kure, ubu ugereranyije usanga tugeze hagati ya 10-15%. Ni icyiciro cya kabiri cy’iyi mirimo kuko hari iyindi twari twarakoze. Ni imihanda idufasha kugira ngo umusaruro ubashe kugera ku isoko.”

Harimo kilometero 253 km zizashyirwamo kaburimbo yoroheje (cheap-seal surfacing), na kilometero 197 zizatsindagirwa neza.

RTDA ivuga ko yiyemeje gushyira imbaraga mu gukurikirana kugira ngo imihanda yubakwe neza, hakanagenzurwa uburyo ibyemeranyijweho mu nyigo y’umuhanda ari nabyo bishyirwa mu bikorwa.

Imihanda ikomeje kubakwa ku bwinshi
Ubwo umuhanda Base-Gicumbi wari ugitunganywa, hakoreshejwe imbaraga nyinshi ngo wuzure vuba
Muri Mata ni aha umuhanda Huye-Kibeho-Munini-Ngoma wari ugeze
Uretse mu Ntara, no mu Mujyi wa Kigali imihanda ikomeje kubakwa. Igice cy'umuhanda Nyabisindu - Nyarutarama cyamaze kurangira
Umuhanda uca munsi y'iyahoze ari Alpha Palace Hotel ukagera Kabeza usigaye wifashishwa cyane n'abantu, batiriwe banyura mu masangano y'imihanda mu Giporoso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .