Imiryango nterankunga yasabwe gukumira ingaruka z’ihindagurika ry’ibihe aho gufasha gusa abo zagezeho

Yanditswe na Iradukunda Serge
Kuya 26 Gashyantare 2020 saa 01:36
Yasuwe :
0 0

Umuryango mpuzamahanga ukora ibikorwa by’isuku n’isukura, WaterAid, wasabye abaterankunga, guverinoma z’ibihugu na sosiyete sivile gushyira imbaraga mu bikorwa bigamije gukumira ingaruka z’imihindagurikire y’ibihe, kuruta uko bazishyira mu gufasha by’igihe gito abagezweho n’ingaruka.

Byagarutsweho mu nama y’iminsi itatu ubuyobozi bwa WaterAid mu karere ka Afurika y’Iburasirazuba, buri kugirana n’imiryango nterankunga itandukanye.

Umuyobozi wa WaterAid mu karere ka Afurika y’Iburasirazuba, Olutayo Bankole-Bolawole, yavuze ko Afurika ikigowe no kumenya uburyo yakwitwara mu bihe by’imvura nyinshi n’izuba ryinshi.

Ati “Muri Kenya nk’aho nabaye usanga mu mwaka umwe hari imyuzure itwara ibihingwa, abantu bakicwa n’inzara ubundi ugasanga nyuma y’imyaka ibiri hari izuba ritera amapfa menshi kubera ko ibihingwa byarumbye, gushyira ku munzani iyo mvura nyinshi n’izuba ryinshi ni ikintu tutaragerageza gukoraho bihagije, yaba guverinoma cyangwa imiryango itari iya leta.”

“Igisubizo kuri ibi ni ukureba uburyo twamenya umwaka uzarangwamo izuba ryinshi, ni iki dukeneye gukora mu kwitegura kugira ngo abantu batazagerwaho n’ingaruka.”

Yavuze ko imiryango nterankunga na za guverinoma z’ibihugu bitandukanye, bikwiye gushyira amafaranga mu bikorwa byo gukumira izi ngaruka ziterwa n’ibihe kuruta uko bafasha igihe ingaruka zamaze kuba

Ati “Mbona dukora byinshi mu gihe cy’amage, kuko muri iki gihe haje ibiza, imiryango n’ibigega bishinzwe ubugiraneza bishyiramo amafaranga menshi kugira ngo abantu bamere neza muri icyo gihe, ubundi bakigendera. Kuri njye ibyo ntabwo birambye.”

WaterAid ivuga ko aya mafaranga aza gufasha mu bikorwa by’ubutabazi yagakwiye gukoreshwa mu kwirinda ko izi ngaruka, no gufasha abantu kwitegura guhangana na zo.

Umwe mu batanze ikiganiro Prof. Chukwumerije Okereke, yavuze ko Afurika ikwiye gutangira gushyiraho ingamba zihamye mu guhangana n’ingaruka ziterwa n’ihindagurika ry’ibihe.

Ati “Afurika ikeneye kugira ingamba zisobanutse, gushaka amafaranga ndetse no gushyira mu bikorwa izo ngamba. Izo ngamba zishobora gutandukana bitewe n’igihugu, zirimo kongera gutera amashyamba, gukoresha ingufu zisubira, ishoramari mu bikorwa bitanga amazi meza n’ubwiteganyirize mu bijyanye n’ihinduka ry’ibihe.”

Muri iyi nama u Burundi, Somalia na Tchad byagaragajwe nk’ibishobora kuzibasirwa n’ingaruka zihinduka ry’ibihe zirimo imyuzure, amapfa, kuzamuka kw’igipimo cy’inyanja, kwiyongera kwa malaria, kudindira k’ubukerarugendo n’umubare muto w’abantu bagerwaho n’amazi meza.

Abitabiriye iyi nama batanze ibitekerezo ku cyakorwa mu gukumira ubukana bw'ingaruka z'imihindagurikire y'ibihe
Muri iyi nama umugabane wa Afurika wagaragajwe nk'uzagerwaho n'ingaruka nyinshi z'ihinduka ry'ibihe
Ni inama izigirwamo uburyo ibihungu byakumira ingaruka z'ihinduka ry'ibihe
Ni inama yitabiriwe n'abayobozi b'imiryango itandukanye
Olutayo Bankole-Bolawole yasabye abaterankunga gufasha mu gukumira ingaruka z'ihinduka ry'ibihe
Prof Chukwumerije Okereke yavuze ko Afurika ikwiye gushyiraho ingamba zihamye mu guhangana n’ingaruka ziterwa n’ihinduka ry’ibihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .