00:00:00 IGIHE NETWORK KN KINYARWANDA EN ENGLISH FR FRANCAIS

Imirimo yo kongerera ubushobozi Ibitaro bya Kabgayi igeze kure

Yanditswe na IGIHE
Kuya 27 Ukuboza 2022 saa 11:16
Yasuwe :

Ibikorwa byo gutunganya inyubako nshya z’Ibitaro bya Kabgayi mu Karere ka Muhanga igeze kure, ikazasiga bihawe ubushobozi bwo kwakira abantu benshi cyane cyane ababyeyi, bigatangira no gutanga serivisi nshya zitandukanye.

Umuyobozi Mukuru w’Ibitaro bya Kabgayi Dr Jean Baptiste Muvunyi, avuga ko inyubako ibi bitaro bisanganywe zari zishaje kandi zitatanye.

Yagize ati "Kuba inyubako zishaje, ugasanga hamwe na hamwe no kujya kuzisana kwa buri gihe, ugasanga ni ibintu bitoroshye binatwara amafaranga menshi, ndetse inshuro nyinshi icyakozwe ukabona ntikigaragarira amaso y’abantu."

"Inyubako ishaje iravuna, ikindi aho umuntu asabira serivisi abona hatamunogeye, nabyo biri mu byo abakiliya usanga binubira, tutirengagije nanone ko twakira abantu benshi baturuka ahantu hatandukanye." Yaganiraga n’Ikigo gishinzwe imyubakire, RHA.

Yavuze ko nubwo ari ibitaro by’Akarere ka Muhanga, kubera ko biri ku muhanda nyabagendwa, byakira n’abaturutse mu Turere twa Kamonyi na Ruhango, "bikaba byakongera ubucucike."

Dr Muvunyi yavuze ko inyubako nshya irimo kubakwa igizwe ahanini n’inzu y’ababyeyi, baba abaje kubyara cyangwa abakeneye izindi serivisi zirebana n’abagore.

Yakomeje ati "Ikazaba irimo ibitanda bigera hafi ku 190, hazaba harimo kandi serivisi yita ku mpinja iyo zivutse (néonatologie) kandi zikazaba ziri ku rwego rwisumbuyeho, aho hazaha harimo nk’impinja zirembye zikagira aho zifashirizwa, hanyuma kandi tukazagira na serivisi zita ku ndembe z’abakuze (intensive care unit)."

"Hazaba harimo kandi amaseta ageze kuri ane na yo azadufasha, ubundi mu nzu y’ababyeyi twari dufitemo amaseta abiri, na yo ukabona arakoreshwa kenshi buri gihe, bikagorana mu gihe habonetse nk’abantu bakeneye kubagwa barenze babiri icyarimwe."

Ibi bitaro byari bisanganywe ibitanda 98.

Dr Muvunyi yavuze ko iyi nyubako izaba irimo n’uburukukiro bwiyongera ku byumba bine gusa bari bafite, hakaba na serivizi zo gucisha mu cyuma (radiographie), kuko hazaba harimo na ’scanner’.

Yakomeje ati "Ibyo bizaba birimo ibyo twari dusanganywe, hiyongeremo scanner ndetse n’icyuma kireba cyane amabere (mammographie). Ikindi mu rwego rwo kongera isuku ndetse no gusukura ibikoresho bikoreshwa kwa muganga, igikoresho twari dufite nacyo nticyari gihagije, hariya rero kizaba kirimo."

Yavuze ko nyuma y’uko ibi bitaro byashyizwe ku rwego rwa Kaminuza, hazaba harimo ahantu hashobora gukorerwa imyitozo yo kwiga ibintu bimwe na bimwe (simulation center).

Dr Muvunyi yakomeje ati "Cyane cyane ibigendanye no kubaga ahanini, cyagwa se umurwayi aje babigenza bate, aho abantu bashobora kubyigira. Hakazaba harimo kandi n’ibyumba bizaba birimo ibikoresho bihagije nka mudasobwa, ku buryo abakaneye kwiga bazaba bafite ubwinyagamburiro bw’aho bashobora kwigira ku buryo bworoshye."

Biteganyijwe ko imirimo yo kubaka iyi nzu izasozwa mu gihe gito kiri imbere, ikarangira itwaye abarirwa muri Miliyari 9Frw.

Ibitaro bya Kabgayi byubatswe mu 1973 na Kiliziya Gatolika, bitangira gukora ku wa 9 Nzeri 1937.

Ibi bitaro byahawe inzu nshya y'ababyeyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .