Umujyi wa Rubavu uri ku Kiyaga cya Kivu, ukaba wakira abantu benshi baturutse impande zose z’igihugu no hanze yacyo bashaka kuruhuka no kwishimisha, aho byitezwe ko bizaba akarusho muri ibi bihe by’iminsi mikuru.

Uyu mujyi uri ku mupaka w’u Rwanda na Repubulika Iharanira Demokarasi ya Congo, ukorerwamo ubucuruzi bwinshi by’umwihariko ubwambukiranya imipaka.

Kuba uyu mujyi uhana imbibi na RDC itabanye neza n’u Rwanda ni igihugu kirimo imitwe myinshi iteza umutekano muke n’irwanya u Rwanda. Gusa ibi ntacyo bizahungabanya ku baturage bawo n’abashaka kuwusura muri iyi minsi ya nyuma y’umwaka nk’uko Umuyobozi w’Akarere ka Rubavu, Mulindwa Prosper, yabishimangiye.

Mulindwa yavuze ko imyiteguro y’iminsi mikuru yatangiye mbere, ko hagiye habaho ibiganiro n’inzego zitandukanye zirimo iz’ubukerarugendo, umutekano n’izindi zirebwa n’ibi bihe.

Ati “Twagiye tugira inama n’inzego z’umutekano kugira ngo dushimangire ko nta kibazo cy’umutekano gihari ku mipaka ndetse no mu karere yaba ku manywa cyangwa mu ijoro. Imipaka yacu iratekanye.”

Mulindwa yavuze ko nta mpungenge ko ubucuruzi bwambukiranya imipaka buzahungabana muri ibi bihe kubera umwuka utari mwiza hagati y’u Rwanda na RDC.

Ati “Mu mezi atanu ashize nta bibazo twigeze tubona ku mupaka cyangwa ibindi birimo abaturage bacu biva i Goma.”

Umuturage witwa Maniriho Ismael nawe yunze mu rya Mulindwa, avuga ko bizeye neza ko ibi bihe by’iminsi mikuru bizagenda neza.

Ati “Twizeye umutekano wacu ku mupaka nta gushidikanya ko tuzanezererwa iyi minsi mikuru mu mutekano.”

Sekabuga Fidel na Nsabimana Faustin, batuye mu Murenge wa Busasamana, bavuze ko bitewe n’imikoranire myiza n’Ingabo z’u Rwanda [RDF] ku mupaka nta kibazo bazagira.

Sekabuga yagize ati “Ingabo zacu zihora ziteguye guhangana n’ikibazo icyo ari cyo cyose. Dufitanye ubufatanye bwa hafi kandi twiyemeje kubungabunga umutekano mu gihe cy’iminsi mikuru.”

Umupaka wa Petite Barrière n’uwa Grand Barrière ni imwe mu ikoreshwa n’abantu benshi bo mu Rwanda na RDC. Imibare y’Akarere ka Rubavu igaragaza ko abantu baca kuri iyi mipaka biyongereye kabava ku bihumbi bine mu bihe bya Covid-19 bakagera ku bihumbi 20.

Amwe mu mafoto y’Umujyi wa Rubavu:

Umusigiti uri muri uyu mujyi, mu gace ahanini kiganjemo Abayisilamu

Umujyi wa Rubavu ukundwa n'abatari bake, abashaka kuruhuka bakanyurwa n'ibyiza biwutatse

Uyu ni umuhanda werekeza ku Kiyaga cya Kivu

Icyambu cya Rubavu cyoroheje ubuhahira hagati ya Rubavu n'utundi turere dukora ku Kivu

Ku mucanga ku mazo y'ikiyaga cya Kivu, ahakunda kuruhukirwa na benshi

Rubavu ni umujyi ukundwa na benshi

Ibinyobwa bya Bralirwa bikundwa na benshi ni hano byengerwa

Abakorera ubucuruzi butandukanye i Rubavu bavuga ko bugenda neza kuko ari umujyi ugendwa n'abataruka mihanda yose

Amafoto: Kwizera Hervé