Imibiri irenga 5000 y’abishwe muri Jenoside yakorewe Abatutsi yamaze gukurwa mu mwobo i Kiziguro

Yanditswe na Hakizimana Jean Paul
Kuya 17 Ukuboza 2020 saa 03:59
Yasuwe :
0 0

Ubuyobozi bwa Ibuka mu Karere ka Gatsibo bwatangaje ko imibiri irenga 5000 y’abishwe muri Jenoside yakorewe Abatutsi i Kiziguro yakuwe mu rwobo rwa metero 24,6 yari yarajugunywemo mu 1994.

Ni igikorwa cyari kimaze ukwezi kurenga aho cyagizwemo uruhare n’ubuyobozi bw’Akarere ka Gatsibo bufatanyije na Ibuka nyuma yaho hatangiye kubakwa urwibutso rushya rwa Kiziguro.

Abatutsi biciwe muri aka gace bigizwemo uruhare na Gatete Jean Baptiste wari Burugumesitiri wa Komini Murambi, kuri ubu akaba afungiye i Arusha, aho yakatiwe igifungo cy’imyaka 40 nyuma yo kujuririra igifungo cya burundu yari yarahawe nyuma yo guhamwa n’ibyaha bya Jenoside.

Umuyobozi wa Ibuka mu Karere ka Gatsibo, Sibomana Jean Népomucène, yabwiye IGIHE ko ari igikorwa cyatangiye tariki ya 12 Ukwakira 2020, habanza kwimurwa imva zari mu nzira igana ku mwobo munini wajugunywagamo imibiri hanyuma tariki 27 Ukwakira nibwo batangiye gushaka inzira ibajyana kuri wa mwobo hifashishijwe imashini.

Ati “ Imibiri yose twatangiye kuyikuramo tuza kugera hasi ahantu hari urutare, tariki 18 Ugushyingo nibwo twasoje twasanze uwo mwobo ureshya na metero 24,6 ntabwo ari metero 30 nkuko mbere byavugwaga, imibiri yo turakeka irenga 5000 ho gato hari imibiri imwe yangiritse cyane yivanze n’itaka, biragoye guhita uyibara kuko hari ibice byinshi byangiritse.”

Ku kijyanye n’ikiri gukorwa kuri ubu, yavuze ko barimo guteramo imiti cyane cyane kuri iyi mibiri yangiritse kugira ngo n’abantu bazayisukura bazabe bafite ubwirinzi.

Ati “Icya kabiri ni ugutandukanya imyenda n’imibiri, icya gatatu ni ukoza imibiri, ibyo rero birimo birakorwa mu rukurikirane twitegura ko mu matariki asanzwe dusanzwe twibukiraho muri Mata aribwo twazayishyingura mu cyubahiro n’urwibutso rushya rwacu rwuzuye neza.”

Sibomana yasabye abantu bagifite amakuru ku hantu hari imibiri itarashyingurwa mu cyubahiro ko bayatanga imiryango yabo ikabashyingura mu cyubahro ngo kuko byafasha ababo cyane.

Yavuze ko kuri ubu bari mu biganiro n’imiryango yagiye ishyingura ababo mu ngo zabo no mu matongo kugira ngo bazayikuremo bayishyingure mu rwibutso rwiza ruri kubakwa, ibi bikazanakorwa ku mibiri 253 ishyinguwe mu rwibutso ruherereye mu Murenge wa Remera ahitwa i Bugarura.

Umuyobozi w’Akarere ka Gatsibo aherutse kuvuga ko uyu mwobo wakuwemo iyi mibiri utazasibwa ahubwo uzaba ikimenyetso cyerekana uko Abatutsi biciwe i Kiziguro bishwe urw’agashinyaguro.

Tariki 11 Mata 1994 niwo munsi utazibagirana ku batutsi bari bahungiye ku Kiliziya i Kiziguro kuko aribwo hishwe benshi hikangwa ko ingabo zari iza FPR-Inkotanyi zigiye kuhagera, ku mugoroba bafashe abantu bari bataricwa babikoreza imirambo babakoresha urugendo nk’urwa metero 300 bajya kujugunya ya mibiri mu mwobo munini wari hafi aho.

Uretse aba kandi bivugwa ko hari n’abandi batutsi bagiye bagira ubwoba bwo kwicishwa umuhoro bakijugunya muri uwo mwobo Interahamwe zikabajugunyaho amabuye kugira ngo bapfiremo.

Urwibutso rwa Kiziguro ruri kubakwa mu buryo bugezweho rusanzwe rushyinguwemo imibiri y’abazize Jenoside yakorewe Abatutsi igera ku bihumbi 142 biciwe mu yahoze ari Komine Murambi.

Muri uyu mwobo hashize iminsi hakurwamo imibiri yajugunywemo mu 1994
Kiliziya ya Kiziguro yiciwemo abatutse benshi mu 1994
Umuyobozi wa Ibuka mu Karere ka Gatsibo, Sibomana Jean Népomucène

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .