Ubuzima busanzwe bwa François Kanimba nyuma yo kuva muri Guverinoma (Video)

Yanditswe na Twarabanye Venuste
Kuya 15 Ugushyingo 2019 saa 10:47
Yasuwe :
0 0

Nyuma y’imyaka igera kuri 17 muri Politiki y’u Rwanda by’umwihariko iy’ifaranga n’ubukungu bw’igihugu, François Kanimba, ari gutanga umusanzu wo kubaka igihugu mu buzima busanzwe, atekereza ku mishinga ye ndetse atanga n’inama ku bamugana.

Kanimba François azwi muri Politiki y’u Rwanda cyane iyerekeye ifaranga n’ubukungu muri rusange. Benshi ntibaherutse kumwumva mu ijwi rye riremereye asobanura Politiki y’ifaranga ry’igihugu n’uko ubukungu bw’igihugu buhagaze.

Yabaye Minisiteri y’Ubucuruzi n’Inganda mu bihe byari bikomeye, ubwo igihugu cyarwanaga no kureshya abashoramari ngo bashore imari mu Rwanda, arahatana kugeza kuri ‘Made in Rwanda’ imaze kuba ubukombe.

Tariki ya 30 Kanama 2017 ubwo Perezida Kagame yatangazaga abagize Guverinoma nshya, Kanimba w’imyaka 61 wari Minisitiri w’Ubucuruzi, Inganda n’Ibikorwa by’Umuryango wa Afurika y’Iburasirazuba (MINEACOM), yasimbuwe na Vincent Munyeshyaka.

Nyuma y’icyo gihe, Kanimba atangaza ko ari kubaka igihugu binyuze mu mishinga itandukanye.

Ati “Icyo nababwira rwose nyuma yo kuba Minisitiri mu mibereho yanjye ntacyahungabanye mbayeho neza. Urumva dukorera leta igihe kinini cyane igihe cyagera, bakagushimira ukaruhuka ariko ugashobora no kuba watekereza ikindi wakora mu buzima, ntabwo umuntu mu mibereho ye ari ugukora akazi k’umushahara wa leta gusa, ashobora no gushaka ibindi byatuma akomeza kumva ko igihe agifite imbaraga, ashobora kugira icyo akora.”

Abantu batandukanye bamugana bamugisha inama ku ngingo zitandukanye nk’umuntu wamaze igihe kinini muri Guverinoma kandi ufite ubunararibonye buhambaye mu by’ubukungu bw’igihugu n’imibereho y’Abanyarwanda.

Ati “ Hari n’abantu benshi bajya baza kundeba bakambwira bati wowe uri inararibonye wakoze imirimo myinshi, hari ibintu byinshi watwunguraho ibitekerezo, mu rwego rw’ubumenyi ufite, na bo tukaganira bakambaza inama nkazibagira.”

Kanimba atangaza ko imbaraga zo gukorera igihugu zikiri zose, ku buryo igihe cyose yahamagarirwa imirimo yiteguye gutanga umusanzu nk’uko ari kuwutanga mu buzima busanzwe.

Ati “Imbaraga zo gukorera igihugu zo ziruzuye, nta n’ubwo ntekereza ko zizigera zishira keretse igihe napfuye.”

Ingengabihe y’umunsi we yarahindutse

Kanimba François atangaza ko imitere y’umunsi we yahindutse agereranyije n’igihe yari Minisitiri, agira ati “ Kera nkiri Minisitiri, nagombaga kuva mu buriri saa kumi z’ijoro nkaruhuka, nkakora ka Siporo nkakararaba, nkakora uko nshoboye kugira ngo saa moya mbe ndi mu kazi, itarengaho n’umunota n’umwe mba nageze mu kazi kugira ngo ntange urugero mu bakozi nayoboraga. Iyo nshingano ntayo ngifite.”

“Mbyuka bumaze gucya nkakaraba, nkakora siporo nk’uko nabikoraga n’uko byagera mu ma saa tatu saa yine n’igice nkatangira gutekereza imishinga yanjye mfite mu buzima kuko nyigengaho, nta muntu untegeka uburyo nkora ingengabihe no gukoresha igihe mfite.”

Nyuma ya Jenoside yakorewe Abatutsi, nibwo François Kanimba, inzobere mu bijyanye n’Ubukungu n’Ibarurishamibare ‘Economic Statistician’ yatangiye kumenyekana mu nzego zitandukanye.

Mu 2000 yabaye Umuyobozi wungirije wa BNR, mu 2002 agirwa Umuyobozi Mukuru wayo kugeza mu 2011 ubwo yagirwaga Minisitiri w’Ubucuruzi n’Inganda yasorejemo imirimo ye nyuma y’uko yari yarahujwe n’ibikorwa by’Umuryango wa Afurika y’Iburasirazuba.

Kanimba François azwi muri Politiki y’u Rwanda ifite aho ihuriye n’ubukungu bw'igihugu
Kanimba François arahirira kuba Minisitiri w'Ubucuruzi n'Inganda mu muhango wabaye ku wa 10 Gicurasi 2011
Guverineri wa Banki Nkuru y’Igihugu, Rwangombwa John (ibumoso) na François Kanimba wari Minisitiri w’Ubucuruzi n’Inganda, ubwo bitabiraga Inama yiga ku bijyanye n’Ubwishingizi muri Afurika (A.I.O Conference)
François Kanimba asubiza ibibazo by’abitabiriye Inama y’Igihugu y’Umushyikirano yabereye i Kigali ku wa 15 Ukuboza 2016
Minisitiri w’Ubucuruzi n’Inganda, Vincent Munyeshyaka mu muhango w'ihererekanyabubasha na François Kanimba wahoze ayobora MINEACOM
Kanimba yamaze imyaka icyenda ari Guverineri wa BNR, amara itandatu ku mwanya wa Minisitiri w’Ubucuruzi n’Inganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza