Imibare y’abarwaye Coronavirus mu Rwanda iruta abayikize

Yanditswe na IGIHE
Kuya 31 Kanama 2020 saa 09:51
Yasuwe :
0 0

Kuva umuntu wa mbere yasezererwa mu bitaro akize indwara ya COVID-19, wasangaga mu mibare y’abarwaye iki cyorezo mu Rwanda, abakize baruta abakiri mu bitaro, gusa kuri iyi nshuro ho si ko bimeze kubera umuvuduko w’ubwandu uri kugaragara.

Mu ntangiriro za Mata nibwo abantu bane ba mbere basezerewe mu bitaro nyuma yo gukira COVID-19, ni mu gihe umurwayi wa mbere yagezemo ku wa 14 Werurwe uyu mwaka.

Kugira ngo umuntu asezererwe mu bitaro, biba bisaba ko aba yakorewe ibizamini bibiri byombi bikagaragaza ko atakirwaye COVID-19.

Ubu mu Rwanda hari abantu 2086 barwaye iyi ndwara, benshi kurusha abamaze gukira kuko bo ari 1918. Iyi mibare y’abarwayi benshi ituruka ku bwiyongere bw’iki cyorezo aho nko mu minsi irindwi gusa habonetse abantu 931.

Ubu bwiyongere nibwo bwatumye hakazwa ingamba zo kwirinda iki cyorezo aho amasaha y’ingendo yavanywe saa tatu z’ijoro agashyirwa saa moya z’umugoroba, ndetse n’abakozi bamwe bagasabwa gukorera mu ngo.

Minisiteri y’Ubuzima isobanura ko uko uburwayi bwiyongeraga, ibigo byashyirwagamo abanduye byaje kurengerwa, bituma bimwe mu bigo nderabuzima n’amashuri bihindurwa aho kuvurirwa COVID-19, bijyanye n’umubare w’abarwayi.

Inyandiko Minisiteri y’Ubuzima iherutse gushyira ahagaragara ivuga ko kugeza ku wa 21 Nyakanga 2020, mu Rwanda hari ibigo 18 bivurirwamo abanduye COVID-19, birimo ibigo nderabuzima icyenda n’amashuri arindwi, byose hamwe bifite ubushobozi bw’ibitanda 1986.

Minisiteri y’Ubuzima ivuga ko guhindura ibigo nderabuzima ibivurirwamo COVID-19, ari imbogamizi ku bakeneye serivisi z’ubuzima zahatangirwaga, kandi zigomba gukomeza no mu bihe by’icyorezo, hirindwa ko ibibazo byabishamikiraho.

Byatumye hashyirwaho uburyo bwo kuvurira abanduye iki cyorezo mu ngo kuko bwitezweho kuzanagabanya ikiguzi gihanitse bisaba Guverinoma y’u Rwanda mu kuvurira ubuntu no gushyira mu kato abaturage bose n’abanyamahanga.

Minisiteri y’Ubuzima ivuga ko nibura 70% by’abasangwamo COVID-19 nta bimenyetso baba bagaragaza, ku buryo baba bakeneye gusa kuvanwa mu bandi, bagakurikiranwa mu buryo bworoheje, ku buryo byanabera mu ngo zabo.

Hanzuwe ko abataragaza ibimenyetso aribo bazajya bemererwa kwitabwaho bari mu ngo, naho abanduye COVID-19 basanganywe ubundi burwayi bukomeye, kimwe n’abafite ibimenyetso by’uburwayi, abe aribo bashyirwa mu ivuriro nk’uko bisanzwe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .