Imbuto, imboga n’ibindi bicuruzwa byo mu Isoko rya Kimironko byatangiye gucururizwa ku internet

Yanditswe na Twarabanye Venuste
Kuya 18 Kamena 2020 saa 05:15
Yasuwe :
0 0

Iterambere ry’ikoranabuhanga ryoroheje ubuzima. Kuri ubu riri kwifashishwa mu ngeri zitandukanye z’imibereho, aho umuntu ashobora kubonera nyinshi muri serivisi yifuza atavuye mu rugo rwe.

Mu Rwanda ikoranabuhanga riri mu rihanzwe amaso ni irijyanye no guhahira kuri internet no kwishyuran.

Ku isoko ry’ibigo bishya bikora ubucuruzi bwo kuri internet, hiyongereyeho ‘Kimironko Market’; ni urubuga rushya rw’ubucuruzi rufite umwihariko wo korohereza Abanyarwanda guhaha ibirimo imboga n’imbuto mu isoko rya Kimironko ariko bifashishije internet.

Ibicuruzwa abaturarwanda bashobora guhaha banyuze ku rubuga rw’ubucuruzi bwo kuri internet rwa ‘Kimironko market’ ni ibiribwa by’ubwoko bwose birimo imboga n’imbuto byose biboneka mu isoko risanzwe rya Kimironko riherereye mu Karere ka Gasabo.

Ibyo bicuruzwa binyuzwa kuri ‘Kimironko Market.rw’, aho umuntu atumiza ibyo yifuza akabigerezwa mu rugo.

Umuyobozi Mukuru wa RG-Consult Inc, ari nayo ibarizwamo Kimironko Market.rw, Remmygious Lubega, yabwiye IGIHE ko iryo guriro rigamije gufasha abaturarwanda kubona ibiribwa byiza badakoze ingendo bajya ku isoko.

Yatangaje ko bakorana n’abacuruzi muri rusange aho bafashe isoko risanzwe rya Kimironko baritereka kuri internet.

Yakomeje agira ati “Mu yandi magambo, twafashe isoko rya Kimironko turizana ku rubuga rwa internet. Biroroshye ku muntu uwo ari we wese gutuma ibiribwa ashaka byose, bikamusanga aho ari hose.”

Mu gihe abantu basabwa no kwirinda ingendo zitari ngombwa kubera icyorezo cya COVID-19, Remy avuga ko bashaka gukora ku buryo buri wese abasha kubona ibyo akeneye bitabaye ngombwa kujya kubyigana mu isoko.

Ati “Ntabwo ukeneye kujya mu isoko kubera ko dufite aho wareba urutonde rw’ibirimo abantu bakeneye batagiye gutera umuvundo mu isoko.”

Iri guriro rigeza ku bakiliya baryo ibicuruzwa byiza ryanatangaje ko abantu bari mu mahanga bashobora guhahira imiryango yabo bakoresheje Kimironkomarket.rw. Ibi ngo byafasha abafite imiryango mu Rwanda kuyihahira hatabayeho kujya kubikuza amafaranga.

Agira ati “Twabonye ko hari abantu bagize ibibazo by’ubukungu kubera ihagarikwa ry’ibikorwa kandi bashobora kuba babeshejweho n’Abanyarwanda bari mu mahanga. Abantu bari mu mahanga bashobora guhahira imiryango yabo nta kibazo na kimwe cyo gutonda imirongo mu mabanki. Niba uri mu mahanga ushaka guhahira umuryango wawe, ubu ni uburyo bwiza bwo kubikora.”

Umuntu uri mu mahanga ushaka guhahira abari mu Rwanda ajya kuri urwo rubuga akareba ibyo abahaha akerekana n’aho ashaka ko ibicuruzwa byerekezwa, ubundi bikahagezwa mu gihe gito.

Mu gutanga serivisi inyura uyihawe, ikiguzi cy’ibyaguzwe gitangwa uwabitumije amaze kubisuzuma akareba niba byujuje ubuziranenge.

Iri guriro rivuga ko riri ‘gufasha abantu kubona ifunguro ryuzuye binyuze muri serivisi z’ibicuruzwa byiza kandi bihendutse.’

Riti “Umuco wo guhahira kuri internet uri gukura cyane. Nta cyawuhagarika bitewe no kuba internet kuri ubu ihendutse, umuntu akaba ashobora kujya kuri internet byoroshye.’’

Kimironko Market ishyize imbere uburyo bwo kwishyurana budahererekanya amafaranga mu ntoki kuko abayihahiraho bazajya bishyura bakoresheje Mastercard, Visa card, Mobile Money n’ubundi buryo butandukanye.

Mu Rwanda ubucuruzi bwo kuri internet bumaze imyaka hafi irindwi ariko buracyagaragaramo icyuho kuko butaritabirwa na benshi.

Mu 2017, imibare y’Ishami ry’Umuryango w’Abibumbye ryita ku Bucuruzi n’Iterambere (UNCTAD) yo mu bihugu 152 ku Isi yagaragaje ko kuri internet hahererekanyijwe tiliyari $3.9, inyongera ya 22% ugereranyije n’umwaka wari wabanje.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .