00:00:00 IGIHE NETWORK KN KINYARWANDA EN ENGLISH FR FRANCAIS

Imbogamizi mu ikoreshwa ry’udukingirizo tw’abagore; twabuze abakiliya

Yanditswe na Thamimu Hakizimana
Kuya 6 August 2022 saa 12:12
Yasuwe :

Abakobwa n’abagore bari kwitabira Imurika riri kubera i Gikondo, bagaragaje imbogamizi baterwa no gukoresha udukingirizo twabagenewe bitewe n’uko badasobanukiwe imikorere yatwo.

Mu bari kumurika ibikorwa byabo, harimo n’imiryango yita ku buzima. Abitabira bafite amahirwe yo gucyura udukingirizo tw’ubuntu, gusa utwitabirwa ni utw’abagabo kurusha utw’abagore.

Umuryango urwanya SIDA, AIDS HealthCare Foundation (AHF Rwanda) usanzwe utanga udukingirizo tw’ubuntu mu bice bitandukanye mu gihugu, kuri iyi nshuro uri gukorera ubukangurambaga bwo kwirinda iki cyorezo muri iri murikagurisha mpuzamahanga.

Abantu batandukanye baganiriye na IGIHE, bavuze ko bakunda gukoresha udukingirizo tw’abagabo kuko tutabagora. Bemeza ko gukoresha utwagenewe abagore bigoye cyane bitewe n’imiterere yatwo.

Uwineza yagize ati “Singakunda [agakingirizo k’abagore]. Nkunda gukoresha ak’abagabo kuko ni ko kanyorohera. Agakingirizo k’abagore kugakoresha bisaba ibintu byinshi kuko binagusaba kuba ugafashe.”

Kabatesi we yagize ati “Mba mfite ubwoba ko kamperamo ndangaye gato. Ibaze kaguhezemo? Abantu bakumva ngo uri kwa muganga kugakurwamo. Icyo gisebo nta wagikira?”.

Mutara Jacquie yemeje ko aribwo bwa mbere abonye agakingirizo k’abagore ndetse agiye kugerageza kugakoresha n’ubwo yabwiwe ko bigoye.

Ati “Nishimiye kuba mbonye agakingirizo k’abagore, njye nibwo nkikabona kandi nashimiye abatuzanye. Ubu ngiye kukajyana ngerageze nkakoreshe numve.”

Umuyobozi w’Ishami rishinzwe gukumira Virusi itera Sida muri AHF Rwanda, Nteziryayo Narcisse, yavuze ko abagore n’abakobwa benshi bari kwitabira EXPO 2022 bari gutwara udukingirizo tw’abagabo kubera ko aritwo bamenyereye.

Ati “Udukingiruzo turi gutanga utwinshi ni utw’abagabo kuko yaba abagore n’abakobwa bose bari gutwara utw’abagabo ariko byose biterwa n’ikoreshwa kuko rirasa nk’irigoye.”

“Bisaba kwitwararika cyane kuko umukobwa aba agafashe ngo katamucika kakinjira.”

Kuva iri murikagurisha ryatangira, hamaze gutangwa udukingirizo tw’abagabo dusaga ibihumbi 80 mu gihe utw’abagore ari 112 gusa.

Udukingirizo tw'abagore ntitwitabirwa bitewe n'uko kudukoresha bisaba kwigengesera cyane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .