Imbere mu nkambi ya Gashora yakiriwemo impunzi zaturutse muri Libya (Amafoto & Video)

Yanditswe na Rabbi Malo Umucunguzi
Kuya 27 Nzeri 2019 saa 04:05
Yasuwe :
0 0

Kuri uyu wa Kane nibwo impunzi 66 zaturutse mu gihugu cya Libya zasesekaye i Kigali, zihita zerekezwa mu nkambi y’agateganyo ya Gashora mu Karere ka Bugesera, aho zateganyiijwe icumbi ry’igihe cyose zizamara mu Rwanda, mbere yo gusubira iwabo cyangwa zigahitamo gutangirira ubuzima bushya mu Rwanda.

Izi mpunzi zakiriwe nyuma yo kugerageza kuva mu bihugu byazo cyane cyane byo mu ihembe rya Afurika ngo zijye gushaka ubuzima i Burayi zisohokeye muri Libya, ariko ntizahiriwe n’urugendo kuko zabuze uko zambuka Méditerranée, zirafungwa, zihera muri icyo gihugu muri iki gihe kidafite guverinoma ihamye.

Kwakira izi mpunzi z’Abanyafurika ni icyemezo Perezida Kagame yafashe nyuma y’uko mu 2017 hagaragaye uburyo zateshwaga agaciro muri Libya bamwe bagacuruzwa nk’abacakara abandi bagakorerwa iyicarubozo.

Iyi nkambi y'agateganyo yashyizweho ku bufatanye bwa Guverinoma y'u Rwanda, AU na UNHCR

Ku wa 10 Nzeri nibwo amasezerano yo kwakira impunzi 500 yashyizweho umukono ku cyicaro cy’Umuryango wa Afurika yunze Ubumwe (AU) i Addis Ababa hagati ya Guverinoma y’u Rwanda, AU n’Ishami ry’Umuryango w’Abibumbye ryita ku mpunzi, UNHCR.

U Rwanda rwatunganyije inkambi irimo ibikenerwa byinshi

Umurenge wa Gashora uherereye mu Karere ka Bugesera, mu rugendo rw’isaha imwe n’iminota mike ugenda n’imodoka, uturutse mu Mujyi wa Kigali. Mu minota igera ku icumi uvuye muri kaburimbo, niho hubatswe inkambi y’agateganyo ya Gashora ku nkombe z’ikiyaga cya Mirayi. Ni mu bilometero bike uvuye ku mupaka w’u Burundi.

Kugeza mu masaha y’umugoroba kuri uyu wa Kane, hari hagikorwa imirimo ya nyuma nko gusiga amarangi, gushyira amatara mu nyubako, kunoza uburyo butanga ingufu zizajya zitekeshwa n’ibindi, ariko ni nabwo barimo bategura amafunguro yagombaga kwakirizwa icyiciro cya mbere cy’impunzi zivuye muri Libya.

Umuyobozi w’iyi nkambi, Elysée Karyango, avuga ko hateguwe uburyo bunoze izi mpunzi zigomba kwakirwamo, n’ufite ikibazo agahabwa ubuvuzi bukenewe kandi bwihuse.

Ati “Hateganyijwe ahantu impunzi zigomba kuza, zigasuzumwa nk’indwara ndetse zigahabwa ubuvuzi bw’ibanze. Nibamara kuvamo, urumva impunzi zikeneye kwandikwa, kubana n’umuntu ugomba kuba uzi uwo ari we. Ni ukuvuga ngo barinjiye, basuzumwe ko nta we ufite ikibazo cy’ubuzima, baranditswe kugira ngo tubane n’abantu tuzi, ubwo tukajya kubafungurira.”

Impunzi zahawe dekoderi ituma zireba televiziyo zinyuranye

Uburyo bwo kugaburirwa no kwidagadura

Uburyo bwo guteka muri iyi nkambi ni uko hatazajya hakoreshwa inkwi, hazajya hifashishwa gusa gaz kuko inkambi zirimo guhagarika gukoresha inkwi hagamije kutangiza amashyamba no kurengera ibidukikije muri rusange.

Hari icupa rinini rya gaz hanze rizajya ritanga ingufu mu gikoni, zizajya zikoreshwa mu guteka, hateganyijwe ahantu hihariye ho gufatira amafunguro ndetse mu nkambi hagati harimo uturima tw’igikoni tuzajya twifashishwa mu kubona imboga.

Iyi nkambi isanzwe ifite ibibuga by’umupira w’amaguru, ariko kuri iyi nshuro bizanavugururwa kuko iyi nkambi mbere yakoreshejwe mu kwakira by’agateganyo impunzi z’Abarundi, zikahamara igihe gito zikimurirwa ahandi kubera ko bitemewe ko impunzi ziguma hafi y’umupaka w’igihugu zahunze. Aba bavuye muri Libya bo bashobora kuzahatinda.

Kuri uyu wa Kane ku mugoroba hari hakirimo hatunganywa icyumba kizajya kiberamo inama, n’impunzi zikaba zaharebera imipira inyuranye nka shampiyona zikomeye ku Isi. Cyari kirimo gushyirwamo ibyuma bizanamo ubuhehere bizwi nka ‘climatiseurs’ mbere yo gushyirwamo televiziyo nini.

Karyango yakomeje ati “Ni ukugira ngo abantu be kuza ngo birirwe bigunze. Tuzubaka n’ibindi bibuga bya Volleyball na Basketball… Urumva ukuntu abantu bavuye hariya bamerewe, icyifuzo leta yacu ifite ni uko bagera ahantu bakavuga bati Ahuu!! Bakaruhuka. Umuntu akaba mu nzu, mbega nk’uri iwabo.”

Uretse ibi bibuga, iyi nkambi iranashyirwamo internet ya 4G, bikazajyana n’uburyo butuma impunzi zibasha kwiga Ikinyarwanda n’ibindi, kugira ngo zizabashe kuvugana n’abaturiye iyi nkambi.

Hari ibyagendeweho mu kugabanya ibyumba

Mu kuvugurura inzu zisanzwe muri iyi nkambi ngo zibashe kwakira impunzi, hateganyijwe uburyo abazazibamo bazatandukanywa hitawe ku ngingo zirimo imyaka yabo, igitsina cyangwa ubwenegihugu.

Karyango yakomeje ati “Ntabwo wafata umwana ngo umubanishe n’umusaza, ntabwo byaba ari byiza. Turashaka gushingira ku kigero cy’imyaka, abana bakajya hamwe, abakuru bakajya hamwe, nanone tugashingira ku gitsina, abantu b’igitsina gabo n’ab’igitsina gore ntabwo wabashyira hamwe, buri wese aba akeneye ahantu yiherera.”

“Ariko nanone aba bantu bashobora kuba bava mu bihugu bitandukanye. N‘icyo rero twakireba niba bavuga ururimi rumwe, abantu bavuye mu gihugu kimwe baba bavuga ururimi rumwe [bityo], byaborohera kubana kurusha uko wamuha umuntu batabasha kuvugana.”

Ibitanda biragerekeranye, hari n'ibyumba birimo ibitanda bibiri bitewe n'uko bingana

Inzu zatunganyijwe mu buryo hari nk’imwe ishobora kwakira abantu barindwi, mu cyumba kinini hakajyamo ibitanda bigerekeranye, ariko impunzi zihuje inzu zigahurira mu ruganiriro. Izi nzu zahawe ubwogero n’ubwiherero hanze, ku buryo nta kibazo cy’isuku kizaharangwa kuko hari n’amazi ahagije.

Hateganyijwe uburyo bwihariye bwo gutunganya amazi

Nubwo iyi nkambi yubatswe ku kiyaga cya Mirayi, hakozwe uburyo bwihariye bwifashisha moteri ikogota amazi mu kiyaga, ikayayungurura akabona gukoreshwa mu nkambi, haba mu mirimo itandukanye cyangwa kunyobwa.

Karyango yakomeje ati “Aya mazi arasukuye kubera ko WASAC ibasura mu buryo buhoraho ikareba ubuziranenge bw’amazi, kuko niyo ifite laboratwari nyayo, hano harimo ibikoresho bakoresha, baza kubarebera ko amazi bakoresha afite ubuziranenge.”

Iyi migezi ikoresha amazi y'ikiyaga cya Mirayi aba yatunganyijwe

Harimo ivuriro n’abaganga

Mu kwita ku buzima bw’izi mpunzi, hubatswe ivuriro hifashishijwe inyubako yari ihasanzwe, irahindurwa ku buryo ari ahantu hashobora gufashirizwa umuntu urwaye byoroheje cyangwa ari nk’umugore wabyaye.

Hari abaforomo batatu n’umukozi umwe ushinzwe ibya laboratwari, ndetse hari imbangukiragutabara ishobora kwifashishwa igihe hari ufite uburwayi budashobora kuvurirwa mu nkambi.

Karyango yakomeje ati “Hashobora kuza na dogiteri igihe akenewe, ariko si ngombwa cyane kuko ibinaniranye aha babijyana ku kigo nderabuzima, Ibitaro dufite ibya Nyamata, dufite imbangukiragutabara ihora ahangaha, hagize ugira akabazo imodoka ni uguhita imwirukankana, aho tubona hari ubuvuzi bwakenerwa burenze uburi hafi ahangaha.”

Iri vuriro ryahawe abaganga n'imbangukiragutabara ngo umurwayi ukomerewe ajyanwe ku ivuriro rifite ubushobozi bwisumbuye

U Rwanda rwakiriye izi mpunzi mu gihe inkunga zikomeje kugabanyuka, gusa Minisitiri ushinzwe ibikorwa by’ubutabazi, Kamayirese Germaine aheruka kuvuga ko hakomeje gahunda zo gushaka ubushobozi no gushyiraho gahunda zituma impunzi zitunga. Ibyo bikajyana no gushishikariza impunzi zimwe gusubira iwabo, cyane aho ibibazo byakemutse.

U Rwanda rucumbikiye izindi mpunzi zisaga ibihumbi 140 ziganjemo Abanye-Congo n’Abarundi, gusa hari n’izituruka mu bihugu bya Afghanistan, Angola, Repubulika ya Centrafrique, Chad, Eritrea, Ethiopia, Guinea, Haiti n’ahandi.

Impunzi zinjira mu nkambi zizajya zibanza gusuzumirwa ubuzima muri ibi byumba
Ibi byumba nibyo bizajya byandikirwamo impunzi
Abakozi barimo gutegura amafunguro yakirijwe impunzi zaturutse muri Libya
Hazajya hakoreshwa gaz, nta nkwi zizifashishwa muri iyi nkambi
Hateganyijwe amashyiga agezweho akoresha gaz
Muri iyi nkambi harimo n'uturima tw'igikoni duteyemo imboga
Hashyizwe icupa rinini rizajya ritanga gaz itekeshwa mu gikoni
Amafunguro y'impunzi yari amaze gutegurwa
Impunzi zimaze gutegurirwa aho zifatira amafunguro ya mbere mu Rwanda kuri uyu wa Kane
Ibikoresho bitandukanye byari bikomeje kongerwa mu nkambi
Kandagirukarabe zabegerejwe mu rwego rwo kwita ku isuku
Icyumba mberabyombi cyashyizwemo ibyuma bitanga ubuhehere mu nyubako
Ibi bigega ni byo bitanga amazi yifashishwa mu gikoni
Iki cyumba cyateganyirijwe kuzajya gifatirwamo amafunguro
Iyi nkambi iteyemo ibiti bitangamo umwuka uhagije cyane ko yanubatswe ku kiyaga cya Mirayi
Inzu nyinshi muri iyi nkambi zaravuguruwe
Ubwiherero busanzwe bwaravuguruwe
Hubatswe ubwiherero bushya bwunganira ubusanzwe
Umuntu umwe azajya arara hasi, undi hejuru
Bahawe inzitiramibu ngo birinde malaria
Ibi bigega birimo imiti isukura amazi aturuka mu kiyaga
Uru ruhombo nirwo rukogota mu kiyaga amazi akoreshwa mu nkambi
Inzu zaravuguruwe ngo zakirirwemo impunzi zaturutse muri Libya
Ababyeyi bateganyirijwe ahantu bashobora gufashirizwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .