Imbaraga zashibutse mu kubabarira! Uko abakoze Jenoside n’abayikorewe bunze ubumwe

Yanditswe na Ishimwe Israel
Kuya 18 Werurwe 2020 saa 09:09
Yasuwe :
0 0

Ni urugendo rutari rworoshye ariko rwashobotse! Abarokotse Jenoside yakorewe Abatutsi bo mu Murenge wa Nduba mu Karere ka Gasabo bashoboye kubabarira abayigizemo uruhare, ubu babanye nk’abavandimwe ndetse bahurira mu bikorwa bitandukanye bakorera mu matsinda.

Ibi byatumye Itorero rya Pentekote ADEPR ryoroza inka amatsinda umunani y’i Nduba agizwe n’abarokotse Jenoside n’abayikoze bemeye icyaha bagasaba imbabazi imiryango y’abo bahemukiye.

Buri tsinda rigizwe n’abantu batatu ryorojwe inka rizaba rihuriyeho yitezweho kurifasha kubaka umubano no kwiteza imbere. Iki gikorwa cyabaye kuri uyu wa Gatatu, tariki 18 Werurwe 2020.

Umushumba w’Itorero ry’Akarere ka Gasabo, Rev. Rutayisire Pascal, yavuze ko buri wese mu bagize itsinda azayifataho icyororo.

Yagize ati “ Turashimira abagize ubutwari bwo gusaba imbabazi abo bahemukiye n’abemeye gutera intambwe yo kubababarira. Inka twabahaye ni izo kubafasha kugira ngo ubumwe bwanyu bukomere nk’uko biri muri gahunda y’igihugu yo kurenga amateka y’ibyabaye. Ni inka ADEPR yemereye amatsinda umunani mu muhango wo gusoza ukwezi k’ubumwe n’ubwiyunge wabereye muri uyu Murenge ku wa 30 Ukwakira 2019.”

Mbere yuko amatsinda aremwa, abarokotse Jenoside bari bafite ibikomere n’ihungabana bakeneye gukira ndetse ababahemukiye na bo baradagadwaga kubera ibibi bakoze.

Umukozi ushinzwe Isanamitima n’Ubwiyunge muri ADEPR, Mahoro Emmanuella, yasobanuye ko guhuza ibi byiciro byombi byagize umumaro kuko ibiganiro byatanzwe byashibutsemo imbabazi n’ubwiyunge.

Yagize ati “Mu bifasha uwakomeretse gukira harimo no guhura n’uwamuhemukiye ariko n’imbabazi ni umuti uvura. Byari bigoye kubabarira umuntu utamugezeho. Imibare ihari igaragaza ko muri iyi myaka hagenda hafungurwa abantu benshi; ni byiza ko igihugu n’itorero dushyira hamwe kugira ngo tubagarurire ubumuntu batakaje kandi ntibabugarura batari kumwe na ba bandi bahemukiye.

Yavuze ko aho ariho havuye igitekerezo cyo kuvura abarokotse Jenoside ibikomere ariko na bo bakabasaba gutera intambwe yo kubabarira ababahemukiye.

Ati “Intambwe bamaze gutera irashimishije, mu itangira hari ingengabitekerezo ku rwego rwo hejuru mu itorero no mu baturage, ihungabana mu barokotse Jenoside, bigoye guhuza impande zombi; bamwe bagiraga ubwoba abandi bafite umutekano muke, abandi bumva bakwimuka bagahunga ababahemukiye batahura, umwe yajya guhura na mugenzi we agashaka indi nzira anyuramo.’’

Nyuma yo guhurizwa hamwe baje kunga ubumwe ndetse bwatangiye kubyara umusaruro.

Mukarurinda Bernadette warokotse Jenoside mu Kagari ka Butare yavuze ko kera babanaga buri ruhande rurakaye ariko ubu bararyama bagasinzira.

Ati “Igikorwa cy’isanamitima no kubana n’abanyiciye cyaramvunnye. Mbere nabonaga uwanyiciye nkahinduka nkumva mbaye nabi ariko nyuma tumaze guhabwa inyigisho zidukangurira gukundana ndabyakira, ndamubabarira numva nguwe neza. Uyu munsi tubana mu matsinda, ndamutuma na we akantuma. Inka rero duhawe uyu munsi na yo izadufasha gukomeza kubaka umubano wacu kuko tuzajya tuyitaho dufatanyije.”

Sinamenye Christophe wicuza kuba yaragize uruhare muri Jenoside, yavuze ko yahoranaga inkomanga ku mutima, atinya imiryango y’abo yahemukiye.

Nyuma yo kubegera akabasaba imbabazi avuga ko abisanzuraho ndetse babanye nta rwicyekwe.

Perezida wa Ibuka mu Murenge wa Nduba, Ndagijimana Théoneste, yashimye intambwe y’ubwiyunge aya matsinda yateye avuga ko abagitsimbaraye batemera gusaba imbabazi abo bahemukiye babigiraho.

Yashimiye ADEPR yaboroje inka avuga ko ari uburyo bwo kubafasha kwiyubaka mu buryo bw’umubiri nyuma y’ibikorwa by’isanamitima byabakorewe.

Ati “Iyo abantu bamaze kugira ubumwe, bubyara ubwiyunge. Itorero ryabafashije kwiyubaka mu buryo bw’umwuka binyuzemu isanamitima , urumva iyo habayeho igikorwa nk’iki cyo gutanga inka ni ukubafasha kongera kwiyubaka mu buryo bw’umubiri.”

Aborojwe inka basabwe kwiha umuhigo wo kuzifata neza ku buryo zizabagirira akamaro ndetse bakoroza n’abaturanyi babo.

Abarokotse Jenoside n'abayikoze bahawe inka nyuma yo gufashwa mu bumwe n'ubwiyunge
Abijanditse muri Jenoside yakorewe Abatutsi n'abayikorewe kuri ubu bunze ubumwe, baratahiriza umugozi umwe
Umushumba w’Itorero ry’Akarere ka Gasabo, Rev. Rutayisire Pascal, yasabye abahawe inka koroza abaturanyi babo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza