00:00:00 IGIHE NETWORK KN KINYARWANDA EN ENGLISH FR FRANCAIS

Imaramatsiko kuri BMW 750Li, Imodoka yatwaye Prince Charles mu Rwanda (Amafoto na Video)

Yanditswe na Iradukunda Serge
Kuya 30 June 2022 saa 02:41
Yasuwe :

Mu ntangiriro z’icyumweru gishize nibwo u Rwanda rwakiriye Igikomangoma Charles n’umugore we, Camilla wa Cornwall. Cyane ko bwari ubwa mbere mu mateka u Rwanda rwakiriye umuntu wo mu muryango w’ibwami mu Bwongereza, byasabaga imyiteguro ihambaye, haba mu kugena aho azarara ndetse n’imodoka azagendamo.

Prince Charles wari witabiriye Inama ya CHOGM yageze ku Kibuga cy’Indege cya Kigali mu ijoro ryo kuwa 21 Kamena 2022. Kimwe mu byo abantu bari bafitiye amatsiko ni imodoka yagombaga gutwara uyu munyacyubahiro cyane ko mu byo iwabo bamuziho harimo no gukunda imodoka nziza kandi zihenze.

Iyo ari mu Bwongereza Prince Charles akunze kugaragaraga agenda mu modoka nka Aston Martin V8 Vantage Volante, Aston Martin DB6 Volante, Jaguar I-Pace, Range Rover Hybrid LWB, Lagonda 3.0 Litre na Audi RS6.

Ibi byatumaga hari abumva ko imodoka igomba gutwara uyu mushyitsi igomba kuba ari imwe muri izi yaba yayizaniye cyangwa u Rwanda arirwo rwayishatse.

Prince Charles ageze ku kibuga cy’indege yakiriwe mu cyubahiro, agirana ikiganiro kigufi na Ambasaderi w’u Rwanda mu Bwongereza wari ukuriye itsinda ry’abamwakiriye, ahava yerekeza ku modoka yagombaga kumukura kuri iki kibuga.

Mu mafoto yahise asesekara ku mbuga nkoranyambaga hari ayamugaragaza mu modoka ya BMW bamwe batahise babasha kumenya ubwoko neza cyangwa andi makuru ayisumbuyeho.

Nyuma byaje kumenyekana ko imodoka yatwaye Prince Charles ari BMW 750Li yageze bwa mbere mu Rwanda mu 2016. Mu gihugu hari imodoka esheshatu gusa zo muri ubu bwoko, aho buri imwe ibarirwa agaciro k’arenga miliyoni 200Frw.

Haba mu gusura Urwibutso rwa Jenoside rwa Kigali, urwa Ntarama mu Bugesera ndetse n’ibindi bikorwa Prince Charles yakoreye mu gihugu izi modoka n’izo zamutwaye hamwe n’abari bamuherekeje.

Amakuru yizewe IGIHE yamenye ni uko iyi modoka ndetse n’izindi eshanu ngenzi zayo ari iza Premier Transport & Tour Services (PTS), Ikigo nyarwanda gikora ubucuruzi bwo gukodesha imodoka zifashishwa mu gutwara abashyitsi b’icyubahiro, abageni, ba mukerarugendo ndetse n’abandi bose bifuza imodoka zo mu bwoko butandukanye.

By’umwihariko iki kigo cyagize uruhare mu gutanga imodoka zitandukanye zifashishijwe muri CHOGM aho nibura bibarurwa ko cyatanze imodoka zirenga 110 zirimo Toyota Landcruiser V8 zirenga 20, Presidential Buses ebyiri, ndetse n’izi BMW esheshatu.

Uretse Prince Charles, imodoka z’iki kigo zagize uruhare mu gutwara abayobozi Malysia, Qatar na Banki Nyafurika Itsura Amajyambere.

Umuyobozi Mukuru wa Premier Transport & Tour Services (PTS), Kabera Joseph yavuze ko batanga izi modoka batari bazi ko hazavamo izatwara Prince Charles kuko Minisiteri y’Ububanyi n’Amahanga yabasabye kubaha imodoka gusa.

Ati “Muri iyi CHOGM turi bamwe mu batanze imodoka zatwaye abantu ndetse n’izatwaye ibintu byabo hari imodoka twahaye Leta ariko hari n’izindi twahaye abantu ku giti cyabo. Byaciye muri Minisiteri y’Ububanyi n’Amahanga badusaba imodoka zitandukanye ntabwo twari tuzi ngo zizatwara nde nibo bahisemo izikwiye gutwara Prince Charles, gusa iriya BMW ni imodoka nziza cyane ikwiriye umushyitsi w’imena nk’uriya.”

Kabera Joseph yavuze ko iki kigo cyaguze izi modoka za BMW 750Li mu 2016 kizitumije mu Budage. Kugeza ubu nizo zonyine ziri mu Rwanda ndetse na mbere yo gutwara Prince Charles zatwaye abandi bashyitsi bakomeye barimo Benjamin Mkapa wabaye Perezida wa Tanzania n’abandi Bakuru b’Ibihugu bitabiriye inama mpuzamahanga ku bukungu bwa Afurika, WEF for Africa, yabereye i Kigali mu 2016.

Ni imodoka yihariye

Kuba iyi modoka ya BMW 750Li yaratoranyijwe ngo itware Prince Charles ntibyapfuye kwizana, ahubwo byatewe n’uko ari imodoka ifite ikoranabuhanga rihambaye kandi ishobora kugenda ku muvuduko wo hejuru.

Ifite moteri ya V8 na Turbo ebyiri, ibintu biyiha ubushobozi n’imbaraga zo kugendera ku muvuduko wo hejuru ushoboka igihe bibaye ngombwa. Igihe itwaye umunyacyubahiro bikaba ngombwa ko igera mu ikorosi ntibisaba uyitwaye kugabanya umuvuduko ahubwo akatira k’uwo yari afite abifashijwemo n’uko amapine y’inyuma y’iyi modoka nayo akata.

Nk’igihe igeze mu muhanda mubi cyangwa kuri dos-d’âne iyi modoka irabimenya igahita yigira hejuru kugira ngo idakora hasi.

Ifite camera n’ikoranabuhanga rya ‘sensor’ riyifasha kutagonga umuntu cyangwa ikintu biyegereye n’iyo umushoferi atabibonye irihagarika yakomeza guhatiriza ikazima.

Uku kwizimya cyangwa gufata feri ishobora kubikora n’igihe ibonye ko umushoferi uyitwaye ari kurangara cyane (atareba imbere). Kwa kundi umuntu agera muri Traffic lights, umuntu akamara umwanya ategereje imodoka yaka, yo ihita yizimya ariko wajya guhaguruka ntibisabe kongera kuyatsa ahubwo moteri yayo igahita yitangiza.

Igihe habaye impanuka, amapine y’iyi modoka agatoboka cyangwa akaraswa, ikomeza kugira ubushobozi nibura bwo kugenda kilometero 100 noneho ipine rikabona guhindurwa.

Ikindi giha iyi modoka umwihariko ni uko itemerera uyitwaye kurenga igisata cy’umuhanda arimo kuko iyo yambutse umurongo amapine ahita yigarura. Bivuze ko kubona uyitwaye ari kugendera abandi nabi mu muhanda ari icyizira.

Iri koranabuhanga ni naryo kandi ikoresha igihe ugiye kuyiparika muri parikingi zifite imirongo. Ku muntu utazi guparika neza,iramufasha yo ikiparika igendeye kuri iyo mirongo.

Ubwiza bw’iyi modoka ntibugarukira kuri iri koranabuhanga n’uko igaragara inyuma ahubwo n’imbere ni uko. Nibwo iri mu bwoko bw’imodoka ziciye bugufi (sedan) imbere iragutse ku buryo ishobora kugenderwamo n’umuntu muremure bishoboka.

Ifite televiziyo ikorana na satellite ku buryo uyigendamo areba televiziyo zo hirya no hino ku Isi atishyuye ifatabuguzi ry’ikigo icyo aricyo cyose ikagira kandi na frigo ifashe abayirimo kwinywera agakonje mu gihe urugendo rwabaye rurerure.

Ibyiza by’iyi modoka wabibarirwa neza na Evariste Nkurikiyinka umaze imyaka itandatu ayitwara.

Nubwo atari we watwaye Prince Charles, uyu mugabo avuga ko abashyitsi bose yagiye atwara muri iyi modoka batunguwe n’ubwiza bwayo ko kumenya ko mu Rwanda hari imodoka nk’izo.

Ati “Abantu nabashije kuyitwaramo bagendaga bambaza bati ese mu Rwanda mufite imodoka nk’iyi. Bakambwira bati izi modoka ni iz’i Burayi kandi nabwo zigurwa n’abantu bakize. Birabatangaza cyane kuba iyi modoka iri mu Rwanda.”

Kabera yavuze ko kuba imodoka yabo yaragiriwe icyizere cyo gutwara Prince Charles babifashe nk’ishema kuri bo no ku gihugu.

Ati “Byaduhesheje ishema kumva ko imodoka yacu yashimwe kuri ruriya rwego ariko ntabwo byadutangaje cyane kubera ko tuziko ari imodoka yihariye kandi ikwiriye umushyitsi nk’uriya.”

“Byarushijeho kuduha imbaraga ku buryo n’ubutaha mu ishoramari ryacu dushobora no kugura izindi modoka ziri muri iki cyiciro. Ni ishema kuri twe n’Igihugu kuba umushyitsi yarabonye imodoka nk’iriya iri ku rwego rwo hejuru.”

Uretse abanyacyubahiro izi modoka zikodeshwa no ku bandi babyifuza biganjemo abageni.

Mu rwego rwo gukomeza kugendana n’iterambere u Rwanda rugeraho no gufasha Abanyacyubahiro barusura kubona imodoka bagendamo, ubuyobozi bwa Premier Transport & Tour Services (PTS) buvuga ko bufite gahunda yo kugenda bugura izindi modoka zigezweho.

Iyi modoka niyo yatwaye Prince Charles ava ku Kibuga cy'Indege cya Kigali ndetse no mu zindi ngendo yakomereje mu gihugu
Iyi modoka ya BMW 750Li ifite ikoranabuhanga rihambaye
Iyi modoka ya BMW 750Li yagiye itwara abashyitsi batandukanye basuye u Rwanda
Igikomangoma n'umugore we batwawe muri BMW 750Li
BMW 750Li yageze bwa mbere mu Rwanda mu 2016
BMW 750Li yatwaye Prince Charles ni iya Premier Transport Services
BMW 750Li iri mu bwoko bw'imodoka ziciye bugufi (sedan)
Iyi modoka ifite camera zituma umuntu abasha gusubira inyuma adakoresheje retroviseur
Iyi modoka ifite umwihariko w'uko ikoresha vitesse umunani
BMW 750Li ifite imbere hagutse ku buryo abayirimo baba bisanzuye
Premier Transport & Tour Services (PTS) yatanze n'izindi modoka zifashishijwe muri CHOGM
Mu Rwanda hari BMW 750Li esheshatu
Kugeza ubu mu Rwanda hari Presidential buses ebyiri
Presidential bus iri mu zatwaye abashyitsi b'icyubahiro muri CHOGM
Iyi Presidential bus ifite imiterere yihariye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .