Ikusanyamakuru ryerekanye ko imiryango myinshi yazimye muri Jenoside yari ituye muri Zone Turquoise

Yanditswe na Habimana James
Kuya 27 Mutarama 2020 saa 03:06
Yasuwe :
0 0

Umuryango w’Abarokotse Jenoside barangije Amashuri Makuru na Kaminuza (GAERG), uritegura gusohora filime igaragaza uburyo mu miryango 15,593 yari irimo abantu 68,871 ikaza kuzima mu gihe cya cya Jenoside yakorewe Abatutsi, imyinshi yari ituye mu gace kari kazwi nka Zone Turquoise.

Uyu muryango ugaragaza ko imyinshi mu miryango yazimye mu gihe cya Jenoside, ari iyari ituye mu duce twagenzurwaga n’ingabo z’Abafaransa [Zone Turquoise], aho ingabo za FPR Inkotanyi, mu rugamba rwo kubohora u Rwanda zageze nyuma.

GAERG igaragaza ko muri iyi miryango 15,593 byemejwe ko yazimye burundu, imyinshi muri yo ari iyari ituye mu karere ka Karongi na Nyamagabe, utu ni uduce twari ahari Zone Turquoise.

Ku wa 22 Kamena 1994 nibwo Umuryango w’Abibumbye, ubisabwe n’u Bufaransa, wafashe umwanzuro Nimero 929 wemerera u Bufaransa kohereza ingabo zabwo mu Rwanda muri Opération Turquoise, hari mu gihe cya Jenoside yakorewe Abatutsi mu 1994.

Muri aka gace niho hari abari abayobozi bateguye bakanashyira mu bikorwa Jenoside yakorewe Abatutsi kimwe n’Interahamwe. U Bufaransa bwari bwarabakoreye agace k’ubuhungiro buberekeza muri Zaire, nyuma yo gutsindwa n’ingabo za FPR Inkotanyi.

Uyu muryango uvuga ko nko mu karere ka Karongi, imiryango 2839 yari ifite abantu 13371 yose yazimye mu gihe cya Jenoside.

Akandi karere kagize imiryango yazimye burundu ni Nyamagabe. Aha hari urwibutso rwa Jenoside rwa Murambi.

Aka agace gafite amateka akomeye agaragaza urwango ingabo z’Abafaransa zari zifitiye Abatutsi, kugeza n’aho zashyize ibibuga bya volleyball hejuru y’ibyobo byari birimo imibiri y’inzirakarengane, bagatangira kubikiniraho.

Muri Nyamagabe, imiryango 1535 irimo abantu 5790 bose barazimye.

Utundi turere ni Ruhango, Kicukiro na Gasabo.

Nko muri Kicukiro, hibukwa uburyo ingabo z’Ababiligi zasize Abatutsi, bagatsembwa n’Interahamwe muri ETO Kicukiro.

Uyu muryango uvuga ko bitandukanye n’uduce twa Zone Turquoise, aho ingabo za RPF-Inkotanyi zageze mu gihe cya Jenoside, hagaragara imibare mike y’imiryango yazimye.

Nko mu karere ka Nyagatare, hagaragara gusa umuryango umwe wazimye, mu karere ka Kayonza ni imiryango 71, muri Gatsibo 86. Muri iyi Ntara y’Iburasirazuba niho urugamba rwo kubohora igihugu rwatangiriye mu 1990.

Umunyamabanga Nshingwabikorwa wa GAERG, Fidèle Nsengiyaremye, yavuze ko iyi miryango yose yazimye itazagaragara muri iki gitabo, hazagaragazwamo 15.

Iyi miryango izaba iri mu byiciro 15 harimo abarimu, abanyapolitike, abakozi b’Imana, abanyamakuru, abaganga, abahinzi n’aborozi, abakinnyi n’abandi.

Nsengiyaremye yabwiye KT Press ko Komisiyo y’Igihugu yo kurwanya Jenoside, CNLG, yabafashije mu nzira zose zo gukusanya aya makuru, gusa agaragaza ko hakiri icyuho cy’ubushobozi.

Yagize ati “Ubu twamaze kubona miliyoni enye z’amafaranga y’u Rwanda, avuye mu banyamuryango bacu kugira ngo hakorwe iki gikorwa, ariko dukeneye ubundi bufasha ku bantu bose baba babyifuza, haba mu gihugu no mu mahanga.”

Ku ngengo y’imari ihwanye na miliyoni 64 FRW, uyu muryango uvuga ko bazakoresha miliyoni 34.5 FRW mu gushyira hanze iki gitabo gifite paje 140, na miliyoni 22.2 FRW zo gusohora filime.

Izindi miliyoni 7.5 FRW zashyizwe mu gukusanya imibare n’amakuru y’iyi miryango y’abantu bazimye.

Nubwo ubushobozi budahagije, uyu muryango uvuga ko uhamagararira buri wese kubigiramo uruhare no gusaba ko indi miryango yatangamo umusanzu.

Nsengiyaremye ati “Tuzahamagarira abafatanyabikorwa, aho bishoboka babe bahashyira nk’ikimenyetso cyangwa babe batera igiti, aho iyi miryango yari ituye.”

Yavuze ko iki gitabo gishobora gushyirwa ahagaragara mu mpera za Kamena uyu mwaka, nka kimwe mu gice cyo kwibuka Jenoside yakorewe Abatutsi.

Ingabo z'Abafaransa zishinjwa ko aho zari muri Zone Turquoise ari ho hari imiryango myinshi yazimye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .