00:00:00 IGIHE NETWORK KN KINYARWANDA EN ENGLISH FR FRANCAIS

RMB mu ihurizo ryo gusobanura iby’amabuye yoherejwe mu mahanga n’imanza yatsinzwe

Yanditswe na Kanamugire Emmanuel
Kuya 6 September 2022 saa 07:25
Yasuwe :

Ku nshuro ya mbere Ikigo Gishinzwe Mine, Peteroli na Gaz (RMB) cyitaba Komisiyo Ishinzwe Gukurikirana Imikoreshereze y’imari n’umutungo by’igihugu, PAC, cyasabwe kwisobanura ku makosa arimo ay’ikinyuranyo cy’amafaranga n’ingano y’amabuye y’agaciro yoherejwe mu mahanga.

Kuri iyi nshuro, PAC yatangiye kwakira ibigo bya leta, inzego n’imishinga byagaragayemo amakosa mu micungire y’umutungo nk’uko byagaragajwe na Raporo y’Umugenzuzi w’Imari y’umwaka w’ingengo y’imari wa 2020/2021.

Ibigo 85 ni byo bizitaba PAC aho inzego zirimo Minisiteri y’Ubutabera, Urw’Ubugenzacyaha n’Ubushinjacyaha Bukuru ziba zihagarariwe.

RMB iri mu bigo byakiriwe ku munsi wa mbere kuri uyu wa 5 Nzeri 2022. Iki kigo cyasabwe kwisobanura kuri toni 292 z’amabuye y’agaciro zifatwa nk’ikinyuranyo cy’ayoherejwe mu mahanga ugereranyije raporo yacyo n’iya Banki Nkuru y’Igihugu nk’uko byagaragajwe na Depite Bakundufite Christine.

Ati “Hari ikinyuranyo cy’amafaranga akatwa ku mabuye y’agaciro yoherezwa mu mahanga aho ubona ko hari ikinyuranyo cya toni 292 za gasegereti n’andi atandukanye ku buryo amafaranga BNR igaragaza aba ari macye ugereranyije n’ayo iki kigo kigaragaza.”

“BNR iravuga amafaranga yinjiye avuye mu mabuye akaba ari macye mwebwe mukagaragaza menshi. Nibajije ngo raporo BNR itanga nimwe muyibaha? Niba ari mwe muyibaha rero hakaba hari andi mabuye yiyongereyeho kuki mudahuza amakuru mwatanze? Ubu ibyo BNR yatangaje ntabwo ari byo kandi dufite ikibazo ku mafaraanga yinjira mu gihugu mu madolari tuba tugaragaza macye. Ibi byo uzabikosora ni nde?”

Umuyobozi ushinzwe imari muri RMB, Safari Innocent, yavuze ko amafaranga akatwa ku mabuye y’agaciro mu gihe cyo kuyaha ibyemezo biyemerera kohereza hanze y’igihugu.

Ngo birashoboka ko amabuye yahabwa icyangombwa ariko nyirayo agatinda kuyohereza ku isoko bitewe n’impamvu zirimo igabanuka ry’ibiciro ari naho ikinyuranyo gishobora guturuka nko mu gihe byakozwe mu mwaka w’ingengo y’imari utandukanye n’uwo ibyemezo bayatangiwemo.

Yakomeje agira ati “Icyo nakwemera ni uko tugomba kugerageza uko dushoboye tugashaka uko twakwicara nk’inzego eshatu, BNR, RRA na RMB tugashaka uko twahuza imibare.”

Umugenzuzi Mukuru w’Imari ya Leta, Kamuhire Alexis, yavuze ko RMB iramutse itanga raporo y’umutungo buri kwezi kandi igahuza amakuru ajyanye n’imisoro, amabuye y’agaciro ahabwa ibyangombwa n’ibyo muri BNR, ibinyuranyo byavaho kandi byanabaho bakaba bazi inkomoko yabyo.

Ati “Muri iyi raporo icyo bivuze ni uko ibyo binyuranyo mutazi aho byaturutse.”
Amabuye y’agaciro aboneka mu Rwanda arimo ayo mu bwoko bwa Gasegereti, Coltan, Wolfram na Zahabu. Mu mwaka wa 2021 ubucukuzi bw’amabuye y’agaciro bwinjirije u Rwanda asaga miliyoni 500 z’amadolari.

Amb. Karitanyi yari kumwe n'abandi bayobozi muri RMB barimo umuyobozi ushinzwe imari, Safari Innocent (iburyo) n'Umuyobozi Mukuru Wungirije, Dr Ivan Twagirashema (ibumoso) bwe

Gutsindwa imanza z’abakozi basezerewe mu kazi…

RMB yaciwe miliyoni 29,6 z’amafaranga y’u Rwanda kubera gutinda kumenyekanisha no kwishyura imisoro.

Umuyobozi ushinzwe imari muri RMB, Safari Innocent, yavuze ko bakoze imenyekanisha ndetse bakishyurira imisoro ku gihe ariko RRA igaragaza ko amafaranga yageze kuri konti zayo akerewe. Ibiganiro hagati y’inzego zombi byaratangiye ariko abadepite bibajije impamvu byamaze imyaka ine nta musaruro bitanze.

RMB kandi yaciwe miliyoni 19 z’amafaranga y’u Rwanda kubera imanza yatsinzwe bitewe no kudatanga ‘Icyemezo cy’imirimo yakozwe’ ku bakozi 17 basezerewe bahoze bakorera Ikigo cy’Igihugu cy’Umutungo kamere (Rwanda National Ressources Authority).

Abakozi 19 ni bo bari bakuwe mu bagera ku 100 barasezererwa. Babiri ngo bumvikanye na RMB bakemura ikibazo bitanyuze mu nkiko aho umwe yahawe miliyoni zisaga enye naho undi ahabwa arenga miliyoni imwe y’amafaranga y’u Rwanda.

Kwemera amakosa

Mu bindi bibazo harimo amasezerano y’isoko rya miliyari 1,7 Frw ryo kubaka laboratwari ya RMB i Kanombe yaje kongerwa akagirwa miliyari 2,1 Frw.

Aho kugira ngo RMB ifatire 10% y’ingwate nk’uko biteganywa n’amategeko ngo yafatiriye 8% gusa. Ikinyuranyo cya 2% gihwanye na miliyoni 35 z’amafaranga y’u Rwanda atarigeze akatwa rwiyemezamirimo.

Mu bijyanye no gushyira abakozi mu myanya, RMB yanenzwe kutubahiriza ibiteganywa n’iteka rya Minisitiri w’Abakozi ba leta n’umurimo aho yahaye akazi abagore babiri ndetse ikabagenera umushahara ntacyo ishingiyeho.

Safari Innocent ati “Bari abakozi b’inzobere mu bya laboratwari. Ni abagore babiri bakoraga muri Afurika y’Epfo tuza kumenya ko bakora mu bya laboratwari kandi bafite inararibonye. Twabazanye muri gahunda dufitanye na Minisiteri y’Umurimo yo guha akazi abantu bafite ubumenyi budapfa kuboneka ku bantu benshi.”

“Icyo nemera ku bijyanye n’umushahara ntabwo twabajije MIFOTRA, turabisabira imbabazi. Icyabaye ni uko twumvikana imishahara, umwe ufite PhD twemeranyijwe ibihumbi 800 Frw, mugenzi we ufite Masters tumuha ibihumbi 600 Frw.”

Depite Mutesi Anitha, yavuze ko amakosa nk’ayo agaragaza ko hari ikibazo mu mikorere ya RMB cyakemuka ari uko abakozi bahawe amahugurwa.

Ati “Ibi bintu birantangaje ariko ubwo amakosa bari kuyiyemerera ngira ngo wagombye [umuyobozi mukuru] kureba icyo gukora niba ari amahugurwa ku bakozi ukayatanga kugira ngo ikigo kigende neza.”

Visi Perezida wa PAC, Uwineza Beline yavuze ko hari amakosa abayobozi ba RMB bagaragaza ko ari mato ariko adakwiye kuba akigaragara muri raporo z’ibigo nka cyo.

Ikindi kibazo cyakuruye impaka ni umushinga RMB yakoranye n’Umushinga w’Abadage wita ku iterambere (GIZ) ufite agaciro ka miliyoni zirenga 900 z’amafaranga y’u Rwanda ariko ubwo iki kigo cyakorerwaga igenzura nta nyandiko zagaragaye zisobanura iby’ikoreshwa ry’ayo mafaranga.

Na none hari amafaranga agera kuri miliyoni 370 yatanzwe ku modoka ariko zikaba zidakoreshwa ndetse n’imyenda igera kuri miliyoni 74 akomoka mu cyahoze ari ikigo cy’umutungo kamere, RMB itabashije kugaruza.

Umuyobozi Mukuru wa RMB, Ambasaderi Yamina Karitanyi yemeye amakosa bagaragarijwe na PAC anahamya ko bishoboka ko yakosorwa.

Ati “Ibibazo birahari ariko ntabwo ari ibidahobora gukemurwa. Tugomba kubyemera aho gutsimbarara. Reka twemere ko tugomba kugenda tukanoza imikorere yacu, ni byo nasaba ko mwakwemera. Ibyihutirwa dusabwa gukora nk’ikigo turabizi, nta cyatubuza gukora neza.”

Umuyobozi Mukuru w'Ikigo Gishinzwe Mine, Peteroli na Gaz, Amb. Yamina Karitanyi yemeye amakosa bagaragarijwe yiyemeza ko bagiye guhindura imikorere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .