Ikigo Ndangamuco cy’Abafaransa mu Rwanda kigiye kubakwa hafi ya Kigali Convention Centre

Yanditswe na Twarabanye Venuste
Kuya 16 Gashyantare 2020 saa 09:50
Yasuwe :
0 0

Umuyobozi w’Ibikorwa bya Ambasade y’u Bufaransa mu Rwanda (Chargé d’Affaires), Jérémie Blin yatangaje ko Ikigo ndangamuco cy’Abafaransa (Centre Culturel Français) kizubakwa iruhande rwa Kigali Convention Centre kikazafungurwa mu Ukwakira 2020.

Jérémie Blin yabitangaje ku mugoroba wo ku itariki 13 Gashyantare 2020 ubwo yakiraga Umujyanama mushya mu by’umuco, Juliette Bigot.

Blin yabwiye Rwanda News Agency ko yishimiye gukora ku mushinga wo kubaka icyo kigo nyuma y’amezi atandatu ageze mu Rwanda.

Ati “Ubu tugeze mu cyiciro cyo gutangira ibikorwa kuko ubu bari gutoranya rwiyemezamirimo uzakurikirana imirimo yo kucyubaka. Turi gutunganya ahazubakwa Ikigo ndangamuco Kimihurura iruhande rwa Convention Centre. Intego yacu ni uko cyafungurwa mu Ukwakira.”

Jérémie Blin yavuze ko ari ikigo bamaze kubonera ubutaka buhagije bazubakaho inyubako ebyiri nini. Imwe izaba igizwe n’ibiro by’abagishinzwe n’ibijyanye n’Indimi ikindi kizaba kirimo ahakorerwa imurikabikorwa rishingiye ku muco, inama ndetse n’ibijyanye n’itangazamakuru.

Icyo kigo kizaba gifite igice cyisanzuye biteganyijwe ko hazajya habera ibitaramo n’imyidagaduro itandukanye. Byitezwe ko kizaba ari ikigo giha urubyiruko uburyo bwose bwo kwiga ururimi rw’Igifaransa, n’abanyabugeni b’abanyarwanda hakababera ahantu ho kwitoreza no guteza imbere umwuga wabo.

Mbere yo gufungura icyo kigo, Jérémie Blin yavuze ko bagiye kurushaho kugaragara mu bikorwa byerekeye umuco, aho bazatera inkunga igitaramo cy’Itsinda ry’Abanya-sénégal ryitwa ‘Daara J Family’ kizabera muri Kigali Cultural Village ku itariki 22 Gashyantare 2020.

Ati “Tuzanashyigikira filimi "Petit Pays" ishingiye ku gitabo cya Gaël Faye izerekanwa bwa mbere ku itariki z7 Werurwe. Hari igitaramo cya Ivan Buravan tugiye gutegura muri Werurwe ku itariki 20. Muri uko kwezi dufite ibikorwa byinshi tuzakorana na za Ambasade zo mu bihugu bivuga Igifaransa.”

Inyubako y’Ikigo ndangamuco cy’Abafaransa yitwaga, Centre D’Echanges Culturels Franco-Rwandaisyari iherereye iruhande rwa rond-point nini yo mu Mujyi wa Kigali rwagati ku ruhande rugana mu Kiyovu, yafunzwe ndetse isenywa mu 2014 n’ubuyobozi bw’Umujyi wa Kigali bwavuze ko ubutaka bw’aho yari iherereye butakoreshwaga neza ndetse iyo nyubako itari ikitajyanye n’imyubakire ihagenewe.

Ifungwa n’isenywa ry’iyi nyubako ni igikorwa bamwe bahuje n’umubano utari wifashe neza hagati y’u Rwanda n’u Bufaransa nk’uko byagenze kuva nyuma ya Jenoside yakorewe Abatutsi, ariko ubuyobozi bw’Umujyi wa Kigali bwagaragaje ko impamvu zashingiweho ntaho zihuriye na Politiki.

Iyi nyubako mbere yo gusenywa yari irimo isomero ryagutse ndetse yakiraga ibindi bikorwa birimo kwigisha Igifaransa, amahugurwa ku byerekeye umuco, ibitaramo byoroheje n’ibindi.

Ikigo ndangamuco cy’Abafaransa kigiye kongera kubakwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza