Ikiganiro cyihariye na Faustin Kagame, umuhanga mu mateka, inararibonye akaba n’inzu y’ibitabo

Yanditswe na Karirima A. Ngarambe
Kuya 22 Ugushyingo 2019 saa 12:08
Yasuwe :
0 0

Yabonye igihugu mu mfuruka zose, ibyiza n’ibibi, arwana intambara zinyuranye byose abisohokamo gitwari. Faustin Kagame ni umwe mu basigasira amateka y’u Rwanda, dore ko mu myaka 72 amaze ku Isi yabashije kwibonera iki gihugu mu bihe bibi n’ibyiza cyanyuzemo, abirebesha ijisho-musesenguzi ridasanzwe.

Faustin Kagame ni inararibonye y’umwanditsi, umunyamakuru ndetse n’umusesenguzi, umwe mu bahanga u Rwanda rwagize kugeza ubu.

- Yageze mu Rwanda akubitana n’ibihe bibi, iyicwa ry’Abatutsi mu 1964 ryagejeje kuri Jenoside yabakorewe mu 1994.

- Yamenyekanishije ibihe bibi u Rwanda rwanyuragamo binyuze mu nkuru zicukumbuye mu gihe cya Jenoside yakorerwaga Abatutsi mu 1994.

- Yabaye umunyamakuru wa mbere waganiriye na Perezida Kagame, ubu ni Umujyanama we.

Faustin Kagame afatwa nk’inzu y’ibitabo ibitse amateka y’igihugu kuva mu myaka yo hambere. Ni umugabo ufite ubumenyi bwihariye ku bijyanye n’amateka agaragaza ibihe by’ingenzi igihugu cyanyuzemo mbere na nyuma ya Jenoside yakorewe Abatutsi mu 1994 yahitanye ubuzima bw’inzirakarengane zisaga miliyoni.

Yavukiye ahitwa Gacaca mu yahoze ari Perefegitura ya Ruhengeli (ubu ni muri Musanze) muri Gashyantare 1947. Ubu ni Umujyanama mu Biro by’Umukuru w’Igihugu mu bijyanye n’Itangazamakuru n’Itumanaho.

Ku myaka 11 yavuye mu Ruhengeli ajya kwiga muri Institut Charles Lwanga (mu mashuri y’ibanze) muri Astrida y’icyo gihe, ari naho yakoreye ikizamini cyamuhesheje uburenganzira bwo kwiga amashuri yisumbuye muri Groupe Scolaire i Butare bakunze kwita "Indatwa".

Kagame Faustin yaje kwisanga i Bujumbura mu buhunzi aho yanarangirije amashuri yisumbuye mu 1965. Yakomereje amashuri ye hirya no hino nko mu Mujyi wa Moscow aho yamaze imyaka ibiri muri kaminuza, yanize mu Bubiligi ibijyanye n’Ubumenyi bw’ibiba mu nda y’Isi (Géologie).

Yahavuye ajya gukora mu Bujumbura mbere yo kwerekeza mu Busuwisi, ari naho yahuriye n’umugore we Josépha Kagame bakarushinga.

Mu kiganiro cyihariye yahaye IGIHE, yavuze uburyo mu kubyiruka kwe yibuka uko Abatutsi batangiye gutotezwa, abireba n’amaso.

Yibuka neza mu 1964 ari mu biruhuko i Nyamata kwa bene wabo, ubwo Abanyarwanda bari barameneshejwe mu gihugu bagabaga igitero cya mbere, maze ubutegetsi bukica Abatutsi benshi bari mu gihugu.

Muri iyo myaka nibwo Abanyarwanda benshi bo mu bwoko bw’Abatutsi batangiye kumeneshwa barahunga.

Ati “Sinzi niba nabyita amahirwe cyangwa ibyago kuko ibihe bibiri (1964 – iyicwa n’itwikirwa ryo mu Bugesera na rurangiza ya 1994 ku Batutsi bicwaga) bikomeye by’ubwicanyi nabibonye n’amaso bimfasha kugira icyo mbivugaho.”

Iyo agaruka ku mateka yaranze u Rwanda, abara inkuru nk’ibintu byabaye ejo bundi, kandi mu mvugo yakumvwa n’uwo ariwe wese, bigaragaza ubuhanga bwe mu mateka.

- Uko Faustin Kagame yagiye ku rugamba

Mu 1986 nibwo Faustin Kagame yahuye bwa mbere na bamwe mu bayoboye urugamba rwo kubohora igihugu barimo Fred Gisa Rwigema, Paul Kagame n’abandi i Kampala. Icyo gihe NRA ya Museveni yari imaze gufata Uganda.

Yakomeje ati “Icyo gihe namenye neza ibyo barimo bategura byo gutaha mu Rwanda. Nasubiye mu Busuwisi nza kugaruka urugamba rutangiye mu 1991 ari nabwo nabaye Umunyamabanga wa Perezida wa FPR-Inkotanyi, Colonel Alexis Kanyarengwe. Kanyarengwe yari umuntu mukuru utuje, uvuga make, wasangaga n’abandi bose bamwubaha.’’

“Ibintu ni igitangaza koko burya iwanyu haba ari iwanyu, Col. Kanyarengwe twakoranye neza cyane kuko twagiranaga urwenya rw’aho dukomoka mu Burera, ugasanga tuganira kuri byinshi, akishima kuko yari azi n’ababyeyi banjye nanjye nkamenya aho akomoka bikatworohereza akazi gakomeye twariho.”

Faustin Kagame akigera mu Nkotanyi zari mu rugamba rwo kubohora igihugu, yavuze ko hari byinshi byamutangaje birimo n’uburyo bari abantu bacisha make.

Ati “Natangajwe cyane n’ukuntu hari ikintu cyo gucisha make, kuvuga make no kujya inama. N’iyo ikintu cyamara igihe ariko cyagombaga kuganirwaho kikabonerwa igisubizo cyumvikanyweho. Ibi ni bimwe mu mbaraga nabonye ku rugamba.’’

Atanga urugero ku ibaruwa yanditswe ikamara iminsi itarasohoka itegereje ko bose bayiganiraho igasinywa ikabona kugenda nyuma y’igihe kirenze icyumweru.

Ati “Hari n’igihe yasinywaga turi mu Birunga, abazungu bayibona twanditseho tariki …., Ruhengeli, bati ‘aba bantu bariyemera ntabwo bari mu Ruhengeli’, kandi rwose niho twabaga turi.”

Faustin Kagame ni Umujyanama mu Biro by’Umukuru w’Igihugu mu bijyanye n’Itangazamakuru n’Itumanaho

- Faustin Kagame mu itangazamakuru

Uyu mugabo ku wa 2 Mata 1994 nibwo yageze mu Ngoro y’Inteko Ishinga Amategeko iri ku Kimihurura [CND] ahari hakambitse ingabo 600 za FPR Inkotanyi nk’uko byari bikubiye mu masezerano ya Arusha y’isaranganya mu ngabo.

Yagiyeyo agiye gutara amakuru, urugamba ruhamusanga gutyo. Ati “Icyo gihe nakoreraga ikinyamakuru cyo mu Busuwisi cyitwa Hebdo. Hagati mu kwezi kwa Gicurasi nibwo natangiye.’’

Muri icyo gihe nk’umwe mu bantu bari basobanukiwe iby’itangazamakuru yahanganaga n’uwageragezaga kurikoresha mu buryo bugamije kubiba urwango mu Banyarwanda.

Ati ‘‘Ikindi ntazibagirwa ni urubanza nagiranye na Fondation Hirondelle, ndwanya ko bakora radiyo ngo itagira aho ibogamira ‘neutre’ mu gihe cya Jenoside yakorerwaga Abatutsi. Nababwiraga nti ni hagati ya nde na nde? Kutabogama hagati y’uwica n’uwicwa ntibibaho. Namaze igihe kinini ndi mu rubanza ariko tuza gutsinda mbifashijwemo n’abo twabyumvaga kimwe.’’

Faustin Kagame ni we munyamakuru wahagaze avuga ashize amanga ku byatangajwe tariki ya 3 Mata 1994 na RTLM ko ngo hazaba akantu tariki ya 3 Mata 1994.

Ati ‘‘Ninjye wafashe ayo majwi usanga hirya no hino. Mu mpera za Mata 1994, nasubiye mu Busuwisi, njyanye amakuru y’ibyaberaga mu Rwanda nk’uko byari biteganyijwe.’’

Yongeye kugaruka mu Rwanda aho yanagize uruhare mu itangizwa rya Radio yigenga ya Contact FM ayibera Umwanditsi Mukuru.

Umwuga w’Itangazamakuru ry’u Rwanda awufitemo amateka yihariye kuko ni we wabaye umunyamakuru wa mbere wagiranye ikiganiro na Perezida Paul Kagame. Izina rye kandi ryashinze imizi binyuze mu nyandiko yanditse muri Jeune Afrique n’izindi zitandukanye.

Inganzo akoresha mu kwandika iyo muganiriye byimbitse usanga ariyo mu muryango nubwo we yicisha bugufi mu byo avuga n’ibyo akora n’uburyo abaho.

Kagame Faustin ni umwe mu bantu babaye hafi Padiri Kagame kuko ari n’uwo mu muryango we, iyo amuvuga usanga havamo igitabo cyihariye wenda ibi bizagarukwaho mu buryo bwimbitse nk’uko twabyemeranyijwe

Avuga ku rwibutso amufiteho, yagize ati “Yari umuntu wemera ariko agashyira imbere n’imyemerere y’Abanyarwanda, hari bimwe atemeranywaga n’abazungu bazanye amadini.’’

Faustin Kagame avuga ko ubwiyunge bw’Abanyarwanda ari kimwe mu bintu by’agatangaza u Rwanda rwabashije kugeraho, aho anabihuza n’ubuzima bwe bwite iyo ageze ku ivuko mu Ntara y’Amajyaruguru.

Ati “Iyo tugarutse mu turere twa kavukire twakirwa, usanga abaturage bakwereka isambu y’iwanyu, bishimiye kubagarukamo, iyo ngiye mu Ruhengeli ku ivuko ntangazwa n’ukuntu nakirwa nkisanga.”

Kagame Faustin ni umugabo w’igihagararo, w’ibitekerezo byagutse, ufite ubunararibonye mu ngeri zitandukanye z’ubuzima kuva kuri Politiki, Ubuhanzi, ubwanditsi bw’ibitabo, Ubuvanganzo n’ibindi.

Umugabo w’Imfura nk’uko ijambo ubwabyo ribisobanuye utagiye kure, ucisha make, iyo muganira musa nk’aho mureshya kubera uko akwakira n’uburyo agutega amatwi akagusubiza nk’uko bikwiye kandi ukumva.

Faustin Kagame ni umuhanga mu mateka, inararibonye akaba n’inzu y’ibitabo y'u Rwanda
Faustin Kagame akunda gusabana n'abana b'abaturanyi iyo ari mu Rwanda
Faustin Kagame ari kumwe n'Umunyamakuru Karirima A. Ngarambe mu rugo rwe mu Busuwisi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza