00:00:00 IGIHE NETWORK KN KINYARWANDA EN ENGLISH FR FRANCAIS

Ikawa ya Bwishaza i Rutsiro yahize izindi muri Afurika

Yanditswe na Mukahirwa Diane
Kuya 10 June 2022 saa 10:23
Yasuwe :

Ikawa ya Koperative Bwishaza yo mu Karere ka Rutsiro, yegukanye umwanya wa mbere n’uwa kabiri mu bihembo bya “Kombe la dhahabu”, bitoranyirizwamo inziza muri Afurika mu kugira icyanga.

Ibi bihembo bitegurwa n’Ikigo Fairtrade Africa, bigamije kumenyekanisha ikawa yo ku Mugabane wa Afurika ku ruhando mpuzamahanga. Kuri iyi nshuro u Rwanda rwari ruhatanye na Repubulika Iharanira Demokarasi ya Congo n’u Burundi.

Handikishijwe ikawa 38 hatoranywamo icumi zahize izindi mu birimo ubwiza n’uburyohe nyuma haza gutoranywa izindi eshatu zahize izindi. Aha ni ho iya Bwishaza yegukanye imyanya ibiri, umwanya wa gatatu utsindirwa n’Ikawa ya Koperative Abateraninkunga ba Sholi yo mu Karere ka Muhanga.

Abahawe ibi bihembo bazafashwa kumenyekanisha ikawa yabo ku ruhando mpuzamahanga no guhuzwa n’abashoramari batandukanye ku Isi no kwitabira amamurikagurisha akomeye.

Ikawa ya Bwishaza yegukanye imyanya ibiri ihingwa n’abahinzi 532 bishyize hamwe kugira ngo babone uko bongera ubwiza n’ubwinshi bwayo ndetse babashe kuyishakira isoko.

Umuyobozi wa Koperative Bwishaza, Imanikuzwe Josué, yavuze ko kimwe mu byatumye begukana ibi bihembo ari uko bita ku ikawa kuva mu ihingwa kugeza mu isarura.

Ati “Ikawa yacu tuyitunganya kuva tuyihinga kandi tugendera ku bihe byo guhinga neza, n’iyo imaze kwera tuyitunganya twigengesereye kandi natwe tukabasha kuyisogongera ngo twumve icyanga ifite, kandi abanyamuryango bayigeze ku ruganda ku gihe.”

Yakomeje avuga ko biteze ko ibi bihembo bizazamura uburyo ikawa yabo yari isanzwe yoherezwa muri Koreya cyane.

Ati “Kuva koperative yacu yabaho ntabwo tujya dukora ngo duhombe, tugenda tuzamuka. Ibi bihembo bizatuma tubona isoko ryiza wa muhinzi atangire kugenda yishimye kuko azaba yabonye inyungu nyinshi.”

Umucungamutungo wa Koperative Abaterankunga ba Sholi, yegukanye umwanya wa gatatu, Nshimiye Aimable, yegukanye umwanya wa kabiri yavuze ko icyo bashyize imbere ari ukugira ngo barebe aho uburyohe bwa kawa buturuka.

Ati “Ntabwo twishimiye cyane itsinzi y’umwaka ushize ahubwo twatekereje uko twagumya mu myanya ya mbere, turushaho kwegera abahinzi ngo tumenye aho uburyohe bw’ikawa buturuka, niho twitaye kumenya.”

Ku ruhande rw’Umuyobozi Ushinzwe ikawa muri Fairtrade Africa, Faith Muthoni, yavuze ko abatsindiye ibi bihembo bagiye guhabwa amahirwe azamenyekanisha ikawa yabo hirya no hino.

Ati “Abatsinze aya marushanwa tuzabafasha mu kumenyekanisha ikawa yabo ku ruhando mpuzamahanga ndetse zijyanywe no mu marikagurisha akomeye hari irizabera mu Butaliyani na Koreya vuba aha tuzajyanayo ikawa zabo.”

Yakomeje avuga ko n’abatabonye ibihembo uyu ari umwanya mwiza wo kujya kwisuzuma bakamenya ibyo bakwiye kongera kandi ko amahirwe ataha ari ayabo.

Mu Rwanda kugeza ubu habariwa abahinzi b’ikawa 355 771, aba bakaba biganjemo igitsina gabo kuko bihariye 68%, abagore bakaba bangana na 32%.

Ikawa iri mu bihingwa byinjiriza igihugu agatubutse. Muri Nzeri umwaka ushize, Ikigo cy’Igihugu gishinzwe guteza imbere Iyoherezwa mu mahanga ry’Ibikomoka ku Buhinzi n’Ubworozi, NAEB, cyatangaje ko mu 2020/21, u Rwanda rwohereje mu mahanga ibilo miliyoni 16,8 by’ikawa byinjije asaga miliyoni 61,5$, ni ukuvuga ko ari miliyari 62.2Frw.

Aya mafaranga yiyongereyeho 1,83% ugereranyije na miliyoni 60,4$, zinjijwe mu bilo miliyoni 19,7 by’ikawa byoherejwe mu mahanga mu mwaka wabanje.

Kugira ngo ikawa itsinde ibanza gusogongerwa n'abantu batandukanye
Ikawa ihize izindi mu cyanga no mu bwiza niyo itsinda
Iyi gahunda yitabirwa n'inganda zitandukanye zitunganya ikawa
Mu bihembo bitatu Bwishaza yegukanye bibiri
Umuyobozi wa Koperative Bwishaza, Imanikuzwe Josué, yavuze ko kimwe mu byatumye begukana ibi bihembo ari uko bita ku ikawa kuva mu ihingwa kugeza mu isarura.
Abatsinze bishimiye kuba hafatwa umwanya bagashimira inganda zitunganya ikawa nziza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .