Ikarita y’itora ntizongera kwifashishwa mu matora mu Rwanda

Yanditswe na Habimana James
Kuya 22 Nyakanga 2019 saa 08:54
Yasuwe :
0 0

Umutwe w’Abadepite wemeje Itegeko ngenga rigenga amatora mu Rwanda, aho ikarita y’itora yavanyweho igasimbuzwa indangamuntu ikoze mu ikoranabuhanga.

Ikoranabuhanga ryo kuri iyi ndangamuntu rishobora gutuma hamenyekana ko utora cyangwa utorwa ari kuri lisiti y’itora bityo iyo karita ikaba itagikenewe Rwanda.

Ubwo hatorwaga iri tegeko kuri uyu wa Mbere, hatangajwe ko izindi ngingo zavuguruwe harimo ibijyanye n’imigendekere y’amatora ku bajyanama b’Umujyi wa Kigali hakurikijwe amavugururwa ateganyijwe n’ibindi.

Ku bijyanye n’ikoreshwa ry’ikarita y’itora, Depite Rubagumya Furaha Emma uyobora Komisiyo ya Politiki, Uburinganire n’Ubwuzuzanye bw’Abagabo n’Abagore mu Iterambere ry’Igihugu yagize ati “Ikarita y’itora yari kimwe mu bisabwa abatora n’abasabwa kandidatire ariko twifuje kumenya niba koko ikoranabuhanga twamaze kugeraho ikarita y’itora yaba ikiri ngombwa, twasanze akamaro kayo nyamukuru ari uguhamya ko utora ari kuri lisiti y’itora cyangwa se yamaze gutora.”

Yakomeje agira ati “Tumaze kungurana ibitekerezo twasanze ikarita y’itora atari ngombwa kabone niyo yaba idahari, ni muri urwo rwego twavanye muri uyu mushinga w’itegeko ngenga ibijyanye n’ikarita y’itora mu bice byose byari birimo”.

Izindi ngingo abadepite bifuje ko zavugururwa ariko ntibikunde, harimo ijyanye n’abantu basabwa ku mukandida ushaka kwiyamamariza kuba Perezida wa Repubulika cyangwa umudepite, aho umukandida wigenga asabwa abantu 600 mu gihugu bamusinyiye, naho umutwe wa politike wo ugasabwa abantu 200 gusa.

Depite Frank Habineza yagize ati “Abakandida bigenga basabwa abantu 12 muri buri karere, naho umutwe wa Politike wo ugasabwa abantu 200 mu gihugu cyose, ko umutwe wa politike ariwo ukomeye kurusha umukandida wigenga kubera iki umukandida wigenga udafite ubushobozi nk’umwute wa Politike bamusaba abantu 600 mu gihugu?, twumva hari ikintu cyakagombye guhinduka kugira ngo abo bantu nabo bagire amahirwe yo kwiyamamaza”.

Minisitiri w’ubutegetsi bw’igihugu Prof Shyaka Anastase wari witabiriye inteko rusange, yavuze ko bitakumvikana uburyo umuntu ushaka guhagararira abantu miliyoni 12 mu gihugu, yabura abantu 600.

Yavuze ko uramutse wabuze abantu 12 kandi ushaka guhagararira miliyoni 12, cyaba ari ikibazo.

Abadepite bemeje ko indangamuntu isimbura ikarita y'itora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza