Ijoro ribara uwariraye: Abarokotse Jenoside banditse ‘Amakayi y’Urwibutso’ akubiyemo ubuhamya bwabo

Yanditswe na Ferdinand Maniraguha
Kuya 10 Nyakanga 2019 saa 09:48
Yasuwe :
0 0

Ku mugoroba wo kuwa 7 Mata 2014, imyaka 20 yari yuzuye Jenoside yakorewe Abatutsi ibaye.

Kuri uwo munsi Umufaransakazi Florence Prudhomme yahurije hamwe bamwe mu bapfakazi, incike n’impfubyi za Jenoside batujwe mu mudugudu wa AVEGA ku Kimironko mu Mujyi wa Kigali, abaganiriza ku kamaro ko kwandika.

Prudhomme ni umuyobozi w’Umuryango utegamiye kuri Leta, Rwanda Avenir yashinze mu 2004 ugamije gufasha abarokotse Jenoside, by’umwihariko abapfakazi kongera kwiyubaka.

Uwo mugoroba Prudhomme yababwiye ko bakwiriye kwandika amateka yabo, niba bifuza ko ibyababayeho bimenyekana bikaba isomo ku bazavuka nyuma.

Nk’umuntu ukomoka mu Bufaransa, igihugu cyagize uruhare mu gushyigikira Leta yateguye ikanashyira mu bikorwa Jenoside ndetse nyuma kikakira benshi mu bakekwaho uruhare muri ayo mahano, Prudhomme yabwiye abarokotse ko nibatandika amateka yabo, abandi bazakomeza kuyandika uko bashatse, barimo n’abahakana ko Jenoside itabaye.

Byatwaye akanya ngo bose babyumve ariko bageze aho barabyumva.

Batangiye bandika mu makayi ibyo bibuka banyuzemo nyuma ya Jenoside, ayo makayi niyo yavuyemo igitabo “ Cahiers de mémoire” kiri mu rurimi rw’Igifaransa, n’“Amakayi y’Urwibutso” kiri mu Kinyarwanda.

Mu muhango wo kumurika ibyo bitabo bibumbatiye ubuhamya bw’ibyo abarokotse Jenoside babayemo wabaye ku mugoroba wo kuri uyu wa Kabiri mu Isomero ry’Igihugu ku Kacyiru mu Mujyi wa Kigali, Prudhomme yavuze ko nta we ushobora kuvuga amateka ya Jenoside kurusha uwayirokotse.

Yagize ati “Abacitse ku icumi nibo bashobora kuvuga amateka y’ibyabayeho. Kwandika bibafasha kwiyubaka no kurwanya abahakana n’abapfobya Jenoside yakorewe Abatutsi.”

Nk’uwamaranye imyaka ine n’abarokotse Jenoside ubwo bandikaga amakayi yabo y’urwibutso, Prudhomme avuga ko byabafashije kongera kwibuka no guha icyubahiro ababo bishwe.

Ati “Aya makayi y’urwibutso yafashije abacitse ku icumu kongera kwiyibuka. Byatangiye buri wese yandika ku giti cye birangira bahurije hamwe. Babifata nk’umwanya wo kwibuka ababo bari barabuze.”

Mukagihana Martha, ni umwe mu bapfakazi barokotse Jenoside banditse amateka yabo mu ‘Makayi y’Urwibutso’.

Kwandika ibyo yabayemo mu minsi ijana ya Jenoside na mbere yaho, asanga ari nko kwivura.

Ati “Iyo umuntu ameze nabi mu gifu, cya gihe aba afite isesemi iyo arutse nibwo aruhuka. Natwe twabikoze tugira ngo bituvemo tubohoke kandi turwanye abashaka kwandika amateka ya Jenoside batarayabayemo.”

Mudahogora Ernestine Jenoside yabaye ari muto cyane. Umuryango we wose warishwe asigara wenyine, yirera.

Ni umwe mu mpfubyi zatujwe mu mudugudu wa AVEGA. Yavuze ko kuba yaranditse amateka y’ibyo yibuka muri Jenoside, ari agaciro gakomeye ku bo yabuze.

Ati “Kwandika byamfashije kumva ndi kumwe n’ababyeyi banjye ndetse n’abavandimwe nabuze. Aba babyeyi tubana nabo bambereye ababyeyi. Basannye umutima wanjye numva ntari njyenyine, bingarurira icyizere cy’ubuzima.”

Umunyamabanga Nshingwabikorwa wa Komisiyo y’Igihugu yo kurwanya Jenoside, (CNLG) Dr Bizimana Jean Damascène, yashimye ubutwari abarokotse Jenoside bagaragaje bandika ‘ Amakayi y’Urwibutso’.

Bizimana yavuze ko ari indi ntwaro mu guhashya no kurwanya abahakana n’abapfobya Jenoside yakorewe Abatutsi.

Ati “Jenoside yose iyo irangiye igira abakomeza kuyica. Igira abica urwibutso rwayo. Ubu buhamya bwanyu bufite akamaro mu gucecekesha no kubuza amahoro abo bicanyi b’urwibutso kuko ni benshi kandi bahindura isura.”

CNLG yiyemeje gutanga ubufasha no gukora ubuvugizi kugira ngo n’ubundi buhamya bw’abacitse ku icumu bukomeze kwandikwa no kubungabungwa neza.

Igitabo “Amakayi y’Urwibutso” kiboneka mu nzu zigurisha ibitabo n’amasomero atandukanye mu Mujyi wa Kigali.

Abantu b'ingeri zitandukanye bitabiriye umuhango wo kumurika igitabo 'Amakayi y'Urwibutso'
Abapfakajwe na Jenoside bavuga ko kwandika byabafashije gukira ibikomere
Urubyiruko rwavuze ko kumva ubuhamya bw'ababyeyi barokotse Jenoside bibubakamo umutima w'ubutwari
Mudahogora Ernestine nk'umwe mu bagizwe impfubyi na Jenoside ahamya ko kwandika byamufashije kwibuka abe bishwe
Abitabiriye umuhango wo kumurika iki gitabo basobanuriwe ko kwandika ari uguhashya abahakana Jenoside yakorewe Abatutsi
Florence Prudhomme (ibumoso) ni we washishikarije abarokotse kwandika amateka yabo
Umunyamabanga Nshingwabikorwa wa RALC, Vuningoma James yavuze ko igitabo 'Amakayi y'Urwibutso' ari umusanzu ukomeye ku bwanditsi n'umuco by'u Rwanda
Perezida w'inama y'ubutegetsi ya CNLG, Dr Emmanuel Havugimana yavuze ko igitabo 'Amakayi y'Urwibutso' ari umukoro ku barokotse Jenoside bafite ubundi buhamya
Antoine Mugesera wahoze ari senateri yashimye igikorwa cyo kwandika abarokotse Jenoside bakoze
Umunyamabanga Nshingwabikorwa wa Komisiyo y’Igihugu yo kurwanya Jenoside, (CNLG) Dr Bizimana Jean Damascène yashimye ubutwari abarokotse Jenoside bagaragaje bandika ‘ Amakayi y’Urwibutso’
Igitabo “ Cahiers de mémoire” cyatangiye kwandikwa mu 2014
Editions Bakame niyo yashyize mu Kinyarwanda igitabo "Amakayi y’Urwibutso"

Amafoto: Kayiranga Victor


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza