Ijambo rya Michaëlle Jean imbere y’abakuru b’ibihugu ba OIF ryafashwe kwinshi

Yanditswe na Ferdinand Maniraguha
Kuya 11 Ukwakira 2018 saa 07:35
Yasuwe :
0 0

Umunya-Canada uri kurangiza manda ye ya mbere nk’Umunyamabanga Mukuru wa Francophonie, Michaëlle Jean, yavuze imbwirwaruhame yuje amagambo atavuzweho rumwe, asigura ko atishimiye uburyo ibihugu byamukuyeho amaboko bigashyigikira Louise Mushikiwabo.

Kuri uyu wa Gatanu i Erevan muri Arménie hazarara hamenyekanye umunyamabanga mukuru mushya w’Umuryango uhuza ibihugu bikoresha Igifaransa (OIF), ugomba kuva hagati ya Mushikiwabo na Michaëlle Jean.

Mu ijambo rifungura inama y’abakuru b’ibihugu na za Guverinoma zigize OIF, Michaëlle Jean yahavugiye imbwirwaruhame asa n’ugaragaza ko yatereranwe.

Ibihugu 29 bya Afurika biri muri OIF n’u Bufaransa byamaze gutangaza ko bishyigikiye Mushikiwabo.

Na Canada yari isigaye kuri Michaëlle Jean kuri uyu wa Gatatu yisubiyeho, ivuga ko izajya inyuma y’umukandida ushyigikiwe na benshi.

Mu ijambo rye kuri uyu wa Kane, Michaëlle yasabye ashikamye abayobozi kugira amahitamo ahamye, bakagaragaza aho bahagaze.

Yagize ati “Twiteguye kwemera ko imiryango mpuzamahanga iba ibikoresho ku mpamvu runaka? Twiteguye kwemera ko Demokarasi, uburenganzira n’ubwigenge bisigara ari amagambo gusa ngo niko politiki nyayo imera kubera udutsiko duto tw’ibihugu byishyize hamwe cyangwa inyungu zidasanzwe?”

Michaële ufite inkomoko muri Haiti yavuze imbwirwaruhame y’iminota 14, asobanura ko nihatagira igikorwa ngo uwo muryango uve mubyo urimo uraba uri mu marembera.

Ati “Igihe ni iki ngo duhitemo kugira icyo dukora cyangwa tubyihorere. Dutere imbere cyangwa dusubire inyuma. Tumenye ko kutagira icyo dukora no kugambana ari ikigaragaza gusubira inyuma kuko umuryango ucengana n’indangagaciro n’amahame biwugenga uba usa n’ugiye gupfa.”

Perezida Emmanuel Macron na Minisitiri w’Intebe wa Canada Justin Trudeau mu mbwirwaruhame zabo babaye nk’abasezera kuri Michaëlle Jean, bamushimira akazi keza yakoze mu myaka ine amaze ayoboye OIF.

Macron yamushimiye urugamba yarwanye mu guteza imbere uburenganzira bw’abagore, naho Trudeau amushimira uburyo yafashije abagore kubona uburezi no kugaragaza ijwi ryabo.

RFI yatangaje ko nibura Michaëlle Jean ashobora gushyigikirwa n’ibihugu 17 cyangwa 18 hashingiwe ku isesengura ryakorewe muri Erevan mu ijoro ryo kuwa Kabiri.

Michaëlle Jean ashobora gusimbuzwa ku bunyamabanga bukuru bwa OIF kuri uyu wa Gatanu, aha yaramukanyaga na Minisitiri w'Intebe w'Igihugu cye, wamuvanyeho amaboko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza