Ihurizo mu gutwara urukingo rwa COVID-19; RwandAir yaba yiteguye?

Yanditswe na Philbert Girinema
Kuya 10 Ukuboza 2020 saa 10:29
Yasuwe :
0 0

Mu gihe Isi ihanze amaso urukingo rwa COVID-19 rwatangiye no gukoreshwa hirya no hino, ubu ihurizo rikomeye riri mu buryo ruzajya rukwirakwizwa hirya no hino ku Isi kuko gutwara inkingo bitandukanye n’uko watwara igikarito runaka kirimo ibinini.

Ntabwo ari indege zose zifite ubushobozi bwo gutwara inkingo kuko gutwara imiti bikenera ahantu hafite igipimo cy’ubushyuhe buri hagati ya dogere Celsius 2 na 8. Gutwara inkingo zimwe byo bishobora gusaba ubukonje bwa dogere Celsius zeru cyangwa munsi yazo, ibyo bikaba byatuma hari indege nyinshi zidafite ubushobozi bwo kuzitwara.

Nk’inkingo enye ziri mu cyiciro cya nyuma cy’igerageza, zose zifite amabwiriza yihariye ajyanye n’uburyo zibikwamo n’uko zitwarwamo. Urugero nk’urwa AstraZeneca rwakozwe na Kaminuza ya Oxyford mu Bwongereza, ni rwo rwonyine urebye rufite amabwiriza ashobora korohera abantu mu buryo bwo kurutwara no kurubika.

Urugero, rwo rushobora kubikwa mu bubiko busanzwe ahantu hari ubukonje ushobora no kubona muri firigo zikoreshwa mu buzima bwa buri munsi. Ariko nk’urwa Moderna rw’Abanyamerika rwo amabwiriza ni uko rubikwa ahantu hari ubukonje bwa dogere Celsius -20 rukaba rwahamara amezi atandatu.

Urwa Pfizer na BionTech rwo rwanatangiye gutangwa mu Bwongereza, amabwiriza ni uko rubikwa ahantu hari ubukonje bwa degere Celsius -70 mu gihe urwakozwe n’Abarusiya ruzwi nka Sputnik V narwo rushobora kubikwa kimwe n’urwa AstraZeneca mu bukonje busanzwe bwa firigo.

Nubwo urukingo rwa Pfizer na BionTech rwatangiye gukoreshwa, abahanga mu by’ubuzima bagaragaza ko nk’ibihugu bikennye cyangwa ibyo muri Afurika byinshi bishobora kuzahitamo gukoresha urwa AstraZeneca kuko rwo nta mabwiriza menshi rusaba mu kurubika bitandukanye n’izindi zifite umwihariko ukomeye mu bukonje n’ibindi.

Izi nkingo zose, umuntu azihabwa kabiri akaba yizeye ko zishobora kumurinda kwandura icyorezo cya Coronavirus.

Mu ntangiriro za Nzeri uyu mwaka, Ishyirahamwe Mpuzamahanga rw’Ubwikorezi mu Ndege (IATA) ryatangaje ko bizasaba indege 8000 zo mu bwoko bwa Boeing 747 mu gukwirakwiza urukingo rwa COVID-19 ku Isi, ndetse ko aribwo butumwa bukomeye buzakorwa n’ibigo by’indege nko muri iki kinyejana.

Icyo gihe IATA yagaragazaga ko kugeza muri Afurika urukingo rwa Covid-19 rubaye rubonetse "bitashoboka" kubera ko nta bushobozi buhari bwo gutwara imizigo, ingano y’akarere ka Afurika n’urusobe rw’ibibazo byo kwambuka imipaka.

IATA isobanura ko ubu bwikorezi buzasaba "gukorwa neza bijya gusa nk’igikorwa cya gisirikare", ndetse bisabe ko habaho ahantu hahehereye hazabikwa izo nkingo.

RwandAir yaba yiteguye?

Ibigo by’indege bikomeye ku Isi nibyo bihanzwe amaso kugira ngo mu gihe uru rukingo rubonetse, bibashe kurugeza ku baturage, babashe guca ukubiri n’iki cyorezo cyabatindahaje. RwandAir ni kimwe muri ibyo bigo bihanzwe amaso, dore ko imaze gushinga imizi mu byerekezo byose bya Afurika.

Umuyobozi Mukuru wa RwandAir, Yvonne Manzi Makolo, yabwiye IGIHE kuva ibihe bya Guma mu Rugo byatangira, iyi sosiyete ikoresha indege zisanzwe mu gutwara imizigo, bidasabye ko hakoreshwa izayigenewe.

Muri icyo gihe usanga nk’imyanya yifashishwa n’abagenzi yakoreshejwe mu gutwara mizigo, gusa ko ubu hari kwigwa uko ibijyanye no gutwara urukingo rwa COVID-19 bishobora gukorwa mu gihe igihe kizaba kigeze.

Ati “Turacyakoresha indege zacu zisanzwe mu gutwara imizigo, ndetse n’i Burayi dutwara imizigo mu ndege zisanzwe zitwara abagenzi. Rero igihe cyo gutwara inkingo nikigera, nabyo turi kubirebaho niba tuzashobora gutwara inkingo, uko twabikora dukoresheje indege dusanganywe.”

“Turacyari kubirebaho, nta kintu kiremezwa ariko ni ibintu bishobora gushoboka kuko urukingo rufite uburyo rutwarwamo mu bijyanye no kugenzura ubushyuhe ariko ntabwo ubu naguha amakuru ahamye. Turi kubyiga bijyanye n’ibisabwa mu gutwara inkingo zitandukanye.”

Usibye RwandAir, indi sosiyete yo mu Karere yatangiye kureba uburyo bwo gutwara urukingo rwa COVID-19 mu gihe ruzaba rubonetse ni Kenya Airways.

Umuyobozi Mukuru wa Kenya Airways, Allan Kilavuka, yavuze ko gutwara imizigo muri iki gihe aribyo ibigo by’indege bihanze amaso mu kuzahura ubukungu bwashegeshwe n’ibihe bikomeye bya Coronavirus byatumye ingendo zihagarara.

Ubwo yavugaga ku byo gutwara urukingo, yagize ati “Gahunda yacu ni ukureba uburyo twafasha mu gukwirakwiza urukingo muri Afurika kuko tugera mu byerekezo 46 ku Isi ariko ibyinshi ni muri Afurika”.

Yavuze ko bizagorana ko ibigo by’indege bigura inshya zihariye zo gutwara uru rukingo kuko zikenewe mu buryo bwihutirwa.

Umuyobozi Mukuru wa RwandAir, Yvonne Manzi Makolo, yatangaje ko batangiye kwiga uburyo bushoboka bwo gutwara urukingo rwa COVID-19 mu gihe ruzaba rubonetse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .