Ihindagurika ry’ibihe ni ikibazo Isi igomba kwitaho by’umwihariko-Minisitiri Mujawamariya

Yanditswe na Nkurunziza Ferdinand
Kuya 13 Ukuboza 2019 saa 09:34
Yasuwe :
0 0

Minisitiri w’Ibidukikije, Dr Jeanne d’Arc Mujawamariya, yavuze ko ihindagurika ry’ibihe ari ikibazo gikomeye Isi ikwiye gukemura byihuse kuko kiri kurema ibindi bibazo bikomeye.

Ibi yabivuze ubwo yagezaga ijambo ku bitabiriye inama ya 25 y’ihuriro ry’ibihugu bihuriye ku masezerano yita ku bibazo by’ihindagurika ry’ibihe; inama iba mu mpera za buri mwaka, ikamara ibyumweru bibiri.

Iyi nama yitabiriwe na za leta na guverinoma zo hirya no hino ku isi, mu rwego rwo gushakira hamwe igisubizo kirambye ku ihindagurika ry’ibihe.

Dr Mujawamariya yagize ati “Ihindagurika ry’ibihe ni ikibazo gihangayikishije isi. Binyuze mu ihuriro rya za guverinoma, abahanga muri siyansi bagaragaje integuza kuri iki kibazo. Ihindagurika ry’ibihe riri kurema uruhurirane rw’ibibazo bikomeye kuri buri kimwe cyose dukuraho ubuzima”.

Yanavuze ko u Rwanda ruzakomeza gutanga umusanzu warwo mu kubahiriza amasezerano y’ihindagurika ry’ibihe.

Yagize ati “U Rwanda rwiyemeje gutanga umusanzu warwo mu iyubahirizwa ry’amasezerano y’i Paris, n’intego yo guhagarikira urugero rw’ubushyuhe bw’isi kuri dogeri 1.5 mu bipimo bya Celsius. Turi kuvugurura ibyo igihugu cyacu kiyemeje gutangamo umusanzu mu rwego guteza imbere igenamigambi ryacu, kugira ngo rirusheho kunoga, kandi tunashaka ibisubizo bishingiye ku guhanga udushya mu rwego rwo kwiyongerera ubushobozi”.

Amasezerano y’i Paris yo muri 2015 ni umusingi ukomeye mu guhangana n’ihidagurirka ry’ibihe, ndetse no kongera umuvuduko w’ibikorwa n’ishoramari bikenewe mu kurushaho kugabanya imyuka ihumanye ku buryo burambye mu gihe kizaza.

Aya masezerano yashyizweho umukono mu nama y’ibihugu byose bigize ihuriro ry’ibihugu bihuriye ku masezerano yita ku bibazo by’ihindagurika ry’ibihe, yabaye ku nshuro yayo ya 21, tariki ya 15 Ukuboza 2015.

Dr Mujawamariya yanashimiye ibihugu byose byemeje amasezerano ya Kigali, ndetse anasobanura ko ishyirwa mu bikorwa ryayo rizakumira ubushyuhe bw’isi ku rugero rwa 0.4 mu bipimo bya Celsius, bitarenze impera z’ikinyejana.

Yanongeyeho ko biramutse bihujwe no gukoresha ingufu mu buryo bwizewe, inyungu ishobora kwiyongera ikagera kuri 1 mu bipimo bya Celsius.

Amasezerano ya Kigali agamije kugabanya imyuka ihumanye ya [hydrofluorocarbons (HFCs)], hakurwaho ikorwa n’ikoreshwa ryayo.

Intego yayo ni ukugabanya ikoreshwa ry’iyi myuka ku rugero rurenga 80% bitarenze umwaka wa 2047 ; bikaba byitezwe ko ubushyuhe bw’umubumbe dutuyeho buzaba bwagabanutse ku rugero rwa 0.5 mu bipimo bya [Celsius] mu mpera z’ikinyejana.

Mujawamariya yagize ati “Amasezerano ya Kigali ni urugero rumwe rw’ibikorwa dushobora gukora ubu, tukagabanya ubushyuhe, tukarinda ubuzima n’imibereho myiza y’ibifite ubuzima byose.”

Ihuriro ry’ibihugu bihuriye ku masezerano yita ku bibazo by’ihindagurika ry’ibihe rishingiye ku masezerano mpuzamahanga y’ibidukikije yemejwe tariki ya 09 Gicurasi 1992, atangira gushyirwaho umukono mu nama y’isi yateraniye mu mujyi wa Rio de Janeiro kuva tariki ya 03 kugera 14 Kamena 1992.

Yatangiye gushyirwa mu bikorwa tariki ya 21 Werurwe 1994, nyuma y’aho umubare ukwiye w’ibihugu byari bimaze kuyemeza.

Ihuriro ry’ibihugu bihuriye ku masezerano yita ku bibazo by’ihindagurika ry’ibihe, mu byo rishinzwe harimo kumenya neza ko amasezerano y’i Paris yo muri 2015 ashyirwa mu bikorwa.

Minisitiri Mujawamariya yavuze ko ikibazo cy'imihindagurikire y'ibihe gikwiye kwitabwaho byihariye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .