00:00:00 IGIHE NETWORK KN KINYARWANDA EN ENGLISH FR FRANCAIS

Iherezo rya Mukankusi, umugore wa mbere wanyonzwe azira uruhare muri Jenoside yakorewe Abatutsi

Yanditswe na IGIHE
Kuya 21 July 2022 saa 08:01
Yasuwe :

Ku wa 28 Mata 1998, bwa mbere mu Rwanda rwa nyuma ya Jenoside yakorewe Abatutsi hatanzwe igihano cy’urupfu, gitangirwa mu ruhame kuri Stade ya Kigali I Nyamirambo no mu Mujyi wa Kibungo.

Icyo gihe harashwe abantu 22 bari bamaze iminsi bahamijwe uruhare muri Jenoside yakorewe Abatutsi. Ni bo ba mbere bahawe igihano nk’icyo ndetse biteza induru mu mahanga, ibihugu byinshi byijundika u Rwanda.

Mu banyonzwe icyo gihe harimo umugore umwe rukumbi, Mukankusi Virginie, wahoze ari Umugenzuzi w’Uburezi (Inspectrice) mu Mujyi wa Kigali ubwo Jenoside yakorewe Abatutsi yabaga.

Raporo zitandukanye zakozwe ntizitanga amakuru menshi ku ruhare rwa Mukankusi muri Jenoside, gusa zigaragaza ko yahamijwe icyaha cyo gutoteza Abatutsi mbere yo kubica mu gihe cya Jenoside yakorewe Abatutsi.

Mukankusi kandi yahamijwe kugira uruhare mu gushakisha no kwerekana ahari abana b’Abatutsi akabashyira Interahamawe ngo bicwe. Tariki 28 Gashyantare 1997 ni bwo yakatiwe urwo gupfa n’Urukiko rw’Ibanze rwa Gitarama.

Ntabwo we n’abamwunganira banyuzwe n’uwo mwanzuro, bajuririra Urukiko Rwisumbuye rwa Nyabisindu, ariko rugumishaho icyo gihano.

Mu rubanza rwatangiye muri Mutarama 1997, Amnesty International yatangaje ko Mukankusi yagiye yivuguruza kenshi mu mvugo yatanze mu rukiko, bishobora kuba byaranashingiweho n’urukiko nyuma yo gushidikanya ku bwiregure bwe.

Umunyamategeko we yavuze ko umukiliya we yakabaye yoroherezwa mu gihano kuko yari umuturage usanzwe udasobanukiwe ibya Politiki ariko Ubushinjacyaha bushimangira ko ibyo bitavanaho uruhare n’ubugome bw’icyaha yagizemo uruhare.

Icyemezo cyo guhanisha abo bantu igihano cy’urupfu ntabwo cyashimishije ibihugu byinshi n’imiryango mpuzamahanga, ndetse nka Amnesty yatangaje ko ibona ari intambwe isubira inyuma.

Muri raporo y’uwo muryango yo ku wa 24 Mata 1998 igira iti “Iki gikorwa cyagabanyije amahirwe n’icyizere cy’ubwiyunge n’amahoro mu Rwanda. Uburemere bwose ibyaha bakoze byaba bifite, nta gisobanuro na kimwe cyatangwa na Leta gukora kiriya gikorwa.”

Papa Yohani Paul II yandikiye Perezida Pasteur Bizimungu asaba ko abo bantu 22 baticwa ariko Guverinoma y’u Rwanda ishimangira ko ibyakozwe n’ubutabera ari umwanzuro wo kubahwa. Yavuze kandi ko ari uguha ubutumwa n’abandi bose batekereza guhonyora uburenganzira bwa muntu.

Umunsi Mukankusi anyongwa yari mu itsinda rimwe n’abandi bafatwaga nka ba ruharwa mu gushyira mu bikorwa no guhagarikira umugambi wa Jenoside yakorewe Abatutsi barimo Frodouard Karamira wahoze ari Visi Perezida w’Ishyaka MDR wagize uruhare mu gukwirakwiza ingengabitekerezo ya Hutu Power no gusaba Abahutu kwica Abatutsi yifashishije Radiyo RTLM.

Ni abantu bake bakatiwe urwo gupfa bashinjwa Jenoside kuko nyuma icyo gihano cyakuwe mu mategeko ahana ibyaha mu Rwanda.

Tariki 25 Nyakanga 2007 ni bwo Guverinoma y’u Rwanda yakuyeho igihano cy’urupfu mu mategeko yayo ahana ibyaha. Bivugwa ko icyo gihano cyakuweho kimaze gukatirwa abantu bagera kuri 600.

Inkuru bijyanye: ​Uko byagenze mu 1998, ubwo u Rwanda rwahanishaga abajenosideri ba mbere 22 igihano cy’urupfu

Mukankusi ni umwe mu bantu barasiwe mu ruhame kuri Stade ya Kigali i Nyamirambo, mu gitondo cyo ku wa 28 Mata 1998

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .