00:00:00 IGIHE NETWORK KN KINYARWANDA EN ENGLISH FR FRANCAIS

Igihombo ku bakorera muri ’Car free zone’ yo ku Gisimenti, utubari twinshi twarafunze

Yanditswe na Thamimu Hakizimana
Kuya 17 Mutarama 2023 saa 07:48
Yasuwe :

Abafite utubari ku Gismenti mu gace gahindurwa ‘Car Free zone’ mu mpera za buri cyumweru barataka igihombo gikomeye ku buryo hari bamwe muri bo bamaze gufunga imiryango bahitamo kwimukira ahandi.

Ibi babitangaje mu gihe ubwo aka gace kahindurwaga Car Free Zone, hitegurwa inama ya CHOGM, abahafite utubari bari baragaragaje ko bari kunguka cyane.

Mu minsi iyi nama yamaze ibera i Kigali, abakorera muri aka gace babyiniraga ku rukoma bitewe n’inyungu babonaga ku munsi kubera urujya n’uruza rw’abahasohokeraga.

Uyu munsi iyo utembereye muri aka gace usanga hari utubari twinshi twafuze imiryango kubera igihombo, turimo akari kazwi nka Red Sky, New Guess, Petit Bruxelles, Bahamas n’akitwaga Murugo Pub ndetse na Chill-Out.

Abakorera muri aka gace bavuga ko kuba nta hantu imodoka zifite zo guhagarara, kuvugwa nabi ku mbuga nkoranyambaga no mu itangazamakuru no kuba polisi ipima abanyweye inzoga baba bicaye hariya ari bimwe mu byabateje igihombo.

Uwaguze akabari ka Bahamas, unemeza ko agiye guhindura iryo zina akakita Carol’s join, avuga ko uwo yakaguriye yabitewe n’igihombo ndetse nawe ashobora kuzafunga imiryango hatagize igihinduka.

Ati “Erega natwe turafunga, ntakubeshye pe bimeze nabi, natwe turafunga kuko ni ukuvuga ngo urakorera nyir’inzu ni kwa kwanga kwicara mu rugo uvuga ngo ninjyanayo igishoro ndakirya.”

Abajijwe ikiri kubatera guhomba yagize ati “ Gisimenti yabanje yicwa n’imbuga nkoranyambaga cya gihe cya mbere bayivuga nabi, ngo ni muri sodoma n’ibindi, abantu biyubashye ntibakiza, ababyeyi bafite abana banga ko baza kubera ibintu byahavuzwe n’uwiyubashye nawe kandi abona ataza mu kavuyo ko muri Weekend.”

Yakomeje avuga ko abazaga kuhanywera bafite imodoka batakihaza kubera ko baba bafite impungenge z’uko ibinyabiziga byabo bishobora kugongwa ntibamenya ababigonze.

Avuga ko hakwiye gushyirwaho gahunda y’uko Gismenti yajya igirwa Car Free Zone byibura rimwe muri Weekend kugira abahakorera bareke gukomeza gukorera mu gihombo.

Uwari ushinzwe akabari ka Murugo Pub, utarifuje ko amazina atangazwa bitewe n’uko ubu ari gukorera mu kandi gaherereye i Kanombe, nawe yemeza ko igihombo ari cyo cyatumye batagikorera ku Gismenti.

Ati “Habayeho ikibazo cy’iriya mihanda bafunze nta mukiliya ukiza ngo yinjiremo hariya imodoka ayisize imbere kandi no mu dusantere inzoga ziba zihari, ikindi kiriya kintu cyavuzwe ku mbuga nkoranyambaga ngo niba ushaka kureba urubyiruko rw’u Rwanda uzaze ururebe ku Gismenti, mbega bavuga ko habaye irimbukiro ry’urubyiruko nibyo bintu byagiye bihica abantu bagatinya kuhaza.”

Yongeyeho ko no kuba polisi yarazaga gupima abantu banyweye inzoga biri mu byatumye abafite imodoka benshi bahahunga.

Uyu musore yakomeje avuga ko bahisemo gufunga kuko batari kujya babona n’amafaranga yo kwishyura abakozi anemeza ko ‘Car free zone’ igiye ihashyirwa rimwe mu kwezi aribyo byafasha abahafite utubari.

Benshi mu bakorera muri utu tubari bemeza ko basigaye byibura babona abakiliya mu minsi isanzwe kubera ko abafite imodoka babasha kuba bazishyira hafi y’utubari bagiyemo.

Akabari ka Murugo Pub kari mu twafunze imiryango kubera igihombo
Chill-Out yari mu tubari dukunzwe nayo yamaze gufunga imiryango
Inzu nyinshi zari zarahinduwe utubari abazikoreragamo bakuyemo akabo akarenge kubera ibihombo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .