Igihe cyo kwishyura umusoro ku mutungo utimukanwa cyongerewe

Yanditswe na Ndahayo Emmanuel
Kuya 19 Ukuboza 2020 saa 07:39
Yasuwe :
0 0

Ikigo cy’Igihugu cy’Imisoro n’Amahoro (RRA) cyatangaje ko igihe cyo kwishyura imisoro ku mutungo utimukanwa (ubutaka n’inyubako) w’umwaka wa 2020 cyongereweho amezi atatu, kikazarangira ku wa 31 Werurwe 2021.

Iki gihe cyari buzarangire kuri uyu wa 31 Ukuboza uyu mwaka, gusa hakomeje kumvikana amajwi y’abantu basaba ko igihe cyo kwishyura umusoro cyakongerwa, bitewe n’uko ibihe by’ubukungu byatewe n’icyorezo cya Coronavirus byasize bamwe bari mu bukene, dore ko hari hanashize igihe gito abana basubiye mu mashuri, kandi na cyo akaba ari igikorwa gitwara amafaranga menshi.

IGIHE ifite amakuru ko hari abaturage bandikiraga Ibiro Bikuru by’Umujyi wa Kigali babamenyesha ko batazashobora kwishyura uyu musoro, bityo bakifuza gusonerwa.

RRA igira abasoreshwa inama yo “kumenyekanisha umusoro hakiri kare, kuko hashyizweho ubworoherezwe bwo kwishyura mu byiciro bitarenze bine ku babyifuza, uhereye uyu munsi”.

RRA kandi yibutsa abasoreshwa ko “bashobora kwifashisha ikoranabuhanga mu kumenyekanisha no kwishyura imisoro”, bikabarinda gukoresha igihe kinini bajya ku biro by’inzego z’ibanze mu gushaka izo serivise.

Itegeko rishya ry’umusoro ku mutungo utimukanwa ryashyizweho mu mwaka wa 2018, riteganya ko agaciro k’umusoro ku mutungo utimukanwa kazongerwa, kagashyirwa hagati y’amafaranga 0 Frw na 300Frw, kavuye hagati y’amafaranga 0Frw na 80Frw.

Itangazo rya RRA rigaragaza ko igihe cyo kwishyura imisoro ku mutungo utimukanwa cyonerewe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .