Iganze Gakondo, itsinda ry’abasore biyemeje gukundisha urubyiruko umuco

Yanditswe na Uwiduhaye Theos
Kuya 22 Ukuboza 2020 saa 02:55
Yasuwe :
0 0

Iganze Gakondo Group ni itsinda rikora rikanasubiramo indirimbo za gakondo nyarwanda ryifashishije ibicurangisho gakondo nk’inanga, ingoma n’amajwi y’umwimerere nyarwanda.

Umuvugizi w’iri tsinda, Sam Moambi, yabwiye IGIHE iri tsinda baritangije bashaka gukomeza gusigasira umuco nyarwanda no gukomeza kuwukundisha urubyiruko.

Yavuze ko bahereye ku ndirimbo bise ‘Gakondo’ kugira ngo bibutse Abanyarwanda gukomera ku muco wabo aho baba bari hose.

Ati “Umuco wacu ugomba gukwira amahanga yose nk’uko twumva indirimbo za Hip Hop z’Abanyamerika nabo bakajya bumva injyana yacu ya Gakondo na cyane cyane mu Rwanda by’umwihariko.”

Arakomeza ati “Twahisemo gakondo kuko twese twakuriye mu muco duhamiriza, mu matorero atandukanye nyuma duhitamo gukomeza mu kuririmba kuko nabyo twari tubifitemo impano rero byaratworoheye kubijyamo.”

Yemeza ko intera uyu muziki bakora umaze kugeraho ari iyo kwishimirwa kuko abantu benshi basigaye batunzwe nawo ndetse hari n’abasoza amashuri bagahitamo kuwujyamo aho kujya gukora ibyo bize.

Ati “Umuziki wa gakondo umaze gutera imbere aho usigaye utunga n’abawukora bamwe muri bo baranize za kaminuza mu gihe mbere byasaga nko kwishimisha uwizihiwe akakugabira. Ikindi turi kunguka izindi mpano nshya, abana bakiri bato bazi gakondo bakanahimba indirimbo ziryoshye, ibi bigatanga icyizere ko umuco wacu gakondo yacu ntaho izajya tugafatira ku byo bakuru bacu bakoze tukubaka natwe ibigwi byacu mu guteza imbere gakondo no kuyigeza mu mahanga.”

Iri tsinda rigizwe n’abagabo n’abasore icyenda bahoze muri amwe mu matorero y’umuco nyarwanda amenyerewe cyane mu rwa Gasabo. Harimo abacuranzi batatu ndetse n’abaririmbyi batandatu.

Iganze Gakondo Group imaze kwitabira ibitaramo bikomeye harimo n’icyateguwe n’umujyi wa Kigali mu 2019 n’ibindi.

Iri tsinda rimaze imyaka ibiri ritangiye gukora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .