Icyerekezo cy’u Rwanda mu kugera ku miturire yorohereza ab’ubushobozi buciriritse

Yanditswe na Ishimwe Israel
Kuya 20 Gashyantare 2020 saa 10:10
Yasuwe :
0 0

Ikigo cy’Igihugu gishinzwe Imyubakire (RHA) kivuga ko kugira ngo intego ya 35% by’abantu bagomba kuba batuye mu mijyi kandi batuye neza igerweho muri 2035; hakenewe inzu ibihumbi 560 zirimo n’iziciriritse bitarenze mu 2020.

Guverinoma y’u Rwanda yafashe ingamba zihariye zo gufasha Abanyarwanda by’umwihariko abafite amikoro make kubona aho bahengeka umusaya.

Muri gahunda y’imyaka irindwi (2017-2024) izwi nka NST1, u Rwanda rwashyize imbaraga mu gutuza neza Abanyarwanda aho imiryango 205 488 izimurwa aho ituye mu tujagari mu gihe igera ku 10 209 izimurwa mu manegeka.

Kuri ubu abagera kuri 18.4% batuye mu mijyi mu gihe icyerekezo gihari ari uko uwo mubare uzagera kuri 35% muri 2024.

Imibare yo muri 2018 y’Ikigo cya IGC igaragaza ko mu mwaka wa 2032 umubare w`abatuye mu nzu ziciriritse uzagera ku 700,000 uvuye ku 300,000 nk`uko bya biri muri 2015. Nibura inzu 310,000 nizo zikeneye kubakwa muri icyo gihe.

Muri izo nzu, izigera kuri 70% zagenewe abafite ubushobozi buciriritse. Ni uburyo bwatekerejweho mu kubungabunga ubutaka buhingwa, gukoresha neza ubwo mu mijyi no guhashya ibijyanye no kubaka mu kajagari.

Gahunda yo kubaka inzu ziciriritse izita cyane ku bafite ubushobozi buke nibura abahembwa umushahara uri hagati ya 200 000 Frw na 700 000 Frw.

Iteganya ko nibura urugo rumwe rutagomba gukoresha amafaranga arenga 30% y’ibyo rwinjiza ku kwezi mu kugura cyangwa gukodesha inzu zabariwe agaciro k`amafaranga ari hagati ya miliyoni 10 na 35 Frw.

Mu gutegura uyu mushinga, Ikigo cy’Igihugu gishinzwe Imyubakire cyaguze ubutaka bwa hegitari 174.13 ndetse abashoramari batatu bigenga biteguye gutangira imirimo yo kubwubakamo.

Mu gushyigikira uyu mushinga, Guverinoma yatangije Ikigega cyo gutera inkunga imishinga y’ubwubatsi bw’amacumbi aciriritse, ‘Affordable Housing Fund’, kizatangirana na miliyoni 150$ yo gufasha abagura inzu kuzihabwa ku nyungu iciriritse kandi izishyurwa mu gihe kirekire.

Umushinga wagutse wo kubaka inzu ziciriritse uri gukorwa mu gihe hari no kunozwa igishushanyo mbonera cy’Umujyi wa Kigali n’icy’indi mijyi itandatu iwunganira.

Minisiteri y’Ibikorwaremezo itangaza ko ibishushanyo mbonera bivugururwa bijyanye n’icyerekezo cyo guhindura imijyi yunganira Kigali igicumbi cy’ubukungu bw’igihugu no kugabanya umutwaro mu bijyanye n’ubwiyongere bw’abayituye na serivisi zihashakirwa.

Igishushanyo mbonera cy’Umujyi wa Kigali cyatangiye kwigwaho muri Kamena 2018, kuri ubu kiri hafi kwemezwa n’ubuyobozi bwawo. Mu mijyi yunganira Kigali, icyo gikorwa cyatangiye mu Ugushyingo 2018.

Muri Gashyantare 2018 ni bwo Guverinoma y’u Rwanda yahaye isoko Ikigo cyo muri Singapore ‘Surbana Jurong’ isoko ryo kuvugurura ibishushanyo mbonera by’imijyi itandatu yunganira Kigali.

Uyu mushinga wakozwe mu byiciro bibiri birimo icyahereye i Muhanga, Rubavu na Nyagatare mu gihe icya kabiri kizakorerwa i Huye, Musanze na Rusizi, ahakiri gukusanywa amakuru azagenderwaho. Kuri ubu, hanakozwe igishushanyo mbonera cy’imijyi ibiri iri kuzamuka (satellite cities) ya Nyanza na Rwamagana.

Intego nyamukuru zo kuvugurura ibishushanyo mbonera ni uguhuza igenamigambi ry’imijyi n’inshingano yahawe guhuza iryo genamigambi n’amabwiriza y’imyubakire no gusanisha icy’imiturire mu mijyi n’icy’imikoreshereze y’ubutaka.

Kunoza imiterere y’igishushanyo mbonera bijyana n’ibikorwa byo kwimura ibikorwa biri mu bishanga no kubaka imidugudu y’icyitegererezo aho mu gihugu hose hamaze kuzamurwa igera kuri 213.

Mu Mujyi wa Kigali habaruwe ibikorwa birimo inzu z’ubucuruzi n’ibindi 7,222 biri mu bishanga mu Turere twa Nyarugenge, Gasabo na Kicukiro. Muri byo, ibigera ku 5,673 (78.5%) byarimuwe ndetse 21.5% biri gukorwaho.

Ni icyemezo kigamije gutuza neza abaturage no kwirinda ko ubuzima bwabo bwajya mu kaga bakaba bahitanwa n’ibiza bya hato na hato bitewe n’imyuzure.

Abazahabwa inzu bazajya basabwa kwishyura atarenze 40 % by’amafaranga binjiza ku kwezi.
Izi nzu ziri mu mushinga BRD izakorera i Ndera aho inzu ya make izaba igura miliyoni 27 Frw
U Rwanda rufite intego yo kugera ku miturire yorohereza ab'ubushobozi buciriritse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza