00:00:00 IGIHE NETWORK KN KINYARWANDA EN ENGLISH FR FRANCAIS

Icyemezo cyo kohereza mu Rwanda abimukira bo mu Bwongereza gishobora kujuririrwa

Yanditswe na IGIHE
Kuya 16 Mutarama 2023 saa 03:27
Yasuwe :

Urukiko rukuru rwo mu Bwongereza ruheruka kwemeza ko amasezerano yo kohereza abimukira mu Rwanda akurikije amategeko, ariko bisa n’aho impande zose zikurikirana iki kibazo zitarashirwa.

Abanyamategeko b’Umuryango Asylum Aid, umwe mu yari yatanze ikirego isaba ko iyi gahunda ihagarikwa, watangaje ko wasabye uburenganzira bwo kujuririra iki cyemezo, uvuga ko urukiko rwa mbere rwibeshye mu gufata icyemezo.

Icyo cyemezo cyo kuba hari abashobora kujurira cyangwa niba ubwo burenganzira bwakurwaho, gitegerejwe kuri uyu wa Mbere.

Umuyobozi wa Asylum Aid, Alison Pickup, yagize ati "Turimo gusaba uburenganzira bwo kujurira, kugira ngo dukomeze urugendo duharanira icyemezo gikwiye abantu baba baje hano basaba kurengerwa."

Uyu muryango usanzwe wunganira abimukira mu buryo bw’amategeko, ingingo ushyize imbere ngo ijyamye n’umutekano mu Rwanda, ku bimukira.

Bivugwa ko uyu muryango uramutse wemerewe kujurira, washyira imbere ingigo y’uko urukiko rwibeshye mu gufata umwanzuro w’uko abantu batishimiye koherezwa mu Rwanda batemerewe kunganirwa mu kugaragaza impamvu zabo.

Yagize ati "Biragoye kumva ukuntu byaba biboneye ku nzego zibifite mu nshingano, gufata icyemezo cyo kohereza mu Rwanda amagana cyangwa ibihumbi by’abashaka ubuhungiro, hatabayeho uburyo bwo kujya impaka ko atari ahantu hatekanye."

Muri Mata 2022 nibwo u Bwongereza bwasinyanye n’u Rwanda amasezerano agamije kwakira abimukira batujuje ibyangombwa bagafashwa kubibona, abandi bagasubizwa mu bihugu byabo cyangwa bagafashwa gutangira ubuzima i Kigali.

Ni gahunda ireba abantu bose binjiye mu Bwongereza mu buryo bunyuranyije n’amategeko, guhera ku wa 1 Mutarama 2022.

Iki ni icyemezo Guverinoma y’u Bwongereza ivuga ko ishaka kugerageza ikareba niba gitanga umusaruro, kuko bizatuma bamwe mu bashaka kujyayo ku mpamvu zidafatika bacika intege, bikagabanya ikiguzi Leta itanga mu kwita ku bimukira binjiye mu buryo bunyuranyije n’amategeko.

Ayo masezerano amaze gusinywa yamaganwe n’imiryango itandukanye yita ku burenganzira bw’abimukira, na bamwe mu banyapolitiki bo mu Bwongereza.

Hahise hitabazwa urukiko, ndetse abagombaga koherezwa mu Rwanda bakurwa mu ndege yendaga guhaguruka ku wa14 Kamena 2022.

Imibare ya Guverinoma y’u Bwongereza igaragaza ko mu mwaka ushize, abimukira binjiye muri icyo gihugu bakorsheje ubwato butoya buca mu zira itemewe y’amazi (English Channel) bageze ku 45,756, bavuye ku 28,526 mu 2021. Bivuze ko biyongereyeho abasaga 17,000.

Nibura buri mwaka u Bwongereza bwishyura miliyoni 5.5 z’amapawundi yo kwita kuri abo bantu bimutse mu buryo bunyuranyije n’amategeko, aho baba bacumbikiwe muri za hoteli mu gihe ubusabe bwabo bukiri kwigwaho.

Mu masezerano yo kohereza aba bimukira mu Rwanda, biteganywa ko u Bwongereza buzatanga ibyo bazakenera bageze muri iki gihugu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .