U Rwanda rwinjije miliyoni $3.6 mu cyayi cyoherejwe mu mahanga mu kwezi gushize

Yanditswe na Ndahayo Emmanuel
Kuya 10 Nzeri 2020 saa 09:52
Yasuwe :
0 0

Icyayi cy’u Rwanda gikomeje guca uduhigo, aho kiyoboye ibindi byo mu karere ka Afurika y’Iburasirazuba mu kugurwa ku giciro kiri hejuru.

Ikigo gishinzwe guteza imbere ibyoherezwa mu mahanga bikomoka ku buhinzi, NAEB, cyatangaje ko muri iki cyumweru u Rwanda rwacuruje kg 353.613 ku giciro cya 944.259$ (arenga miliyoni 902 Frw), bivuze ko ikiro cyagurishijwe ku giciro cya 2.67$ (2.552 Frw).

Iki giciro ni cyari hejuru ugereranyije n’ibindi bihugu icyenda bisanzwe ari ibinyamuryango by’iryo soko.

Mu kwezi gushize nabwo, icyayi cy’u Rwanda cyinjije agera kuri miliyoni 3.640.338$ (arenga miliyari 3.4 Frw), nyuma y’uko gicuruje kg 1,446.113.

N’ubwo ibihe bya Coronavirus byagabanyije igiciro cy’icyayi ku rwego rw’Isi nk’uko byagenze ku bindi bicuruzwa mpuzamahanga nka peteroli n’amabuye y’agaciro, u Rwanda rwakomeje gucuruza ku giciro cyo hejuru mu karere k’ibiyaga bigari.

Impamvu ibitera ahanini ikaba ari ubwiza bw’iki cyayi usanga buruta ubwo mu bindi bihugu.

Umuyobozi Ushinzwe Itangazamakuru muri NAEB, Pie Ntwari, aherutse kubwira itangazamakuru ko u Rwanda rucuruza ku giciro cyo hejuru kubera ingamba iki guhigu cyafashe mu bijyanye no gutegura umusaruro w’icyayi.

Yagize ati “Ntidukoresha amafumbire mvaruganda ku buryo kigumana umwimerere. Iryo ni ryo tandukaniro ugereranyije n’abandi”.

”Indi mpamvu ikomeye ni uko abahinzi b’icyayi bahora bahugurwa, ku buryo bakoresha ubumenyi mu kuzuza inshingano zabo kuva mu itegura ry’ibanze kugeza ku isarurwa n’ibindi”.

Imibare igaragaza ko mu mwaka wa 2018-2019, u Rwanda rwahingaga toni 30.573 z’icyayi kuri hegitari 27.112, rukazicuruza kuri miliyoni 83.552.108$ (arenga miliyari 79 Frw).

NAEB kandi ivuga ko ifite intego yo kuzamura umusaruro w’icyayi, ukagera kuri toni 65.099 muri 2024, icyo gihe zikazaba zinjiza miliyoni 209$.

Mu rwego rwo kugera kuri iyo ntego, NAEB ivuga ko iri gushishikariza abashoramari kwinjira mu buhinzi bw’icyayi, ndetse no gukora ubukangurambaga hirya no hino ku Isi bugamije kwamamaza icyayi cy’u Rwanda.

U Rwanda kandi ruri kwiga ku buryo bwo gucuruza iki cyayi hifashishije ikoranabuhanga, ku buryo cyagera ku isoko nta handi giciye, bikacyongerera agaciro.

Icyayi cy'u Rwanda kiyoboye ibindi mu kugira agaciro kanini

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .