Umusanzu wa Carnegie Mellon University mu myaka umunani imaze ihugura intiti za Afurika mu ikoranabuhanga

Yanditswe na Cyprien Niyomwungeri
Kuya 24 Kanama 2020 saa 02:04
Yasuwe :
0 0

Abahanga bemeza ko uburezi ari ikintu cy’ingenzi muri sosiyete gituma habaho ugutera imbere kw’imibereho, ubukungu n’ibindi, bikaba umwihariko mu Isi ya none ubukungu bwayo bwubatse ku bumenyi.

Ikoranabuhanga ni inkingi ya mwamba y’icyerekezo cy’iterambere ry’Isi, bikaba bisaba umugabane wa Afurika by’umwihariko gushyira imbaraga nyinshi muri uru rwego kandi kubigeraho bigahera mu burezi bufite ireme.

Iyi ntego ni yo yatumye nyuma y’inama ya Connect Africa yabereye mu Rwanda mu 2007, hafatwa icyemezo ko hakwiye kwigishwa ibijyanye n’ikoranabuhanga. Uku niko haje Ishami rya Kaminuza y’Abanyamerika Carnegie Mellon University Africa, rishinga imizi mu rwa Gasabo none rimaze guhama.

Imibare yerekana ko ku munsi nk’uyu, imyaka umunani ishize Carnegie Mellon University Africa, ifunguye ku mugaragaro ishami mu Rwanda, ritanga amasomo ajyanye n’ikoranabuhanga, mu cyiciro cya gatatu cya Kaminuza (Masters’ Degree).

Iyi kaminuza yatangiye ikorera i Kigali mu nyubako ya Telecom House ku Kacyiru, mu mpera za 2019 yari imaze kurangizamo abanyeshuri 196 bakomoka mu bihugu 19. Bari bavuye ku banyeshuri 20 batangiranye nayo mu 2012.

Umwaka ushize, yimukiye mu nyubako nshya iri mu cyanya cyahariwe inganda i Masoro, ahantu hihariye hagenewe kuzafasha Abanyarwanda n’abanyamahanga bafite impano zihariye kurushaho guhanga ibishya, binyuze mu mushinga wiswe Kigali Innovation City (KIC).

Ubwo Perezida Kagame yafunguraga iki cyicaro, yashimiye ubuyobozi bwa CMU-Africa, bwagiriye icyizere u Rwanda, agaragaza ko ari amahirwe kuba abanyeshuri bigira muri Afurika, ari nawo mugabane ufite ibibazo abarangiza muri iyi kaminuza bagomba gushakira umuti.

Yagize ati ‘‘Kuba Carnegie Mellon University Africa iri mu Rwanda ni amahirwe nizera ko abanyeshuri bazabyaza umusaruro. Icya mbere ni uko ubumenyi bwo ku rwego mpuzamahanga butangirwa hano ku mugabane kandi bugahabwa urubyiruko rwa Afurika rukirebera imbogamizi zihari n’uburyo zakemuka”.

Umukuru w’Igihugu yakomeje agira ati “Dutegereje ba injeniyeri n’abashakashatsi bize hano bazafasha Afurika n’indi migabane. Turizera kandi ko bazafatanya na bagenzi babo mu gukemura ibibazo bitwugarije twese.’’

Kuri ubu abanyeshuri bari mu Rwanda babasha kubona amasomo atangirwa mu mujyi wa Pittsburgh muri Leta ya Pennsylvania aho Carnegie Mellon University ifite icyicaro gikuru, ndetse n’abanyeshuri bari Pittsburgh bagafata amasomo yigishirizwa mu Rwanda.

CMU-Africa yatangiye benshi batabyumva

Ubwo iyi Carnegie Mellon University Africa yashyiraga icyicaro cyayo mu Rwanda ngo gifashe Afurika guhanga abahanga mu ikoranabuhanga, hari abantu bamwe batumvaga ko igihugu nk’u Rwanda cyatangizwamo kaminuza ikomeye nk’iyi.

Perezida Kagame yigeze kuvuga ko hari ababonaga ko ari uguta umwanya. Ati “Ntabwo abantu bose bumvaga ko bizakunda, bamwe batekerezaga ko ari uguta umwanya, ariko hari abandi benshi batekerezaga ko bizafasha kandi bakora ibishoboka byose kugeza ubwo ibi tubona uyu munsi bigezweho.”

Kuri ubu CMU-Africa, ifasha u Rwanda na Afurika yose kuko ubu hari urubyiruko rwinshi rwavuye mu bihugu bitandukanye bya Afurika biza kuyigamo. Ibi byatanze umusanzu mu kugabanya abanyeshuri boherezwaga kwiga mu mahanga ya kure nko mu Buhinde, u Burayi, Leta Zunze Ubumwe za Amerika n’ahandi.

Umusaruro ni mwinshi

CMU-Africa imaze mu Rwanda igihe kitaragera ku myaka icumi, ariko umusaruro wayo umaze kuba mwinshi, ndetse mu bayizemo baturuka mu bihugu 19, Abanyarwanda bihariye 51%.

Ubumenyi butangirwa muri iyi kaminuza ni ingenzi ku iterambere ry’imibereho n’ubukungu mu Rwanda na Afurika. Kuri ubu, amasomo atangirwa muri Carnegie Mellon University Africa ni ajyanye n’ikoranabuhanga, mu cyiciro cya gatatu cya Kaminuza (Masters’ Degree) mu mashami arimo Electrical and Computer Engineering na Information Technology.

Abitabira amasomo ya CMU bamaze kwikuba gatatu kuva yatangira mu Rwanda, ndetse bigaragara ko abarangiza, nibura 90% by’abarangiza muri iyi kaminuza baguma muri Afurika, bakagira uruhare mu guteza imbere ikoranabuhanga muri uyu mugabane ndetse bakahashyira ishoramari ryabo.

Bibarwa kandi ko mu myaka nibura icumi iri imbere, abahanga mu ikoranabuhanga basaga 800 bazaba bamaze kurangiza muri CMU Africa, bakarushaho guteza imbere uyu mugabane, bagasanga abandi 120 000 barangije muri CMU bo mu bihugu 144.

By’umwihariko ku Rwanda, kuva iyi kaminuza yasinyana amasezerano y’imikoranire na Guverinoma y’u Rwanda, yafashije Minisiteri y’uburezi gutegura integanyanyigisho y’ishuri ry’ikoranabuhanga (Rwanda Coding Academy).

CMU-Africa, ifite ibikorwa ifasha mu mashuri yisumbuye cyane cyane uburyo bwo kwigisha Imibare. Hari ubufatanye na Kaminuza y’u Rwanda (UR) mu gusangira za porogaramu, aho abanyeshuri bava kuri Kaminuza imwe bajya ku yindi n’ibindi.

Ibi byiyongeraho amahugurwa ku banyarwanda n’abanyeshuri b’abanyafurika ku bintu by’ingenzi mu ikoranabuhanga nka software engineering, ubwenge bw’ubukorano (Artificial Intelligence), mudasobwa, umutekano w’ikoranabuhanga n’ibijyanye n’ingufu.

Amasezerano hagati ya Carnegie Mellon University na Guverinoma y’u Rwanda bifitanye amasezerano y’uko abiga muri iyi kaminuza nibura 50% bagomba kuba ari abanyarwanda. Kuva mu 2011 kugeza muri Werurwe 2019, u Rwanda rwari rumaze gushora miliyari zirenga 6.5Frw muri iyi kaminuza.

Umunyeshuri wiga muri Carnegie Mellon University Africa ari muri Leta zunze Ubumwe za Amerika yishyura ibihumbi $48, ariko abigira i Kigali bishyuzwa ibihumbi $16. Umunyarwanda yishyuzwa ibihumbi $8 nayo akayishyurirwa nk’inkunga ya leta.

Kugira ngo Umunyarwanda yemererwe kwiga muri iyi kaminuza asabwa kuba yaratsinze ku rwego rwo hejuru muri kaminuza, ariko na CMU ikamukoresha ibizamini byayo birimo n’icy’Icyongereza.

Perezida Kagame na Perezida wa CMU, Farnam Jahanian bafungura icyicaro cy'iyi kaminuza muri Afurika
CMU Africa yubatse mu cyanya cyahariwe inganda i Masoro
CMU Africa yatangiye gukorera mu Rwanda ku mugaragaro mu 2012
Perezida Kagame afata ifoto y'urwibutso n'abanyeshuri ba CMU Africa
Abanyeshuri 196 bo mu bihugu 19 nibo bamaze kurangiza muri iyi kaminuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .