00:00:00 IGIHE NETWORK KN KINYARWANDA EN ENGLISH FR FRANCAIS

Ibyo wamenya ku buryo bwatangijwe na UNILAK mu gufasha abanyeshuri mu myigire yabo

Yanditswe na Igizeneza Jean Désiré
Kuya 5 Ukuboza 2022 saa 04:32
Yasuwe :

Kaminuza y’Abalayiki b’Abadivantisiti b’Umunsi wa Karindwi, UNILAK, yatangije uburyo bugamije gufasha abanyeshuri guhitamo amasomo bashobora kwiga muri kaminuza bigendanye n’ibyo bize mu mashuri yisumbuye ndetse n’ibikenewe ku isoko ry’umurimo.

Binyuze muri ubu buryo bwiswe ’Career Guidance’, umunyeshuri afashwa guhitamo amasomo ashobora kwiga, hagendewe ku bushobozi bwe, ibikenewe ku isoko ry’umurimo, ibyo akunda, amanota yagize mu cyiciro asoje n’ibyo yasojemo mu mashuri yisumbuye.

Ni gahunda ifasha abanyeshuri kuko irinda umunyeshuri gukurikirana amasomo agendeye ku mpamvu zidafatika ku buryo ibyo yize bishobora no kumubera impfabusa mu gihe umwana adafashijwe kureba inzira nyayo izamugeza ku ntsinzi.

Career Guidance ni gahunda yanimakajwe na Leta y’u Rwanda kuko ubu mu bigo by’amashuri yisumbuye na za Kaminuza bisabwa kuba bafite, aho ubu bujyanama bukorerwa kugira ngo buri mwana wese agire amakuru ahagije ku cyazamugirira akamaro mu bihe biri imbere.

Mu guha ingufu iyi gahunda UNILAK yashyizeho ishami ryiswe ’Career Advisory Center’, ubu riyobowe na Ndahayo Jean Damascène ukorana umunsi ku wundi n’abanyeshuri ndetse n’abandi barebwa n’iyi gahunda kugira ngo Kaminuza igire abanyeshuri b’icyerekezo.

Mu kiganiro na IGIHE, Ndahayo yavuze ko impamvu yo gushyira imbaraga muri iyi gahunda ari uko akenshi usanga abanyeshuri badasobanukiwe n’ibyo baje kwiga, aho umwana ashobora kuza kwiga amasomo runaka nta mpamvu ifatika afite.

Ati "Hari n’uza kwiga amasomo kubera ko hari uwo yabonye wayize, cyangwa se ibivugitse neza, undi we akaba yagendera ku byo ababyeyi be bize kandi mu by’ukuri we atanabishoboye."

Ashimangira ko binyuze muri za nzira zose zisabwa ngo umunyeshuri yige amasomo runaka, igikurikiraho ari ukureba niba afite amanota amwemerera kubyiga kuko hari amanota ntarengwa umunyeshuri aba asabwa kugira ngo yemererwe kwiga amasomo runaka.

Ati "Tureba amanota yagize mu cyiciro asoje ndetse tukita no ku masomo yize, kuko hari igihe usanga ashaka kwiga ibijyanye na mudasobwa kandi yarize ubuvanganzo. Aho uko wabikora kose ntabwo byakunda."

Akarusho ka UNILAK kandi binyuze muri ubu buryo, amasomo umunyeshuri aziga kuva mu mwaka wa mbere kugera asoje aba ayafite, ibituma asesengura mu buryo bwo gufata icyemezo niba yakomeza cyangwa yafata andi.

UNILAK igena n’umwanya w’ibiganiro ku bantu bagize aho bagera mu mirimo itandukanye na bo bakaza gufasha abana mu kubereka inzira banyuzemo bakaba bazikurikiza mu gukabya inzozi zabo.

Bamwe mu babyeyi baracyari imbogamizi

Nubwo umubyeyi ari imwe mu nkingi ya mwamba ya buri mwana wese ku bijyanye n’uburezi, kuri iyi nshuro hari ababera abana babo imbogamizi binyuze mu kubahatira kwiga amasomo bakunda (ababyeyi) kurusha kwita k’ubushobozi bw’umwana.

Bikunze kubaho cyane nk’iyo umubyeyi yize ayo masomo mu gihe cye agikenewe, ibitandukanye n’uyu munsi aho ushobora gusanga ayo masomo atakigezweho, umwana akaba abiguyemo kubera kutabisobanukirwa.

Mu gufasha aba bana UNILAK yegera abanyeshuri bakerekwa ko badakwiriye gusuzugura ababyeyi babo ariko bakwiriye gufata umwanya bakaganira kuko igihe kinini abana baba bazakimara batagifashwa n’ababyeyi.

Ndahayo ati "Nk’umwana ufite imyaka 20 ubu, azageza ku myaka ya pansiyo afite imyaka 65, umwereka ko mu myaka irenga 40 azayimara ari mu buzima bwe kuko umubyeyi azamufasha mu myaka ya mbere indi yose akazirwariza, hatabayemo impaka bagomba kuganira bakagera ku mwanzuro ukwiriye"

Ikibazo cy’abana baba barabwiwe amakuru atari yo ku masomo runaka na cyo ni indi mbogamizi aho umunyeshuri aza yarishyizemo ko isomo rikomera kandi mu by’ukuri yarishobora, gusa nk’uko bisanzwe umwana arafashwa bikarangira ayobotse inzira nyayo.

Kuva mu kubayobora inzira ibafasha guhitamo amasomo abakwiriye kugera mu masomo yabo ya buri munsi ndetse kugeza basoje, abanyeshuri ba UNILAK bakurikiranwa kinyamwuga, bikajyana no gukeburwa mu gihe hagaragaye amakosa kugira ngo umwana azasohoke yiteguye ku buryo buhagije.

Mu 2009 nibwo ubu buryo bwo kuyobora abanyeshuri hagamijwe kureba ikizabagirira akamaro mu bihe bizaza bwatangiye, kuri iyi nshuro bumaze gushinga imizi ku buryo bugaragarira buri wese.

Ibi bigaragazwa n’iyo nyuma yo gufashwa mu bijyanye n’imyumvire no guhabwa amakuru yose y’ibisabwa, haboneka abanyeshuri basaba guhindura ibyo bize kuko baba bamaze kumenya ukuri.

UNILAK ijya ifata igihe cyo kunyura kuri buri munyeshuri wese wize muri iyi Kaminuza kugira ngo harebwe uko iyi gahunda yabafashije, basanga hari abari guhura n’ibibazo na none bakongera bakamufasha.

Ndahayo ati "Umunyeshuri wese tumugeraho tukamenya ubuzima abayeho yaba afite akazi, yikorera, cyangwa ntako afite. Nyuma turasesengura, gusa amahirwe kugeza ubu ni uko ibisubizo tubona ari byiza kuko dusanga iyi gahunda yabagiriye akamaro."

Agaragaza ko ari gahunda ikomeje, aho kuri iyi nshuro bashaka gushinga ikindi gice kizajya gifasha abanyeshuri mu gushaka uko bakwihangira imirimo, bakazajya bahuzwa n’abayirimo, bityo Kaminuza igakomeza kuba ubukombe.

Hari gahunda y’uko UNILAK igiye kongera ibigo bafitanye amasezerano kugira ngo abanyeshuri babo bajye babasha kubona imenyerezamwuga rihagije, bifatanijwe n’amasomo yiyongera kuyo bahabwa ajyanye n’uko umwana yakwitwara mu kazi.

UNILAK yatangije serivisi ya ‘Career Guidance’ ifasha abanyeshuri guhitamo ibyo bashaka kwiga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .