Ibyo wamenya ‘ku mwaka wo gutahuka’, gahunda ya Ghana yakuruye ibyamamare bya Afurika by’imahanga

Yanditswe na Uwiduhaye Theos
Kuya 14 Mutarama 2020 saa 01:58
Yasuwe :
0 0

Mu mpera z’umwaka ushize mu Murwa Mukuru wa Ghana hari hateraniye ibihumbi by’abantu buzuye Stade ya El Wak bitabiriye igikorwa cyo kwishimira umuco wa Afurika kizwi nka ‘Afrochella’.

Hafi abantu baturutse imihanda yose, nk’abagore b’Abafaransakazi bari bambaye imyambaro gakondo yo muri Ghana babyina imbyino z’uruvange rwa Reggae na Afrobeat.

Iki gikorwa cya Ghana gisanishwa n’icyabaga muri Leta Zunze za Amerika gikozwe n’Abanyafurika kigamije guha agaciro umuco n’ubuhanzi cyitwaga Harlem Renaissance.

Prof Ana Lucia Araujo wigisha muri Kaminuza ya Howard, yabwiye CNN ko ibiri muri Afurika ubu bijya gusa na Harlem Renaissance.

Ati “Harlem Renaissance ni igihe umuco n’ubuhanzi n’ubugeni bya Afurika byari byahawe agaciro mu gihe irondaruhu n’amacakubiri byari byarahawe intebe muri Amerika.”

Kugeza ubu Ghana ishobora kuba kimwe mu bihugu bisurwa cyane biturutse ku kuba benshi mu baba hanze ya Afurika [Diaspora] hari byinshi bifuza kwishimira ntawe ubatera hejuru kubera ko bafite uruhu rwirabura.

Ntabwo ari ubwa mbere Abanyamerika bafite inkomoko muri Afurika na Diaspora batangiza gahunda yo kuza muri Afurika nk’ivuko ryabo.

Prof Araujo yavuze nyuma yaho Amerika ihagarikiye ubukoloni mu kinyejana cya 19, abayobozi bavugaga rikijyana nka Marcus Garvey basabye abanyamerika bakomoka muri Afurika gusubira muri Afurika kuhasura.

Umwaka wo gutahuka

Mu 2019, Ghana yatangije icyiswe ‘Year of Return’ [umwaka wo gutahuka]. Ubu bukangurambaga bwari bugamije gukurura ba mukerarugendo b’Abanyamahanga by’umwihariko abafite abakurambere muri iki gihugu.

Iki gikorwa cyatangijwe na Guverinoma ya Ghana kigamije gutera ishyaka abanyafurika baba hanze kugira ngo bagaruke ku ivuko kuhasura ariko by’umwihariko abanye-Ghana, babe banashora imari muri Afurika.

Cyatangijwe ku mugaragaro na Perezida Nana Akufo-Addo i Washington DC nka gahunda yo kunga ubumwe hagati y’aba-Diaspora n’abanyafurika. Cyatangijwe muri Nzeri 2018 ariko gitangira gushyirwa mu bikorwa mu 2019.

Gifite intego yo kugira Ghana agace gahanzwe amaso ko gusurwa n’abanyamerika bakomoka muri Afurika ndetse n’abandi ba diaspora.

Kwibuka imyaka 400 ishize ubwo abanyafurika ba mbere bagezwaga mu mijyi yo muri Amerika nka Jamestown na Virginia, kongera kubaka ahahise hatakaye h’iyo myaka, kuzamura ishoramari muri Ghana ndetse no kwisanzuranaho hagati y’abanyafurika ubwabo n’abanyafurika baba hanze ndetse n’abanyamerika bakomoka muri Afurika ni zo ntego z’ingenzi z’iyi gahunda.

Umubyeyi w’umuhanzikazi Beyoncé, Célestine Ann Beyoncé uzwi nka Tina Knowles-Lawson wari usuye Ghana bwa mbere, yabwiye CNN ko yishimiye iki gikorwa bitavugwa.

Ati “Iki gikorwa cyamfunguye amaso. Ubu ndumva impamvu buri wese ari kuvuga ku kuza hano.”

Iki gikorwa cyatumye Ghana isurwa n’ibihangange ku Isi nk’Umunyarwenya Steve Harvey, abakinnyi ba Filime nka Boris Kodjoe na Danny Glover; abahanzi nka nka T.I. na Ludacris.

Banasuye ahitwa Elmina Castle habaye aha mbere hakorerwaga igikorwa cyo kugurisha abacakara, aka gace ko muri Ghana UNESCO yagashyize ku rutonde rw’umurage w’Isi.

Abandi bantu batandukanye barimo icyamamare Conan O’Brien, Umunyamideli w’Umwongereza Naomi Campbell na Cardi B bose bakandagije ibirenge byabo muri Ghana mu bikorwa bitandukanye.

Banki y’Isi yavuze ko ugereranyije na 2018, ubukungu bwa Ghana bwazamuye umusaruro mbumbe w’igihugu ku kigereranyo cya 6.7 % mu mezi atatu ya mbere ya 2019 gusa.

Abanyafurika bafite inkomoko muri Amerika n’abo mu Birwa bya Caraïbes 126 bahawe ubwenegihugu bwa Ghana mu gikorwa cya ‘Year of Return’.

Umuraperikazi Cardi B yataramiye muri Ghana umwaka ushize
Umuraperi Ludacris mu mwambaro ugaragaza ko yishimiye kugaruka ku ivuko rye ariryo Afurika
Ibyamamare bitandukanye birimo na Naomi Campbell byaje muri Ghana umwaka ushize
Umupira wa Ludacris wagaragazaga ko atari umunyafurika kubera ko yayivukiyemo ahubwo ari umunyafurika kubera ko yo yamuvukiyemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .