00:00:00 IGIHE NETWORK KN KINYARWANDA EN ENGLISH FR FRANCAIS

Ibyo wamenya ku mikorere ya Mashav, Ikigo gifasha Abanyarwanda kwiga bahembwa muri Israel

Yanditswe na Philbert Girinema
Kuya 18 Ukuboza 2022 saa 07:00
Yasuwe :

Niba uzi USAID y’Abanyamerika, Mashav nayo ikora nka yo ariko mu bundi buryo. Ni ikigo cyashinzwe mu 1958, mu gihe Israel yari igihugu kikiri kwishakisha kuko yari ikiri mu bukene, ahubwo ihanganye n’ibibazo iburyo n’ibumoso.

Mashav yashinzwe biturutse ku bitekerezo by’uwari Minisitiri w’Ububanyi n’Amahanga icyo gihe, Golda Meir n’uwari Minisitiri w’Intebe, David Ben Gurion. Intego zari ugufasha ibindi buhugu kuba byakwigobotora ibibazo bibyugarije bibangamira iterambere.

Uyu muryango ni wo ufasha abanyeshuri b’Abanyarwanda kuba bajya kwiga muri Israel, bagahugurwa mu bijyanye n’ubuhinzi kuko iki gihugu kiri mu byabashije kwihaza mu biribwa kandi igice kinini cyacyo ari ubutayu.

Nibura Mashav imaze guha amahugurwa abanyeshuri barenga ibihumbi 300 bo mu bihugu 140. Bahugurwa mu bijyanye n’ubuzima, ubushakashatsi mu ngeri zitandukanye, ubuhinzi, ubuzima, guhanga udushya n’ibindi.

Mu Rwanda, hari ibikorwa byinshi Mashav imaze gukora bigamije iterambere. Urugero ni gahunda zigamije guteza imbere urwego rw’ubuhinzi. Ni yo yagize uruhare mu gushyira mu Rwanda ahakorerwa ubuhinzi bw’icyitegererezo.

Abanyeshuri b’abanyarwanda bajya kwiga muri Israel biturutse ku mikoranire igihugu gifitanye na Mashav. Iyo bagezeyo, umwanya munini bawumara mu mirima biga ibijyanye n’ubuhinzi, aho kuba mu mashuri babyiga mu magambo.

Umunsi umwe mu cyumweru ni wo wonyine bajya mu ishuri, indi itanu baba bari mu mirima aho bamara nibura amasaha umunani. Buri munyeshuri aba afite umuhanga mu by’ubuhinzi umukurikirana.

Muri icyo gihe, ntabwo baba biga gusa ahubwo bahabwa n’insimburamubyizi ku buryo bamwe ayo mafaranga bayifashisha bagatangiza imishinga yabo bwite batashye.

Abanyeshuri bajya guhugurwa muri Israel, bashyirirwaho amahirwe yo kuba bakora imishinga, ihize indi igahabwa inkunga ingana n’ibihumbi 10$.

Umuyobozi wungirije wa Mashav, Eynat Shlein, ati "Baza mu Ukuboza bagataha mu mpera za Ukwakira. Bamara amezi 11. Rero babona ibijyanye n’ubuhinzi byose, kandi bahemberwa ibyo bakora. Bataha bafite amafaranga make bizigamye ku buryo batangira ubushabitsi bwabo."

Umuyobozi wungirije wa Mashav, Eynat Shlein, yatangaje ko bafitanye imikoranire myiza n'u Rwanda kandi ko biteguye gukomeza kuyigeza ku rundi rwego

Shlein asobanura ko hari abanyeshuri babyaje umusaruro ayo mafaranga bahawe, biganjemo cyane abari bafite ibitekerezo mu bijyanye no gukora inganda zitunganya umusaruro w’ibikomoka ku buhinzi.

Ati "Mu Rwanda barahari, bakoze ibintu byiza. Ku giti cyanjye, hari abo twahuye barangije amasomo mu 2017, bahuje amafaranga yabo batangira ihuriro ry’abagoronome, nyuma y’imyaka ibiri bari bamaze kugira abagoronome 83, ku buryo bafashije abantu mu kuzamura umusaruro."

Yakomeje agira ati "Aba banyeshuri baraza hano, bagafashwa muri byose. Barishyurwa, bahabwa uburenganzira bungana n’ubw’undi muturage wa Israel ukora mu bijyanye n’ubuhinzi, niba hari ikibazo bahuye nacyo, hari uburyo babigaragaza kandi tukabikemura."

Yatanze urugero rw’umunyeshuri wo muri Uganda wagiye kwihugura muri Israel, amaze iminsi mike atangira kugira ikibazo mu gatuza, kuko yumvaga ababara.

Byabaye ngombwa ko avurwa, umwijima we basanga urarwaye urasimbuzwa ahabwa undi muzima.

Ati "Ni umusore wari ufite imyaka 21, umwijima we wagize ikibazo, ajyanwa mu bitaro, ahabwa serivisi zimeze nk’izo nanjye ubwanjye nahabwa. Yatashye afite umwijima mushya, icyo navuga ni uko na Visi Perezida wa Uganda yatunguwe n’uburyo umuntu yaza hano agataha afite umwijima mushya."

Bibarwa ko nibura Abanyarwanda barenga 200 bamaze guhugurwa binyuze mu mikoranire igihugu gifitanye na Mashav.

Ati "Ikintu cya mbere dushyiramo imbaraga ni ukubaka ubushobozi."

Mu bihe bya Covid-19, Mashav yagize uruhare kandi mu gutegura amahugurwa ahabwa abakora mu nzego z’ubuzima, aho u Rwanda rwohereje batandatu, bagahana ubumenyi n’abandi bo mu bihugu bitandukanye.

Shlein ati "Ambasaderi [wa Israel mu Rwanda] yambwiye ko ubwo abo badogiteri batandatu batahaga, Perezida [Kagame] we ubwe yabasabye ko bahura, kugira ngo yumve ibyo bigiye muri Israel. Ni ibintu byerekana ko ari ingenzi cyane."

Mashav ishamikiye kuri Minisiteri y’Ububanyi n’Amahanga, amafaranga ikoresha aturuka mu ngengo y’imari y’iyi minisiteri.

Mashav ikorera mu nyubako ya Minisiteri y'Ububanyi n'Amahanga ya Israel iherereye i Yeruzalemu mu gace kitwa Givat Ram

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .