00:00:00 IGIHE NETWORK KN KINYARWANDA EN ENGLISH FR FRANCAIS

Ibyo wamenya ku masezerano yasinywe hagati y’u Rwanda na Mozambique mu bijyanye n’ubutabera

Yanditswe na Ntabareshya Jean de Dieu
Kuya 4 June 2022 saa 12:06
Yasuwe :

U Rwanda na Mozambique byashyize umukono ku masezerano y’imikoranire mu birebana n’ubutabera yitezweho guteza imbere imikorere y’urwego rw’ubutabera hagati y’ibihugu byombi.

Ayo masezerano yashyizweho umukono kuri uyu wa Gatanu tariki ya 3 Kamena 2022, i Kigali, akubiye mu ngingo ebyiri z’ingenzi zirimo guhererekanya abakoze ibyaha bashobora kwihisha muri ibyo bihugu no gufashanya mu gutanga ubufasha mu butabera.

Yasinywe mu gihe Minisitiri w’ubutabera, itegeko nshinga n’imyemerere y’amadini muri Mozambique, Helena Mateus Kida n’itsinda ry’abantu 10 bakora mu nzego zinyuranye z’ubutabera muri iki gihugu bari mu ruzinduko mu Rwanda.

Avuga ko mu gihe hari uwakoze ibyaha runaka mu Rwanda agahungira muri Mozambique hakurikijwe ayo masezerano yafatwa akagezwa mu Rwanda kimwe n’uko byaba bimeze kuri Mozambique.

U Rwanda rwiteze kungukira byinshi muri ayo masezerano cyane by’umwihariko ku birebana n’abashobora kuba baragize uruhare muri Jenoside yakorewe Abatutsi bakigenda bihishahisha ubutabera bashobora no kuba bari muri Mozambique.

Uretse ariko kohererezanya abakoze ibyaha muri ibyo bihugu, ayo masezerano yemeza ko uwakoze icyaha mu gihugu kimwe agafatirwa mu kindi ashobora kuhaburanishirizwa bidasabye ko yoherezwa aho yagikoreye.

U Rwanda rugaragaza ko gushyira umukono kuri ayo masezerano bishimangira imbaraga z’ubufatanye hagati y’ibihugu byombi ndetse ngo biri no mu nyungu z’umutekano.

Umunyamabanga wa Leta muri Minisiteri y’Ubutabera ushinzwe kuri Itegeko nshinga n’andi mategeko Nyirahabimana Soline avuga ko ari inyungu ku Rwanda kuko azatuma abakoze ibyaha birimo n’ibya Jenoside yakorewe Abatutsi bashyikirizwa ubutabera.

Ati “U Rwanda rufite inyungu z’uko uwakora icyaha akagikorera ku butaba bwarwo agikoreye abanyarwanda ariko akaba ari muri Mozambique bitworoheye kumukurikirana.”

Yavuze ko ayo masezerano atanga ububasha bwo gukurikirana abantu bakoze ibyaha byaba ibiri mu rwego rw’ubukungu, Politiki, ubucuruzi n’ibindi bitandukanye hashingiwe ku bimenyetso byerekana koko ko abo bantu bakwiye gukurikiranwa n’inkiko.

Ku rundi ruhande ariko Minisitiri Helene Kida agaragaza ko gusinyana amasezerano y’ubufatanye hagati y’ibihugu byombi kuri bo ari inzira nziza yo kurwanya ibyaha.

Yakomeje agira ati “Aya masezerano ni igikoresho cy’ingenzi kuri Mozambique, twishimiye kuba twayasinye. Bizadufasha kurwanya ibyaha, kandi bivuze ko ibihugu byombi bizaba bifite ubushobozi bwo gukurikirana abanyabyaha hatitawe ku gihugu barimo, birumvikana ko twese tuzabyungukiramo.”

Minisitiri Kida yavuze kandi ko urugendo bagiriye mu Rwanda ari ishingiro ryo gukomeza ubufatanye ndetse no kwigira ku byo rwagezeho mu birebana n’iperereza cyane irishingiye ku byaha byambukiranya imbibi, ubucuruzi bw’ibiyobyabwenge no kubikoresha, kurwanya iterabwoba, ibyaha bikorerwa kuri internet n’ibindi.

Ibi yabishingiye ahanini ku kuba kuri uyu wa Kane tariki ya 2 Kamena 2022, iri tsinda ryarasuye ibikorwa bitandukanye by’u Rwanda birimo Laboratwari y’igihugu y’ibimenyetso bya gihanga (Rwanda Forensic Laboratory, RFL) n’ikigo cya Isanga One stop center, bagashima imikorere yabyo ndetse bagaragaza n’inyota yo gukorana n’u Rwanda mu birebana na serivisi zihatangirwa.

Mu rugendo bagiriye kuri Laboratwari y’Igihugu y’Ibimenyetso bya Gihanga, Minisitiri Helene, yashimye imbaraga u Rwanda rwashyizemo mu kuyubaka ndetse anagaragaza ko bifuza kohereza abahanga mu birebana n’ubutabera mu Rwanda bakazahugurwa ku mikorere n’imikoreshereze y’ibimenyetso bya gihanga mu gihe iyi laboratwari izaba yamaze guhabwa ubushobozi bwo kuba n’ahantu ho guhugurira.

Aya masezerano y’u Rwanda na Mozambique mu birebana n’ubutabera aje nyuma y’uko mu minsi ishize n’ubundi ibihugu byombi byasinyanye amasezerano y’ubufatanye mu birebana n’ubukungu, umutekano, ubucuruzi n’ishoramari.

Kugeza ubu kandi umubano w’ibihugu byombi uhagaze neza na cyane ko umwaka ugiye gushira ingabo z’u Rwanda n’abapolisi barwo bari muri Mozambique mu bikorwa byo guhangana n’imitwe yitwaje itwaro yari yugarije iki gihugu kandi zamaze kugarura ibice byinshi byari byarahinduwe ibirindiro by’iyo mitwe.

Ubwo impande zombi zashyiraga umukono ku masezerano
Amasezerano ku mpande zombi yasinywe kuri uyu wa gatanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .