00:00:00 IGIHE NETWORK KN KINYARWANDA EN ENGLISH FR FRANCAIS

Ibyo wamenya ku isimbuzwa rya Dr Iyamuremye wari Perezida wa Sena

Yanditswe na Akayezu Jean de Dieu
Kuya 9 Mutarama 2023 saa 12:42
Yasuwe :

Biteganyijwe ko kuri uyu wa Mbere tariki 9 Mutarama 2023, hari buze gutorwa Perezida wa Sena usimbura Dr Iyamuremye Augustin uherutse kwegura ku mpamvu z’uburwayi.

Ubwegure bwa Senateri Dr. Iyamuremye Augustin, bwemejwe n’Inteko Rusange ya Sena ku wa 9 Ukuboza 2022. Uramusimbura azayobora igihe yari asigaje kugira ngo manda y’Abasenateri irangire mu 2024.

Dr Iyamuremye yeguye ku mwanya wa Perezida wa Sena ndetse ahita asezera ku nshingano ze nk’Umusenateri.

Dr Kalinda François Xavier aherutse kugirwa Umusenateri na Perezida Kagame kugira ngo yuzuze umubare w’Abasenateri.

Inteko Rusange y’Umutwe wa Sena mu Nteko Ishinga Amategeko y’u Rwanda ni yo itora Perezida wa Sena akava muri bagenzi be [Abasenateri ni 26].

Itegeko Nshinga rigena ko amatora yo gusimbura Perezida wa Sena weguye akorwa mu gihe kitarenze iminsi 30, inama igamije kumusimbura itumizwa na Perezida wa Repubulika akaba ariwe uyobora ayo matora.

Gusimbuza Perezida wa Sena birasanzwe

Kuva kuri Sena ya mbere nyuma ya Jenoside yakorewe Abatutsi yagiyeho mu 2003, Dr Vincent Biruta niwe perezida wayo wenyine wasoje manda ye ku buyobozi bw’uru rwego rwa Sena.

Abayoboye Sena bose kandi bakomoka mu ishyaka riharanira Demokarasi n’Imibereho myiza PSD uretse Bernard Makuza utaragira ishyaka abarirwamo.

Makuza yinjiye muri Sena asimbuye Dr Jean Damascène Ntawukuriryayo nawe weguye atarangije manda.

Ni ku nshuro ya kabiri bigiye kuba ngombwa ko hatorwa Perezida wa Sena ngo arangize manda y’uwo asimbuye nyuma yo kwegura, nubwo impamvu zatumye begura zitandukanye.

Manda ebyiri za Sena zabanje zari zigizwe n’imyaka 8, imwe, imwe kandi itiyongezwa.

Kuri ubu Ntegeko Nshinga ryo mu 2003 ryavuguruwe mu 2015, riteganya ko manda y’abagize Sena ari imyaka itanu ishobora kongerwa inshuro imwe.

Ubusanzwe Sena y’u Rwanda igizwe n’Abasenateri 26 barimo 12 batorwa bahagarariye Intara enye z’igihugu n’Umujyi wa Kigali.

Hari kandi umunani bashyirwaho na Perezida wa Repubulika, bane bashyirwaho n’Ihuriro ry’imitwe ya Politiki yemewe mu Rwanda na babiri bahagarariye amashuri makuru ya Leta n’ayigenga.

Inkuru bifitanye isano: Ni nde uyobora Sena y’u Rwanda?


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .