Kuvugurura ibishushanyo mbonera by’imijyi yunganira Kigali bigeze he?

Yanditswe na Evariste Nsengimana
Kuya 27 Ugushyingo 2019 saa 05:47
Yasuwe :
0 0

U Rwanda kimwe n’ibindi bihugu bikiri mu nzira y’amajyambere bikomeje kugaragaza iterambere ryihuse ry’imijyi, usanga bigihura n’imbogamizi zirimo ukwiyongera kw’abakenera ibikorwa remezo na serivisi z’ingenzi mu buzima bwa buri munsi.

Kugira ngo izo mbogamizi zikurweho bisaba ko hanozwa imicungire y’iterambere ry’imijyi binyuze mu murongo mugari ihabwa hagendewe ku bishushanyo mbonera igenerwa bijyanye n’icyerekezo cy’iterambere rirambye.

Muri Gashyantare 2018 nibwo Guverinoma y’u Rwanda yahaye isoko Ikigo cyo muri Singapore ‘Surbana Jurong’ ryo kuvugurura ibishushanyo mbonera by’imijyi itandatu yunganira Kigali.

Ni umushinga wagombaga gukorwa mu byiciro bibiri birimo icyari guhera kuri Muhanga, Rubavu na Nyagatare naho icya kabiri kigakorerwa mu wa Huye, Musanze na Rusizi.

Mu kiganiro n’abanyamakuru kuri uyu wa Gatatu, Umuyobozi Ushinzwe Imiturire n’Iterambere mu Kigo cy’Igihugu gishinzwe Imiturire (RHA), Kampayana Augustin, yavuze ko kubivugurura bizarangira muri Gicurasi 2020 kandi ko umuturage azabigiramo uruhare.

Yasobanuye ko hashyizweho Urwego rw’Igihugu rw’Ubujyanama rushinzwe umushinga wo kuvugurura ibi bishushanyo, ruhuriweho na Minisiteri y’Ibikorwa Remezo, ibigo bya Leta n’abikorera kandi ko imbanzirizamushinga zakozwe zikagaragazwa ari nta makemwa.

Ati “Ibi bishushanyo mbonera bikwiye kuba bidaheza abaturage. Bazagira uruhare runini rwo gutanga ibitekerezo kugira ngo buri muntu aho azaba ari yumve ko ari muri cya gishushanyo mbonera, mu bibazo no mu bisubizo yitangiye.”

Kampayana yasobanuye ko kubivugurura nta baturage benshi bazabangamirwa ngo bimurwe aho bari batuye ‘N’abo bizabaho si benshi, twashyizeho amategeko niba ahantu hashyizwe inzu y’ubucuruzi uragiramo inzu yo guturamo’.

Ati “Ntabwo twifuza ko igishushanyo mbonera kigira uwo kizimura, turateganya ko aho bizagera ntibizabe ari binini. Gikwiye kuba ari igishushanyo kizafasha wa muntu gutera imbere ariko adahungabanyijwe.”

Yakomeje avuga ko “iterambere ry’imijyi iyo rikozwe neza abantu batura neza, bakagezwaho serivisi nyinshi bitabagoye kandi zidahenze, bigatanga umurongo mwiza mu ishoramari no mu mibereho myiza y’abatu

Kuki igishushanyo mbonera cy’imijyi yunganira Kigali kivugururwa?

Guverinoma y’u Rwanda ifite intego ko imijyi yunganira Kigali ihinduka igicumbi cy’ubukungu bw’igihugu kandi ikazagabanya umutwaro Kigali ifite mu bijyanye n’ubwiyongere bw’abayituye na serivisi zihashakirwa.

Ibarura rya kane ku baturage n’imiturire ryagaragaje ko mu baturage basaga miliyoni 10.5 bari batuye u Rwanda, miliyoni 1.13 babarizwa i Kigali.

Intego nyamukuru zo kuvugurura igishushanyo mbonera cy’iyi mijyi harimo guhuza igenamigambi ryayo n’inshingano nshya yahawe, kurihuza n’amabwiriza mashya y’imyubakire no gusanisha ibishushanyo mbonera by’imiturire mu mijyi n’icy’imikoreshereze y’ubutaka kiri kuvugururwa.

Hari kandi guhuza igenamigambi ryayo n’amabwiriza y’iterambere ry’imijyi, intego z’iterambere rirambye n’icyerekezo 2050 no kuyishyiramo ibikorwa byoroshya ishoramari birimo ibikorwa remezo n’ibindi.

Ni iki cyitezwe mu kuvugurura?

Kuvugurura ibishushanyo mbonera by’imijyi yunganira Kigali biteganyijwe ko nibirangira hazaboneka igishushanyo mbonera cya buri mujyi kigaragaza imbago zawo n’ibizawukorerwamo.

Kampayana ati “Niba ari ukuvuga ngo hano hari inzu z’ubucuruzi, zizakenera ibikorwa remezo. Kigaragaza aho imihanda, imiyoboro y’amazi izanyura n’ahazakorerwa ubucuruzi, inganda, amashuri, serivisi z’ubuvuzi bizajya he...”

Iki gishushanyo mbonera kandi kizaba kigaragaza uburyo bwo kubungabunga ibidukikije, aho kwidagadurira kandi kinateganye ikoranabuhanga rizajya rifasha umuturage kumenya ibizakorerwa aho atuye akoresheje telefoni.

Kampayana ati “Tuzanabonamo aho umuturage wicaye iwe afite telefoni abasha gukoresha uburyo bumwereka ibizakorerwa mu kibanza cye, imwereka aho imihanda izaca, aho azaba akoresha ikoranabuhanga akamenya ibyo yifuza ku kibanza atiriwe ajya ku karere cyangwa ku murenge.”

Ibikorwa remezo by’ibanze bimaze kugezwa mu mijyi yunganira Kigali

Igice cya mbere cy’umushinga wo guteza imbere imijyi yunganira Kigali cyatashywe muri Gashyantare uyu mwaka cyatwaye arenga miliyoni $29, aho hubatswemo imihanda ya kaburimbo ireshya na kilometero 28.3 na ruhurura zireshya na kilometero 13.3.

Guverinoma ifite icyerekezo cyo guteza imbere imijyi, abayituye bakagera kuri 35% kandi babona serivisi zijyanye n’imiturire myiza. Ubushakashatsi bwa Gatanu ku mibereho y’ingo mu Rwanda (EICV5), bwagaragajeko abatuye mu mujyi bari ku kigero cya 18.3%.

Indi nkuru wasoma: Imbaraga zabibwe mu mijyi yunganira Kigali mu guhindura ubuzima bw’abayituye (Amafoto)

Umuyobozi Ushinzwe Imiturire n’Iterambere mu Kigo cy’Igihugu gishinzwe Imiturire (RHA), Kampayana Augustin, yasobanuye ko muri Gicurasi iki gishushanyo kizaba cyarangiye
Ubwo abanyamakuru baganirizwaga ku ivugururwa ry'igishushanyo mbonera cy'imijyi yunganira uwa Kigali

Amafoto: Dushimimana Ami Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza