00:00:00 IGIHE NETWORK KN KINYARWANDA EN ENGLISH FR FRANCAIS

Ibyo Ambasaderi w’u Bufaransa yibuka ku nkunga zahawe ubutegetsi bwa Habyarimana

Yanditswe na Rabbi Malo Umucunguzi
Kuya 12 April 2022 saa 07:25
Yasuwe :

Uruhare rw’u Bufaransa mu mateka yagejeje kuri Jenoside yakorewe Abatutsi mu Rwanda rwakomeje guteza impaka, kugeza ubwo ibi bihugu byacanye umubano, ubu birimo kuwuzahura bundi bushya.

Ni uruhare ahanini rushingiye ku nkunga iki gihugu cyahaye ubutegetsi bwa Perezida Habyarimana ubwo Jenoside yakorwaga ndetse inashyirwa mu bikorwa, hirengagijwe ubuzima bw’abatutsi bicwaga.

Ambasaderi w’u Bufaransa mu Rwanda, Antoine Anfré, kuri uyu wa Mbere yatangaje ko iki gihugu kimaze kubona ko bitagishoboka guceceka ku ruhare rwacyo.

Yari mu kiganiro cyahuje abadipolomate bahagarariye ibihugu byabo n’imiryango mpuzamahanga bikorera mu Rwanda, hamwe na Minisiteri y’Ubumwe bw’abanyarwanda n’inyigisho mboneragihugu.

Icyo gihe Ambasaderi Antoine Anfré yakoreraga muri Ambasade i Kampala muri Uganda (1987-91) nk’umunyamabanga wa Kabiri ndetse aza no kuba uwungirije umuyobozi w’ubwo butumwa.

Nibwo ngo yabashije gukurikirana ibibazo by’impunzi muri Uganda no mu karere.

Ubwo RPA yari imaze gutangiza ibitero ku butegetsi bwa Habyarimana, ngo bwatabaje ibihugu bitatu birimo u Bubiligi, u Bufaransa n’ingabo za Zaire yayoborwaga na Mobutu.

Ingabo z’u Bubiligi ngo zavuye mu Rwanda bwangu, iza Zaire zihasiga umugani "ku buryo na Habyarimana ubwe yashatse ko izo ngabo zihava." Zashinjwe ibyaha byinshi birimo gusahura no gufata ku ngufu.

Amb Anfré ati "Abasirikare bonyine bahagumye mu gihe kirekire kugeza nibura mu Ukuboza 1993 ni Ingabo z’u Bufaransa. Ni mu cyo bitaga Opération Noroît. Nyamara kenshi abantu bibanda kuri Turqouise yabaye kuva muri Kamena 1994, ubwo Jenoside yakorwaga."

Yavuze ko binyuze muri Opération Noroît, u Bufaransa bwafashije ingabo za Habyarimana gukoma mu nkokora igitero cya mbere cya RPA, cyanaguyemo Maj Gen Fred Rwigyema wari uyoboye izo ngabo.

Ambasaderi Antoine Anfré mu kiganiro hamwe n'abandi badipolomate

Icyo gihe ngo ingabo za Habyarimana zafashijwe cyane na za kajugujugu, "ku buryo wakenera kumenya abari bazitwaye."

Nyamara ngo ubutegetsi bwa Habyarimana “bwari bunaniwe”, bwaramunzwe n’imiyoborere igendera ku moko.

Abo basirikare b’u Bufaransa ngo bari bafite ubunararibonye n’ubushobozi, bagahabwa amabwiriza n’u Bufaransa.

Yakomeje ati "Abo basirikare boherejwe ku mabwiriza ya Perezida Mitterrand, Habyarimana yari umuntu wa hafi yashakaga kurwanaho. Kuva mu 1990 kugera mu 1993 bari hano."

Mu gihe ngo abo basirikare babaga bafasha ingabo za Habyarimana guhangana n’ibitero bya RPA, muri politiki ngo MRND yari igeze kure inoza umugambi wa Jenoside.

Na mbere hose kandi ngo ubwicanyi bwari bwarageragejwe, abatutsi bakicwa bitwa abanzi b’igihugu.

U Bufaransa ngo bwari bufite amakuru ahagije ko Jenoside yategurwaga, umuntu ugerageje gutanga amakuru yatuma ibintu bigenda uko badasahaka akavanwaho.

Amb Anfré yakomeje ati "Nari umudipolomate muto, ari nari uwa kabiri i Kampala kuva mu 1987 kugeza muri Mata 1991. Muri Gicurasi nasubiye mu Bufaransa nandika raporo ko turimo kunyura mu nzira itari yo mu Rwanda, ndetse ko hari ibyago turimo kugana ahantu habi cyane, aho abantu miliyoni bashoboraga kwicwa mu minsi 100."

Muri icyo gihe ngo yarabibonaga ko "RPF ifite umuhate wo gutsinda" urugamba, nubwo mu ntangiro yari yarananiwe.

Yakomeje ati "Nakomeje kuvuga ko umunsi umwe RPF izafata ubutegetsi i Kigali, kandi nari nzi ko uko intambara itinda ari nako abantu benshi bazapfa. Narabibonaga nk’umudipolomate ukiri muto, nari narabonye uko NRA yarwanye ngo igere ku butegetsi."

Ubwo intambara yatangiraga ngo akabona uko abategetsi bo mu Rwanda bakomeje kugendera ku iturufu y’ubwoko, ngo byarushagaho kuzamura amakenga.

Yavuze ko mu Bufaransa hari itsinda rito ry’abantu batabonaga ibintu uko biri bahumwe amaso no gushaka kuzamurwa mu ntera, bemera ko ibyo bikorwa bikomeza, bagakora isesengura ripfuye ku butegetsi bwa Habyarimana.

Icyo gihe ngo iryo tsinda ryo mu Bufaransa ryavugaga ko ubutegetsi bwa Habyarimana bugendera kuri demokarasi kuko bwashyizeho amashyaka menshi nyamara arimo CDR na Hutu Power, ndetse ngo bwemera ubwisanzure bwo gutanga ibitekerezo kubera ko babonaga Radio RTLM na Kangura.

Amb Anfré yakomeje ati "Bahisemo kutareba ibyo byose, abantu bari mu Bufaransa batangaga intabaza baracecekeshwaga, kuko bumvaga ko hatabayeho ubufasha bw’u Bufaransa, ubutegetsi bwa Habyarimana buba bwarahirimye, hari gupfa abantu ariko ubutegetsi bwe bugahirima."

Muri icyo gihe kandi ngo Amerika yari imaze guhura n’ibibazo muri Somalia ipfusha abasirikare, bisa n’aho Perezida Bill Clinton adashaka kwinjira mu byaberaga mu Rwanda.

Ubwo Jenoside yari imaze guhagarikwa na RPF, nabwo ngo habayeho andi makosa yatumye abakoraga Jenoside babasha kwambuka umupaka wa RDC bafite intwaro zabo. N’ubu ingaruka z’ibikorwa byabo zirakomeje.

Ni jenoside yakozwe n’abanyarwanda

Ambasaderi Anfré yavuze ko RPF yakomeje urugamba ibasha guharika Jenoside, nubwo hari benshi bari bamaze kwicwa.

Gusa yavuze ko nubwo u Bufaransa bwagize uruhare muri ayo mateka, jenoside yakozwe n’abanyarwanda ubwabo.

Yakomeje ati "Ni Jenoside yakozwe n’Abanyarwanda, ariko yanahagaritswe n’abanyarwanda. Biragaragara ko umuryango mpuzamahanga, u Bufaransa mbere na mbere, bwarebeye Jenoside yashoboraga kwirindwa."

"Ariko ntabwo Jenoside yateguwe n’Abafaransa, ahubwo yateguwe n’abanyarwanda, bamwe muri bo baje no gucirwa imanza i Arusha, abandi mu Bufaransa, ndetse bamwe baracyaba mu Bufaransa batarimo kuburanishwa…"

Ambasaderi Anfré yavuze ko u Bufaransa bwakomeje guhakana uruhare rwabwo muri Jenoside, ariko igihe cyageze ngo bihagarare.

Ati "Twese tuzi ibyabaye hano. Hari ibyagaragajwe na Komisiyo Duclet yashyizweho na perezida wa repubulika, mu gihe cy’imyaka ibiri yarebye mu nyandiko zari zibitswe, ishakisha uruhare rw’u Bufaransa muri Jenoside. Iyo komisiyo yaje kwemeza ko u Bufaransa bwagize uruhare rukomeye mu bikorwa byagejeje kuri Jenoside."

Yavuze ko ubumenyi kuri Jenoside buzakomeza kujya ahabona no gusangirwa, kuko bitanga umusanzu mu kurwanya abahakana n’abayipfobya.

Ikindi ni uko ngo u Bufaransa burimo kugerageza kongera imbaraga mu gutanga ubutabera kuri Jenoside, binyuze mu manza zikomeza kubera i Paris.

Mu ziheruka harimo urwa Claude Muhayimana wakatiwe gufungwa imyaka 14 mu Ukuboza 2021, Laurent Bucyibaruya urimo kuburanishwa n’abandi.

Amb. Anfré yakomeje ati “Dushaka kugira urubanza ruburanishwa nibura buri mezi atandatu, bishobora kuba bidahagije ariko ni imbaraga zishyirwamo n’ubuyobozi hamwe na Polisi, ubucamanza, ku buryo ubutabera bw’u Bufaransa n’ubwo mu Rwanda bufatanye muri izi nzego."

Ahazaza h’u Rwanda n’u Bufaransa

Ambasaderi Anfré yavuze ko hakenewe gukomeza guteza imbere umubano w’u Rwanda n’u Bufaransa, cyane ko hari imishinga myinshi iteganywa mu bufatanye bw’ibi biguhugu byombi.

Yavuze ko mu bihe biri imbere hari amahirwe yo gufatanya binyuze mu guteza imbere ururimi rw’Igifaransa n’indi mishinga ibihugu byombi bishobora gufatanyamo

Ati "U Bufaransa burifuza kugaruka mu murongo neza mu Rwanda, kandi uruzinduko rwa Perezida Macron no kwemera uruhare rw’u Bufaransa, byari ingenzi cyane ku buryo noneho dushobora kureba imbere nyuma yo kwemeranya n’ahahise hacu."

Yavuze ko hari ibikorwa byinshi igihugu cye giteganya nko mu kwigisha Igifaransa no gufatanya mu mishinga igihugu gifite irimo ubwikorezi, ibijyanye n’imari, kwakira inama n’imikino.

Yanavuze ko shampiyona y’amagare izabera mu Rwanda mu 2025, izaba ari ubwa mbere ibereye muri Afurika.

Ni igikorwa ibihugu byombi bizafatanyamo, nyuma y’igihe ibi bihugu bifatanya mu gutegura Tour du Rwanda.

U Bufaransa buheruka kwemera guha u Rwanda miliyoni $500 kugera mu 2023. Kuva mu 2019 kugeza ubu, Ikigega cy’Abafaransa cy’Iterambere (Groupe AFD) kimaze guha u Rwanda miliyoni 218 z’amayero.

Ambasaderi Anfré ahamya ko u Bufaransa ari bwo bwatumye ubutegetsi bwa Habyarimana butinda guhirima
Iki kiganiro kijyanye no kwibuka ku nshuro ya 28 Jenoside yakorewe Abatutsi mu 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .