00:00:00 IGIHE NETWORK KN KINYARWANDA EN ENGLISH FR FRANCAIS

Ibyitezwe mu masezerano kaminuza zo mu Rwanda zasinyanye n’izo muri Pologne

Yanditswe na Igizeneza Jean Désiré
Kuya 6 Ukuboza 2022 saa 12:29
Yasuwe :

Kaminuza zo muri Pologne n’izo mu Rwanda zasinyanye amasezerano y’imikoranire, azafasha abanyeshuri, abarimu ndetse n’abandi bakozi b’izo kaminuza kubona serivisi zibafasha kwiga no gukora ubushakashatsi ku buryo bworoshye.

Ni amasezerano yasinywe kuri uyu wa Mbere tariki 5 Ukwakira 2022, ubwo i Kigali hatangizwaga ihuriro ry’iminsi ibiri rigamije guteza imbere ubufatanye mu by’uburezi kuri izo kaminuza mu mashami atandukanye.

Ni ihuriro ryitabiriwe n’abayobozi batandukanye ku mpande zombi barimo Minisitiri w’Uburezi, Dr Uwamariya Valentine, Minisitiri wungirije w’Ububanyi n’Amahanga wa Pologne, Pawel Jabłoński n’abandi bayobozi ba za kaminuza zitandukanye.

Ni ubufatanye bukubiyemo guhugurana hagati y’abashakashatsi ku mpande zombi, korohereza abanyeshuri b’Abanyarwanda bajya kwiga muri Pologne mu byiciro byisumbuye, ndetse byanakunda kaminuza zo muri Pologne zikaba zafungura amashami mu Rwanda.

Harimo kandi guhurira ku bushakashatsi runaka, aho abashakashatsi b’ibihugu byombi bagira uruhare mu gukemura ikibazo runaka, ndetse no guhanahana abarimu.

Nk’urugero, izi kaminuza zo muri Pologne ziri gukora ubushakashatsi mu gukora umutima w’umukorano. Buramutse buhuriweho byakongerera ubumenyi n’abo mu Rwanda cyane ko buba buhenze.

Ku ikubitiro, kaminuza zasinyanye amasezerano zo mu Rwanda harimo Kaminuza y’u Rwanda, Ishuri rikuru ry’u Rwanda ry’Imyuga n’Ubumenyingiro (RP) n’Ishuri Rikuru ry’Ubumenyingiro rya INES Ruhengeri.

Hateganijwe kandi ko Kaminuza y’Abalayiki b’Abadivantisite ya Kigali (UNILAK), Kaminuza y’Ikoranabuhanga n’Ubugeni ya Byumba (UTAB), Kaminuza ya Kigali n’izindi nazo zigirana amasezerano nk’aya mu gihe ibiganiro byaba bigenda neza.

Umuyobozi wa Kaminuza y’u Rwanda Dr Muganga Kayihura Didas yavuze ko ari amasezerano yari akenewe cyane kuko ibiyakubiyemo byari bikomeye kuba kaminuza imwe yabigeraho yonyine, kuko bisaba ubushobozi bwisumbuye.

Ati "Turashaka gukorana ku buryo abashakashatsi bacu bagera kuri urwo rwego, aho abakozi bacu bazubakirwa ubushobozi mu buryo butandukanye binyuze mu mishinga igirira akamaro abanyeshuri n’Abanyarwanda muri rusange."

Kaminuza za Pologne zaje gufatanya n’izo mu Rwanda ni umunani, buri imwe ikaba ifite umwihariko wayo kuko harimo izigisha ibijyane n’ubukungu, ubuhinzi, ubucuruzi, ubuvuzi, farumasi, ikoranabuganga n’ibindi.

Muri izo umunani harimo Kaminuza y’Ubumenyi n’Ikoranabuhanga ya Agh, Jagiellonian Universiry, Kaminuza y’Ubukungu ya Cracow , Kaminuza ya Zielona Gora, Kaminuza y’Ikoranabuhanag ya Lodz, Kaminuza ya Warsaw, Kaminuza y’Ikoranabuhanga ya Silesia na Kaminuza ya Szczecin.

Dr Marta Mendel wo muri Kaminuza ya Warsaw, yavuze ko mu gihe aya masezerano azaba atangiye gushyirwa mu bikorwa hitezwe ko imbogamizi zitandukanye zibarizwa mu rwego rw’ubushakashatsi zizabonerwa ibisubizo.

Ati "Nk’ubu ibibazo by’ihindagurika ry’ibihe rishobora gutuma hangirika urusobe rw’ibinyabuzima, icyo ni ikibazo kigomba gukorwaho mu maguru mashya binyuze muri ubu bufatanye. Ikindi u Rwanda rugomba kuba igihugu cyihagije mu bijyanye n’ibiribwa, bizagerwaho mu gihe impande zombi zizabigiramo uruhare."

Mu myaka ine ishize abarenga ibihumbi bine bamaze kujya kwiga muri Pologne.

Minisitiri Jabłoński akavuga ko impamvu z’aya masezerano ari uko babonye ubuhanga n’ubunyamwuga aba banyeshuri bagaragaje, bityo ko ari ngombwa guha imbaraga ubufatanye nk’ubu.

Minisiteri w’Uburezi, Dr Uwamariya Valentine yavuze ko aya masezerano y’imikoranire azoroshya ibibazo abiga muri Pologne bahuraga nabyo birimo igihe umunyeshuri yateganyirizwaga kubayo, kuko byabaga bigoye.

Dr Uwamariya yavuze ko ikibazo cy’abagiye babura ibyangombwa akenshi byaterwaga n’uko abenshi batabaga bafite ibisabwa bityo hakaba hanzuwe ko abazajya bajya kwiga muri iki gihugu ari abujuje byose bisabwa birimo no kuba ari abahanga.

Uburezi bwo muri Pologne bugezweho kandi ntabwo buhenze cyane, bigatuma Abanyarwanda bajya kuhiga ari benshi kuko nko kugeza ubu hari abanyeshuri 1200 biga muri iki gihugu mu mashami atandukanye.

Uretse aya masezerano, u Rwanda na Pologne bifitanye umubano ushingiye ku bufatanye mu bucuruzi kuko nko mu 2016 itsinda ry’abashoramari bahagarariye ibigo 10 byo muri Pologne bikora mu bijyanye no gutunganya umusaruro ukomoka ku buhinzi n’ubworozi, ikoranabuhanga, ubuvuzi n’iby’imiti, ndetse n’abatanga serivisi zo kwakira abantu bagiriye uruzinduko mu Rwanda.

Ishuri rikuru ry'u Rwanda ry'Imyuga n'Ubumenyingiro (RP) naryo ryasinyanye amasezerano na kaminuza zo muri Pologne
Dr Marta Mendel (iburyo) wo muri Kaminuza ya Warsaw n'Umuyobozi wa Kaminuza y'u Rwanda Dr Muganga Kayihura Didas bamaze gusinyana amasezerano
Minisitiri w'Uburezi, Dr Uwamariya Valentine yavuze ko aya masezerano y'imikoranire azoroshya ibibazo abiga muri Pologne bahuraga nabyo
Kaminuza umunani zo muri Pologne nizo zasinyanye amasezerano n'izo mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .