Ibyishimo ni byose! Abatsinze mu irushanwa ’Capture Rwanda’ bashyikirijwe ibihembo (Amafoto)

Yanditswe na Uwiduhaye Theos
Kuya 12 Ugushyingo 2020 saa 07:47
Yasuwe :
0 0

Abongereza bajya bavuga ngo "A picture is worth a thousand words", ariko byo nti baba bibeshye kuko koko ifoto imwe ushobora kuyisobanura ukandika akayabo k’amagambo.

Mu gihe cy’amezi hafi abiri ashize, abanyempano mu gufotora amagana batuye mu Rwanda no hanze yarwo bitabiriye irushanwa ngarukamwaka ryiswe "Capture Rwanda" baryinjizamo amafoto yabo yuje ubwiza n’ubuhanga. Bane muri bo bahize abandi bamenyekanye mu mpera z’icyumweru gishize, ku gicamunsi cyo kuri uyu wa Gatatu bashyikirizwa ibihembo.

Abegukanye ibihembo barimo Simbi Yvan wabaye uwa mbere, Isimbi Kamanda Assumpta wabaye uwa kabiri, Ntwali Yvan wabaye uwa gatatu na Bruce Niyomwungeri wegukanye umwanya wa kane biturutse ku kuba ifoto ye yarakunzwe n’abantu benshi ku mbuga nkoranyambaga.

Abegukanye intsinzi uko ari bane ntabwo bize ibirebana no gufotora mu mashuri yabugenewe ariko ni intyoza muri uyu mwuga! Simbi, Kamanda, Ntwali na Niyomwungeri baje ku isonga mu bitabiriye irushanwa bose bagera kuri 326 kubera ubuhanga ntagereranywa amafoto yabo yafatanywe, byiyongera ku bisobanuro bifatika buri imwe muri zo ifite.

Umuyobozi w’Akanama Nkemurampaka mu irushanwa ’Capture Rwanda’, Ines Olga Ishimwe, yatangaje ko guhitamo amafoto meza kurusha andi bitari byoroshye kuko irushanwa ryitabiriwe n’abanyempano benshi.

Simbi Yvan wabaye uwa mbere abikesheje ifoto y’umugabo uri gukurura akameza inyuma ye hari gushya, yabwiye IGIHE ko ajya mu irushanwa yizeraga gutsinda ariko akumva bizaba ari amahirwe.

Yagize ati “Kuba uwa mbere nabyakiriye neza. Biranshimisha kuko aricyo gikorwa cya mbere kijyanye no guhemba ba gafotozi cyari kibaye mu Rwanda guteguye neza kandi gishobora kuba cyafasha umuntu witabiriye. Njya kujyamo numvaga mfite icyizere cy’uko natsinda ariko ntumva nzaba uwa mbere. Numvaga ari amahirwe.”

Ati “Kuba uwa mbere ikintu bivuze ni ukuntera imbaraga zo gukomeza nkakora cyane mu kubaka izina. Aya mahirwe agiye gutuma nkomeza gukora byinshi byiza. Ndashimira cyane StoryKast yatekereje iki gikorwa.”

Buri umwe mu batsinze afitanye n’umwuga wo gufotora amateka yihariye...

Simbi Yvan wabaye uwa mbere muri iri rushanwa amaze imyaka ine muri uyu mwuga, yavuze ko umwe mu bantu batumye akunda ibijyanye no gufotora barimo Umunyarwanda witwa Gaël Ruboneka Vande Weghe ukunze gufotora ibidukikije n’Umwongereza Daniel Robert Eldon wakoraga itangazamakuru ryo gufotora, mu 1993 akaza kwicirwa muri Somalia ubwo yafotoreraga Ikinyamakuru cya Reuters.

Simbi Yvan avuga ko yarebye filime mbarankuru zimuvugaho akamukunda. Mu mafoto ye, imwe muri yo akunda ni iyo yafotoye ku Rutare rwa Ndaba.

Yemeza ko impamvu ayikunda cyane ari uko ariyo foto ye ya mbere yaguzwe, ubwo Madamu Jeannette Kagame yayishimiraga akayigura muri ArtRwanda- Ubuhanzi. Ikindi iri mu zamugoye gufata kuko yakoresheje Canon 5D Mark III.

Intego y’uyu musore ni ukubara inkuru neza yifashishije gufotora. Avuga ko akunda gufotora ahantu hagaragaza ubwiza nyaburanga n’urusobe rw’ibinyabuzima.

Asobanura ko gufotora bivuze byinshi kuri we birimo kuba bifasha kubika urwibutso rukomeye rw’ikintu runaka, bishobora gufasha mu kubara inkuru bigatuma abantu bamenya cyangwa bakumva icyo batari baramenye mbere, ndetse iyo nkuru ikaba yagira icyo ihindura mu buzima bwabo.

Avuga ko ikintu cyamuteye imbaraga zo gukunda gufotora ari sekuru wari umunyamwuga muri byose akavuga ko ariyo mpamvu akunda gukoresha izina ry’umuryango ‘Rudahusha’.

Ngo ntabwo yigeze yiga gufotora ariko yize amasomo y’igihe gito mu bijyanye n’itangazamakuru ryo gufotora.

Isimbi Kamanda Assumpta wabaye uwa kabiri akunda byimazeyo Nadège Karemera Imbabazi uri mu bakobwa bamaze kugera kure mu mwuga wo gufotora, ndetse anavuga ko ariwe afatiraho urugero.

Avuga ku mpamvu yahisemo umwuga wo gufotora akenshi utisukirwa n’abakobwa, yagize ati “Nahisemo uyu mwuga kubera ko nashakaga kugaragaza ibindimo ndetse nkavugira n’abatagira kivugira.”

Ifoto ye akunda ni iyo yafotoye ku kibuga cy’indege ubwo kompanyi Jambo Jet yatangizaga ingendo zayo mu Rwanda. Iyi foto yagaragazaga umuntu ari kuyobora indege. Ubu akoresha Canon 6D Mark II.

Uyu mukobwa amaze imyaka itanu akora umwuga wo gufotora ariko yatangiye kubikora by’umwuga mu 2019. Mu gufotora kwe akunda cyane kwibanda ku miterere y’Isi, ariko ubu akora ibijyanye no gufotora ibikorwa bitandukanye nk’ibitaramo by’abahanzi n’ibindi.

Avuga ko gufotora kuri we bivuze ikintu kinini, ati “Umwuga wo gufotora kuri njye usobanuye byose nshaka kubamo kugeza mvuye ku Isi! Niyo nifashisha ngaragaza ibyiyumviro byanjye.”

Nta shuri yigeze abyigamo ariko ubu ari gufata amasomo ndetse yanagiye ayafata mu bihe bitandukanye kugira ngo yiyungure ubumenyi.

Abajijwe ikintu kiruhije kiri mu mwuga wo gufotora kuri we, yasubije ati “Ntabwo mbona ikintu kiruhije kiri mu kuba gafotozi wenda bishobora kuba ari ibintu nkunda kandi niyumvamo, gusa navuga ko kuba umukobwa bishobora kuba imbogamizi kuri njye.”

Ntwali Yvan wabaye uwa gatatu we avuga ko umuntu watumye akunda cyane ibijyanye no gufotora ari Plaisir Muzogeye.

Abajijwe impamvu yahisemo umwuga wo gufotora yasubije ko atibona nka gafotozi ubu, ati “Ntabwo nakwiyita gafotozi, gusa ntekereza ko ari itangiriro ry’urugendo rwo kumuba.”

Imwe mu mafoto ye akunda ni iyamuhesheje amahirwe yo kuba uwa gatatu muri ‘Capture Rwanda’. Iyi foto igaragaza umuntu uri ku igare, yafatiwe mu Karere ka Kamonyi, aho byamufashe igihe kirenga isaha ngo ayifate.

Avuga ko telefoni ye yo mu bwoko bwa iPhone 8 nayo ayifata nka camera akunda gukoresha. Afite intumbero yo kuzafata ifoto ikamamara nk’igihangano cya Mona Lisa cyashushanyijwe n’umunyabugeni Leonardo da Vinci.

Avuga ko afata gufotora nk’inzira ishobora gufasha umuntu guhura n’abantu bakunda ubugeni ndetse n’ubwiza. Ati “Ni igikorwa gisekeje iyo umuntu afashe ibihe bifite agaciro gakomeye cyangwa se amarangamutima.”

Uyu musore na we icyo ahurizaho na bagenzi ntaho yize ibyo gufotora. Kuba yaratsinze muri Capture Rwanda abifata nka kimwe mu byamuteye imbaraga, zo gukora cyane agahinduka umufotozi mwiza kurushaho. Imbomizi kuri we ni ukubona ahantu umuntu afatira amafoto.

Niyomwungeri Bruce wegukanye umwanya wa kane ifoto ye yamuhesheje amahirwe biturutse ku kuba yarakunzwe n’abantu benshi ku mbuga nkoranyambaga. Yakunzwe (likes) n’abantu 5690 itangwaho ibitekerezo 288.

Iyi foto yafashwe ku mugoroba igaragaza ibishashi by’umurabyo.

Avuga ko yahisemo gukora ibyo gufotora nk’umwuga kuko we ku giti cye abikunda ndetse bikaba byarabaye akarusho kubera mukuru we wagiye amuhugura.

Avuga ko akunda ‘wide angle lens’ kuko ifasha mu gufata ibintu byinshi kandi birimo udushya. Akunda gukoresha Canon Mark IV cyangwa se camera za Mark III. Yatangiye ibyo gufotora mu 2019. Nawe nta shuri yigeze abyigamo.

Avuga ko imbogamizi ikunze kuba mu mwuga wo gufotora, we abona ari ukuba umufotozi ariko nta bikoresho byiza ufite kuko ari umwuga usaba kugira ibikoresho byiza n’ubumenyi.

Irushanwa rya ‘Capture Rwanda’ ryabaye ku nshuro ya mbere, StoryKast iritegura ifite intego yo kuzarikomeza no mu myaka iri imbere, mu rwego rwo kubahisha no kumenyekanisha umwuga wo gufotora mu Rwanda.

StoryKast itegura iri rushanwa ni ikigo nyarwanda gifite ubunararibonye mu gufata no gutunganya amafoto ndetse n’amashusho.

Inzobere za StoryKast zandika inkuru, zikayinyuza mu buryo bw’amafoto n’amashusho ku buryo bunyura ababireba. Iki kigo kandi gikorana n’ibindi bigo byifuza kugeza ku babikurikira ubutumwa bwuje ubuhanga, bunyujijwe mu mafoto n’amashusho.

Uwa mbere muri iri rushanwa yahawe 300 000 Frw na iPad, uwa kabiri ahabwa 200 000 Frw mu gihe uwa gatatu yahawe 100 000 Frw. Uwa kane nawe yahawe 100 000 Frw na Airpods Pro.

Abatsinze nyuma yo guhabwa ibihembo byabo bafashe ifoto n'Umuyobozi wa StoryKast
Bruce Niyomwungeri wegukanye umwanya wa kane afite impamyabushobozi ye
Ntwali Yvan wabaye uwa gatatu muri Capture Rwanda afite impamyabushobozi ye
Ntwali Yvan wabaye uwa gatatu muri Capture Rwanda yari afite akanyamuneza
Simbi Yvan wabaye uwa mbere ubwo yazaga gufata ibihembo bye
Simbi Yvan wabaye uwa mbere wabaye uwa mbere yahawe ishimwe ry'amafaranga, igikombe ndetse n'impamyabushobozi
Simbi Yvan yahawe ibihembo bitandukanye biherekejwe n'impamyabushobozi
Simbi Yvan yahawe na sheki ya 300 000 Frw
Igikombe cyahawe Simbi Yvan wabaye uwa mbere
Isimbi Kamanda Assumpta wabaye uwa kabiri muri iri rushanwa ubwo yazaga gufata ibihembo bye
Isimbi Kamanda Assumpta wabaye uwa kabiri muri iri rushanwa yahawe ibihembo biherekejwe n'impamyabushobozi
Umuyobozi wa StoryKast, Olga Ines (ibumoso) ari kumwe na Simbi Yvan wabaye uwa mbere
Umuyobozi wa StoryKast Olga Ines niwe watanze ibi bihembo
Uko ari bane babashije gutsinda abandi bagenzi babo barenga 300
Ifoto ya Bruce Niyomwungeri wabaye uwa kane Iyi yatsinze nyuma yo gutorwa cyane ku mbuga nkoranyambaga
Ifoto ya Isimbi Kamanda Assumpta wegukanye umwanya wa kabiri
Ifoto ya Ntwali Yvan wabaye uwa gatatu
Ifoto ya Simbi Yvan wabaye uwa mbere mu irushanwa rya Capture Rwanda rigamije kuvumbura abanyempano mu gufotora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .