Ibyishimo n’umubabaro w’ibigeragezo ku banyarwanda icyenda barekuwe na Uganda (Amafoto na Video)

Yanditswe na Philbert Girinema
Kuya 9 Mutarama 2020 saa 05:42
Yasuwe :
0 0

Saa sita n’iminota irindwi z’ijoro nibwo Abanyarwanda icyenda bari bamaze imyaka igera kuri itatu kuri bamwe bafungiye muri Uganda bageze ku mupaka wa Gatuna nyuma y’uko barekuwe n’Urukiko rwa Gisirikare rwa Makindye kuri uyu wa Kabiri.

Bageze ku mupaka wa Gatuna baherekejwe n’abayobozi babiri ba Uganda bayobowe n’Umuyobozi w’agateganyo wa Komisiyo ishinzwe iyubahirizwa ry’amategeko, Bwesigye Marcellino.

Ubwo bageraga ku mupaka, wabonaga bafite akanyamuneza k’uko bishimiye gutaha iwabo nyuma y’igihe bari mu buzima bubi.

Bwesigye yavuze ko Uganda yafashe umwanzuro wo guhagarika kubakurikirana nk’inzira imwe yo kubahiriza amasezerano ya Luanda yasinywe n’abakuru b’ibihugu byombi umwaka ushize.

Abarekuwe ni Rene Rutagungira, Herman Nzeyimana, Nelson Mugabo, Etienne Nsanzabahizi, Emmanuel Rwamucyo, Augustin Rutayisire, Adrien Munyagabe, Gilbert Urayeneza na Claude Iyakaremye.

Nyuma yo kugera mu Rwanda kuri uyu wa Kane, Rutagungira uri mu banyarwanda ba mbere bashimutiwe i Kampala, yavuze ko yafashwe ku wa 05 Nyakanga 2017 afungwa amezi atatu muri Gereza z’Urwego rushinzwe iperereza mu gisirikare, CMI.

Aho ngo yaje kuhava ajyanwa mu rukiko aregwa hamwe n’abandi. Ariko mu gihe cyose yamaze afunzwe, iminsi yose yakorewe iyicarubozo rikomeye.

Ati “Ibyanjye ni ibintu biri hanze nabo barabizi kuko narabareze. Baraje bansanga mu gisivili, mu gisivili rero ntibahuza neza kubera amakosa baba bakora. Bazanye abaganga b’abasivili n’abasirikare, baza kwemeza ko nakorewe iyicarubozo cyane.”

Kubera uburyo aba banyarwanda bakorewe iyicarubozo, kimwe mu by’ibanze bagomba kuza gukorerwa ni isuzuma ry’ubuzima kubera ubuzima bukomeye babayemo muri gereza kugira ngo uwaba afite ikibazo yitabweho hakiri kare.

Kuri Rutagungira, yavuze ko kuva yafungwa, ibyumweru bibiri byonyine aribyo yabayeho abona izuba kuko ubundi yahoraga mu nzu.

Ati “Kuva nafungwa, nari mu cyumba aho ngaho. Ibyumweru bibiri nibwo maze mbona nk’izuba, ubwo mbonye umwanya ngomba kujya gukora ibizamini by’ubuzma.”

Rutagungira yashimye leta y’u Rwanda kuba yarakurikiranye abaturage bayo kuko iyo bitaba ashobora kuba atagize amahirwe yo kongera kugaruka mu gihugu cyamubyaye.

Undi warekuwe ni uwitwa Mugabo Nelson wo mu Karere ka Nyagatare mu Murenge wa Tabagwe. Yavuze ko yafatiwe muri Uganda tariki 18 Mutarama 2018.

Icyo gihe yari yagiye mu bikorwa by’ubucuruzi nyuma akorerwa ihohoterwa rikomeye.

Ati “ Bamfashe banshinja ko nshobora kuba ndi intasi y’u Rwanda. Nabaga mu mwobo, abandi bazaga bakagenda, bamwe nikanze mpura nabo uyu munsi nari nziko banatashye kera.”

Mugabo yavuze ko mu mwaka ushize, yamaze amezi ane atagenda kubera ingaruka z’inkoni yari yarakubiswe zikamukurizamo ubumuga.

Ati “Badukoreye byinshi, njye ndi umwe mu bakorewe byinshi. Mu 2019 guhera mu kwezi kwa mbere kugera mu kwa kane, ntabwo nagendaga, naraterurwaga nararemaye kubera ingaruka z’inkoni. Ubuzima ntabwo mbwizeye neza.”

Mugabo yageze muri Gereza muri Uganda afite imyaka 39, atashye afite 41. Yasize umugore n’abana batanu, abaheruka umunsi yagiye muri Uganda, ntazi uko babayeho mu buzima atari ahari.

Saa sita z'ijoro nibwo aba banyarwanda bagejejwe mu gihugu n'abayobozi ba Uganda bayobowe na Komiseri w'Agateganyo ukuriye urwego rushinzwe igenzura n'iyubahirizwa ry'amategeko
Rene Rutagungira aganira na Rutayisire Augustin nawe warekuwe. Aha bari ku mupaka wa Gatuna bategereje ko burizwa imodoka ibageza mu mujyi wa Kigali
Imbeho yari nyinshi i Gatuna, ariko ntiyari ibateye ubwoba
Bwesigye Marcellino wari uyobora itsinda ry'abayobozi ba Uganda bashyikirije u Rwanda aba banyarwanda
Akanyamuneza kari kose kuri Rutagungira nyuma y'imyaka itatu mu buzima bushaririye muri gereza za CMI
Mugabo Nelson wo mu Karere ka Nyagatare mu Murenge wa Tabagwe, yafatiwe muri Uganda tariki 18 Mutarama 2018
Aba banyarwanda barekuwe nyuma y'uko Urukiko rwa Gisirikare ruhagaritse kubakurikirana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza