00:00:00 IGIHE NETWORK KN KINYARWANDA EN ENGLISH FR FRANCAIS

Ibyatangiye guhinduka muri AU biturutse ku mavugurura yayobowe na Perezida Kagame kuva mu 2016

Yanditswe na IGIHE
Kuya 8 Gashyantare 2021 saa 07:18
Yasuwe :
0 0

Muri Nyakanga 2016 ni bwo Perezida Kagame yahawe inshingano zo gutegura no gukurikirana amavugurura akenewe mu Muryango wa Afurika Yunze Ubumwe kugira ngo ibashe kugeza AU ku cyerekezo yihaye cya 2063.

Umukuru w’Igihugu yaherewe izi nshingano mu Nama ya 27 ya AU yabereye i Kigali muri Nyakanga 2016, ahita anatoranya inararibonye icyenda zamufashije muri ako kazi.

Mu mavugururwa yakozwe muri AU harimo ko uyu muryango waharanira kwigira, buri gihugu kikajya gitanga 0.2% by’umusoro w’ibicyinjiramo.

Mu nzego zari zikeneye amavugurura harimo imikorere ya Komisiyo ya AU, uburyo bwo gupima uko inzego zigera ku byo ziyemeje, kwishakamo ubushobozi nk’ibihugu bihuriye mu muryango, uko abayobozi bahagararirwa mu nama za AU n’ibindi.

Mu nama yabereye mu muhezo muri Ethiopia ku wa 29 Mutarama 2017, Perezida Kagame yagaragarije abakuru b’ibihugu bigize AU ko hari ikibazo cyo kuba imiryango ishamikiye kuri AU itagaragaza neza uko igabana inshingano n’Abanyafurika bakaba batabona akamaro k’uyu muryango. Bijyana no kuba kenshi abakuru b’ibihugu bakorana inama, bakumvikana ku myanzuro ariko ntishyirwe mu bikorwa.

Yavuze ko kugira ngo imyanzuro ifatirwa mu nama za AU irusheho gushyirwa mu bikorwa, hakwiye kubaho uburyo abayobozi basimburana ku rwego rw’abakuru b’ibihugu, utahiwe akazajya atorwa mbere y’umwaka umwe.

Muri aya mavugurura, Perezida Kagame n’itsinda rye bagaragaje ibibazo bituma imikorere ya AU idatanga umusaruro, bavuga ko kuba umuryango ufite intego ushaka kugeraho nyinshi icyarimwe, inzego zawo zikaba zitagira imikorere isobanutse neza ndetse nta n’uburyo bw’amafaranga bukunze guteganywa mu gutera inkunga imishinga y’Umuryango, ari imbogamizi zikomeye.

Hanzuwe ko hashyirwaho Komite ikurikirana neza ishyirwa mu bikorwa ry’aya mavugurura ndetse uyu mwanzuro washyizwe mu bikorwa kuko muri Nzeri 2017, Prof. Pierre Moukoko Mbonjou na Ciru Mwaura bashyizweho nk’abayobozi b’urwego rushya rushinzwe gukurikirana ishyirwa mu bikorwa ry’aya mavugurura.

Aya mavugurura yitezweho kugaragaza impinduka muri AU, yanaganiriweho mu Nama y’Abakuru b’Ibihugu ya 34 y’Umuryango wa Afurika Yunze yatangiye ku wa Gatandatu, tariki ya 6 Gashyantare 2021.

Muri iyi nama ni ho hatangarijwe ko Moussa Faki Mahamat yatorewe gukomeza kuba Umuyobozi wa Komisiyo ya AU, biba ubwa mbere kuva amavugurura y’Umuryango wa Afurika Yunze Ubumwe atangiye mu 2016, hashyizweho umuyobozi binyuze mu matora.

Iyi nama yabaye hifashishijwe ikoranabuhanga ni nayo yabereyemo ihererekanyabubasha hagati ya Perezida wa Afurika y’Epfo, Cyril Ramaphosa na mugenzi we wa Repubulika Iharanira Demokarasi ya Congo, Félix Tshisekedi.

Prof. Pierre Moukoko Mbonjou wabaye Minisitiri w’Ububanyi n’Amahanga wa Cameroun uri mu bayobozi b’urwego rushya rukurikirana ishyirwa mu bikorwa ry’amavugurura muri AU yavuze ko ageze ku musozo.

Ati “Turi hafi gusoza urugendo rwatangiye muri Kamena 2016.’’

Izi mpinduka zitezweho gufasha Umuryango wa Afurika Yunze Ubumwe kunoza imikorere no kwibanda ku bikorwa byawo by’ingenzi.

Perezida Paul Kagame yashyizeho itsinda ry’abahanga bamufashije kunoza raporo ku mavugurura akenewe mu mikorere y’Umuryango wa Afurika Yunze Ubumwe (AU)

-  Ishyirwaho ry’abakozi mu nshingano

Ibwiriza ririho rigena Moussa Faki Mahamat wongeye gutorerwa kuyobora Komisiyo ya AU yungirijwe na Visi Perezida.

Kuko Moussa Faki Mahamat yari umukandida rukumbi kuri uwo mwanya kandi agomba kungirizwa n’umugore byari ihame ko manda y’Umunya-Ghana, Kwesi Quartey nka Visi Perezida itazavugururwa.

U Rwanda rwatanze Dr Nsanzabaganwa Monique usanzwe ari Umuyobozi Wungirije wa Banki Nkuru y’Igihugu (BNR) ku mwanya wa Visi Perezida wa Komisiyo ya AU; uyu munyapolitiki usanzwe ari intiti mu by’imari n’ubukungu yatowe ku majwi 42 muri 55.

Iri tegeko kandi niryo ryubahirijwe mu matora y’abakomiseri ba AU mu miryango y’ubukungu itandukanye.

Mu mavugurura mashya hashyizweho ibigenderwaho mu guhitamo abayobozi ndetse yatangiye kubahirizwa. Mu kuvugurura manda z’abanyamuryango ba komisiyo, abakuru b’ibihugu banagennye ibigenderwaho muri buri cyiciro.

Mu mavugurura kandi Komisiyo yagabanyije umubare w’abayobozi bayo, bava ku 10 (Perezida, Visi Perezida n’abakomiseri umunani), baba umunani (Perezida, umuyobozi mukuru wungirije n’abakomiseri batandatu).

Mu gushyiraho abayobozi ba Komisiyo ya AU, buri gice (Region) muri bitanu gitanga abakandida mu buryo bwubahirije ihame ry’uburinganire kandi hakabaho guhinduranya bigendeye kuri itonde ry’inyuguti.

Mu mpera za Gicurasi ni bwo inyandiko zoherejwe mu biro bya Komiseri ushinzwe Amategeko, amenyesha abanyamuryango ba AU ko bashobora gutanga kandidatire zabo. Bahawe amezi atatu yo gutanga kandidatire bazinyujije mu biro bya ba ambasaderi muri AU mu turere n’uduce baherereyemo mbere yo gushyikiriza abagomba kuzigaho.

-  Abakomiseri bongerewe imbaraga

Mu guhitamo kandidatire, AU yashyizeho akanama k’impuguke gashinzwe gasuzuma dosiye zatanzwe z’abiyamamaje no kuzikoraho iperereza.

Urutonde ntakuka rw’abagomba gukora ikizamini cyo kuvuga rwoherejwe mu bihugu binyamuryango ku wa 7 Ukwakira 2020 mu bigera kuri 18 byatanze abakandida.

Kuri ubu, ibihugu by’ibinyamuryango muri AU bitora Perezida na visi Perezida ba komisiyo ya AU ndetse n’abakomiseri muri komisiyo zitandukanye. Ibi byakuyeho kuba perezida yakwishyiriraho komiseri ashaka hatabayeho amatora.
Kuva mu 2007, ibi byagaragajwe nk’ikibazo kuko raporo yasinywe n’Umunya-Nigeria, Adebayo Adedeji, nta mwanzuro ufatika yagezeho.

Mu Nama idasanzwe yateranye muri Kamena 2018, iki kibazo cyaganiriwe mu bikeneye kwihutishwa mu mavugurura ndetse ibihugu byinshi bya Afurika byagaragaje ko bitemeranya n’igitekerezo cyo guha Perezida wa Komisiyo ububasha nk’ubw’umunyagitugu bwo gushyiraho no gukuraho abakomiseri.

Muri iyi nama kandi hanafatiwemo icyemezo ko Inama y’Inteko rusange ya AU yabaga muri Kamena izajya iterana inshuro imwe aho kuba ebyiri nk’uko byari bisanzwe.

Mu mavugurura yayobowe na Perezida Kagame kandi AU yahawe icyerekezo cyubakiye ku nkingi enye zirimo politiki ihamye, amahoro n’umutekano, kwihuza mu bijyanye n’ubukungu no guhagararirwa ku rwego mpuzamahanga.

Anateganya uburyo bwo gutakariza icyizere umuyobozi utujuje inshingano yatorewe, bigatangira kwigwa mu gihe byasabwe byibuze n’ibihugu bine mu bigize AU, bikemezwa n’abakuru b’ibihugu.

-  Urugendo rwo kwigira kwa AU

AU yiyemeje kwigira mu gutera inkunga ibikorwa byayo, aho ibihugu bitanga 0.2% by’umusoro w’ibyinjizwa mu gihugu, hagamijwe gushyigikira ingengo y’imari yayo.

Ni gahunda izafasha Afurika kwishakamo imisanzu izatera inkunga 100 % ibikorwa by’ubuyobozi bw’umuryango, 75% bya porogaramu z’umuryango na 25% by’ibikorwa by’amahoro.

Ingengo y’imari ya AU yari yihariwe na 72% by’abaterankunga, ku buryo havukaga ikibazo igihe umwe mu bafatanyabikorwa yahura n’ingorane mu bukungu ndetse ugasanga izo gahunda Abanyafurika ntibazigira izabo.

Mu 2019, ingengo y’imari ya AU yari miliyoni 408$. Ibihugu bya Afurika biyifitemo uruhare rwa 66%, bingana na miliyoni 269$ naho abaterankunga bakagiramo uruhare rwa 34% bingana na miliyoni 139$. Ni igabanuka rya 12% ugereranyije n’umwaka wabanje.

-  Icyerekezo cya AU mu kubahiriza amavugurura mashya

Mu Nama ya 34 ya AU, Perezida Kagame yatanze raporo igaragaza aho gahunda y’amavugurura y’inzego za AU igeze. Yavuze ko muri rusange hari byinshi byo kwishimira byagezweho.

Yagize ati “Hari intambwe twateye nko mu bikorwa byo kugarura amahoro, n’ubwo ingengo y’imari igishingiye ku nkunga ituruka hanze.”

Umukuru w’Igihugu Paul Kagame yongeyeho ko gushyira hamwe kwa Afurika kwatumye intego yo gushyiraho Isoko Rusange rya Afurika (AfCFTA) igerwaho ndetse iri soko ryatangiye kubahirizwa muri Mutarama 2021.

Ati "Ibi ni byo byatumye tugera ku bikorwa bikomeye, birimo Isoko Rusange rya Afurika. Ndashimira Moussa Faki na komisiyo yari ayoboye ku bw’akazi k’intangarugero bakoze mu gihe cy’imyaka ine".

Ku bijyanye n’aya mavugurura, Perezida Kagame yavuze ko hari ibitaragezweho bijyanye n’inzego z’ubutabera, Inteko Ishinga Amategeko ya AU ndetse n’imiterere ya Komisiyo. Yasabye Komisiyo nshya yahawe inshingano zo kuyobora Umuryango wa Afurika Yunze Ubumwe, kuzahera kuri ibi bibazo bigihari bigakemurwa vuba.

Perezida Paul Kagame mu ifoto y'urwibutso n'itsinda ry’intiti zamufashije gukora amavugurura muri AU

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .