Ibya YouTube mubibaze Sankara n’abandi nka we bagwingiye-Gen Mubarak Muganga

Yanditswe na Habimana James
Kuya 6 Mata 2019 saa 09:33
Yasuwe :
0 0

Umunsi ku munsi ku mbuga nkoranyambaga nka Youtube, hacicikana imvugo zitandukanye z’abavuga ko barwanya ubutegetsi bw’u Rwanda, bakivovota ko bamaze kwigarurira bimwe mu bice by’igihugu.

Uza ku isonga ni Nsabimana Callixte, uzwi nka Sankara, uvuga ko ari umuvugizi w’umutwe wa politiki, MRCD, udahwema kwigamba ibikorwa by’ubugizi bwa nabi nk’igitero cyagabwe i Nyabimata mu Karere ka Nyaruguru, umwaka ushize.

Sankara wiyemerera ko akorana n’indi mitwe y’iterabwoba nka FDLR igamije guhungabanya umutekano w’u Rwanda, akwiza ibihuha kuri Youtube, agamije gutera ubwoba abanyarwanda ngo bateshuke ku ntego yo kwiyubakira igihugu.

Gusa ingabo z’u Rwanda n’ubuyobozi muri rusange ntibahwema kubwira abaturage ko ibi bivugwa ari ibihuha bigamije kubarangaza no kubasubiza inyuma, ngo bateshuke ku mugambi w’iterambere.

Umuyobozi w’Ingabo mu Ntara y’Iburasirazuba no mu Mujyi wa Kigali Gen. Mubarak Muganga, ni umwe mu bayobozi uherutse gusaba Abanyarwanda kudaha agaciro urubuga rwa YouTube n’izindi ziriho amakuru y’abavuga ko barimo kurwana n’Ingabo z’u Rwanda.

Gen Muganga ubwo yari mu nama mpuzabikorwa y’Akarere ka Bugesera ku wa Kane, yagize ati “YouTube nyifata nk’ikiryabarezi, nta gihugu nk’u Rwanda cyafatwa na yo, u Rwanda ruri mu bihugu bibiri by’ibihangange ku isi. Mu 1998-2001 twarwanye n’ibihugu 11”.

Gen. Muganga yashimangiye ko ibihuha bya Sankara kuri Youtube, ari iterabwoba ridashobora kugira icyo rihungabanya ku banyarwanda kuko umutekano warwo udanangiye.

Ati “U Rwanda ntabwo tugwingira mu mutekano, twarakuze rwose, ibya YouTube mubibaze Sankara n’abandi nka we bagwingiye, twe ibihugu twarwana na byo ni nka 20-30 na byo byishyize hamwe kandi intambara tukayirangiriza iyo!”

Gen. Kabarebe afata Sankara nk’umutekamutwe

Umujyanama w’Umukuru w’Igihugu mu by’umutekano, Gen. James Kabarebe, ubwo yabazwaga Sankara uwo ari we nyuma y’uko izina rye ryumvikanye gusa mu 2018 ubwo yigambaga uruhare mu bikorwa bihungabanya umutekano hafi y’Ishyamba rya Nyungwe.

Ati “Sankara we simuzi rwose. Agomba kuba ari nk’umuntu w’umutekamutwe w’urubyiruko ahantu. Numvise amakuru ye ko yigaga i Butare ahagana mu 2009 yarananiranye, ajyana na Kayumba barashwana kubera amafaranga make batanga.’’

Yavuze ko Sankara yaje gucudika na Marara nawe uri mu bafite imigambi mibi ku Rwanda, ariko ngo nawe mu bikorwa byabo baje gushwana.

Gen Kabarebe ati “Na we ndumva ko bafitanye ibibazo kuko Sankara yacitse ku icumu mu gihe Marara yavuye muri Uganda. Sankara ngo ntashaka Abanya-Uganda, na bo bari gushwana. Ubu Sankara ari kumwe na Rusesabagina. Na bo muzumva bashwanye.’’

Rusesabagina yifatanyije n’imitwe irwanya leta y’u Rwanda irimo na RNC ya Kayumba Nyamwasa n’abandi nka Sankara n’umutwe wa CNRD wiyomoye kuri FDLR, maze bashinga umutwe bise MRCD.

Aba bose u Rwanda rwabashyiriyeho impapuro zo kubata muri yombi.

Kabarebe ati “Aba sinzi icyo bahagarariye, sinzi intego bafite. Nta bwoba baduteye. Umuntu yavuga ko ari kirogoya idashinga. Ni nk’uruyuki ruza rukaguma ku gutwi ntirukudwinge. Ni nk’inzukira ikomeza kuduhira, ugahora wikubita wihungura.’’

Yabwiye urubyiruko ngo “Muve ku nzukira, ntizibateshe umwanya mwe mwubake igihugu cyanyu kuko zizahora ziduhira gusa.’’

Impamvu abanyarwanda badakwiye guha agaciro ibihuha bya Sankara kuri YouTube

Tariki 23 Werurwe uyu mwaka, IGIHE yatembereye mu bice, Sankara avuga ko arwaniramo, ihasanga abakerarugendo n’abaturage bagaragaza ko nta kibazo cy’umutekano gihari, ndetse bashimangira ko abavuga ibyo ari abanyabihuha.

Muri Nyakanga umwaka ushize mu Karere ka Nyaruguru abagizi ba nabi bateye mu Murenge wa Nyabimata baranasahura ariko ingabo z’u Rwanda zirabahashya.

Muri Ukuboza uwo mwaka abandi bagizi ba nabi bagabye igitero mu mu Murenge wa Kitabi mu Karere ka Nyamagabe, imodoka z’abagenzi ziratwikwa, babiri barapfa abandi umunani barakomereka.

Ingabo z’u Rwanda zaje gutangaza ko zishe batatu mu bagabye icyo gitero, abasigaye bahungira mu Burundi.

Tariki 18 Werurwe abandi bantu bitwaje intwaro bahitanye umuturage mu Murenge wa Karambi mu Karere ka Nyamasheke, Ingabo z’u Rwanda zirahagoboka ku makuru zahawe n’abaturage, zihangana n’abagizi ba nabi zirabashya.

Abanyamakuru ba IGIHE bageze kuri Hotel One &Only Nyungwe House mu Murenge wa Bushekeri muri Nyamasheke. Iyo Hoteli icumbikira benshi muri ba mukerarugendo basura pariki ya Nyungwe.

Twahasanze abakerarugendo batandukanye, bamwe babyutse bari kwitegura kujya kureba ibyiza bitatse Nyungwe.

Umunyafilipine Victor Dizon n’umugore we twasanze bavuye muri Pariki kureba ubwoko bw’inkende zizwi nka Colubus.

Dizon yabwiye IGIHE ko amaze iminsi mu Rwanda ariko ngo mu bihugu 15 amaze kugeramo nta handi muri Afurika yabonye umutekano nk’uwo mu Rwanda.

Yagize ati “Navuga ko u Rwanda ari icyo gihugu cya mbere gitekanye mu byo nagezemo muri Afurika kuko turi nk’i Kigali twasigaga ibikapu byacu mu modoka, yego ugakinga umuryango ariko ibyo ntiwabikora muri Afurika y’Epfo cyangwa Kenya. Na hano numva mfite umutekano. Guverinoma yanyu yakoze akazi gakomeye mu kuzana umutekano.”

Nzeyimana Edouard ni umugabo ukora umwuga w’ubuvumvu hafi y’ishyamba rya Nyungwe mu Mudugudu wa Subukiniro, akagali ka Rugogwe umurenge wa Uwinkingi.

Yavuze ko aheruka kumva isasu mu 1993, anyomoza abavuga ko ibice byegereye Nyungwe birimo intambara.

Ati “Nk’umuntu uhahora unahatuye, abaturage bacu nta kibazo dufite turatekanye. Turarya , tugahinga tugakora imirimo yacu isanzwe. N’umuntu ubivuga tukamwumva tumubwira ko abeshya. Nta muturage wacu uragira ikibazo , ntawe urajya gutashya inkwi ngo ahereyo, ntawe urajya kwahira ubwatsi ngo ahereyo. Aho dutuye twegereye pariki tuba tuyireba nta kibazo.”

Pariki ya Nyungwe ikora ku turere turimo Rusizi, Nyamasheke na Karongi mu ntara y’iburengerazuba na Nyaruguru na Nyamagabe mu ntara y’Amajyepfo.

Umwaka ushize yasuwe n’abakerarugendo basaga gato ibihumbi 14.

Umuyobozi w’Ingabo mu Ntara y'Iurasirazuba no mu Mujyi wa Kigali Gen. Mubarak Muganga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza