Ibya Kayumba Nyamwasa simbizi- Minisitiri Dr Sezibera

Yanditswe na Philbert Girinema
Kuya 20 Ugushyingo 2018 saa 04:28
Yasuwe :
0 0

Minisitiri w’Ububanyi n’Amahanga n’Ubutwererane, Dr Sezibera Richard, yatangaje ko ikibazo cya Kayumba Nyamwasa kidafite aho gihuriye no gutsura umubano w’u Rwanda na Afurika y’Epfo.

Ibi Dr Sezibera yabigarutseho mu kiganiro cyabaye kuri uyu wa Kabiri tariki ya 20 Ugushyingo 2018.

Ni cyo cya mbere Dr Sezibera agiranye n’itangazamakuru kuva ku wa 18 Ukwakira 2018 ubwo yagirwaga Minisitiri w’Ububanyi n’Amahanga n’Ubutwererane asimbuye Louise Mushikiwabo, watorewe kuyobora Umuryango w’Ibihugu bikoresha Ururimi rw’Igifaransa, OIF.

Dr Sezibera yabajijwe ku mubano w’u Rwanda na Uganda, u Burundi ndetse na Afurika y’Epfo kimwe n’indi mishinga u Rwanda ruhuriyeho n’Akarere muri rusange.

Ku mubano w’u Rwanda na Afurika y’Epfo, yavuze ko ubwo Perezida Kagame na mugenzi we Cyril Ramaphosa bahuraga muri Werurwe uyu mwaka, bemeranyije ko umubano ugomba kuvugururwa.

Aba bakuru b’ibihugu basabye ba Minisitiri b’Ububanyi n’Amahanga guhura bagashakira hamwe umuti.

Dr Sezibera yavuze ko atarahura na mugenzi we wa Afurika y’Epfo kugira ngo baganire ku mubano w’ibihugu byombi.

Ati “Abakuru b’ibihugu barahuye bemeza ko umubano hagati y’u Rwanda na Afurika y’Epfo ukwiye kongera ukavugurura ugasubira kuba mwiza […] ntabwo turahura. No muri iyi nama [inama ya AU] ntabwo twahuye kuko mugenzi wanjye wa Afurika y’Epfo atari ahari, ariko tuzahura.”

Ku bijyanye na Kayumba yagize ati “Ibya Kayumba Nyamwasa simbizi, ibyo tugomba gukora twebwe ni uguhura nk’u Rwanda tugasura umubano. Ibya Kayumba n’abandi bashakishwa n’ubutabera ibyo ni ibindi ntaho bihuriye no gutsura umubano.”

Dr Sezibera yavuze ko nta muntu ushobora kwitwaza polikiti ngo akore ibyaha atere grenade mu Rwanda zice inzirakarengane.

Ati “Ntabwo ukora politiki ukora ibyaha […] Abo ni abanyabyaha ibyabo bizakemuka uko iby’abanyabyaha bikemuka.”

Minisitiri Sezibera yatangaje ko ateganya guhura na Minisitiri w'ububanyi n'amahanga wa Afurika y'Epfo bakanoza ibijyanye n'umubano w'ibihugu byombi
Ni cyo kiganiro cya mbere Dr Sezibera agiranye n’itangazamakuru kuva ku wa 18 Ukwakira 2018 ubwo yagirwaga Minisitiri w’Ububanyi n’Amahanga n’Ubutwererane asimbuye Louise Mushikiwabo

Amafoto: Niyonzima Moise
Video: Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza