Iby’ingenzi mu ishoramari rya miliyari 1.2$ Banki y’Isi igiye gushyira mu Rwanda

Yanditswe na IGIHE
Kuya 9 Ugushyingo 2020 saa 09:39
Yasuwe :
0 0

Mu cyumweru gishize nibwo Banki y’Isi yatangaje gahunda y’imyaka itandatu y’imikoranire n’u Rwanda hagati y’umwaka wa 2021 na 2026, iteganya ko kugeza mu 2023 izashora mu nzego zitandukanye miliyari 1.2$, ni ukuvuga miliyari nibura 1100 Frw.

Ni amafaranga azakoreshwa mu nzego eshanu zitandukanye, zirimo kuzamura ubushobozi bw’abaturage, guteza imbere urwego rw’abikorera mu Rwanda, guteza imbere ibikorwa remezo no kubaka ubukungu bwubakiye ku ikoranabuhanga.

Umuyobozi wa Banki y’Isi mu Rwanda, Rolande Pryce, yavuze ko raporo yo mu 2018 ku bijyanye n’umusaruro ushingiye ku bushobozi bw’umuturage, Human Capital Index, ku manota ijana, u Rwanda rwagize 38.

Icyo cyegeranyo cya Banki y’Isi kigaragaza ubushobozi n’umusaruro umwana wavutse uyu munsi azaba afite nagira imyaka 18, hashingiwe ku buvuzi n’uburezi biri mu gihugu cye, cyashyize u Rwanda ku mwanya wa 142 mu bihugu 157.

Ati “Ibyo bisobanuye ko umwana uvukiye mu Rwanda uyu munsi azatanga umusaruro kuri 38% ugereranyije n’uko yari kuba ameze iyo aza kwiga amashuri yose ndetse akabona serivisi zose z’ubuzima. 38% ntabwo ari umubare mwiza.”

“Tureba ku burezi, serivisi z’ubuzima, kwita ku batishoboye n’ubundi buryo bwo gufasha kuzamura ubushobozi bw’abaturage, kugira ngo bubashe kugera ku rundi rwego.” Yaganiraga na The New Times.

Pryce yavuze ko nko mu burezi, hari imbogamizi zikomeye babonye zirimo uburyo ururimi rukoreshwa mu kwigisha rwagiye ruhinduka mu myaka ishize.

Yakomeje ati “Ibi byateye imbogamizi kubera ko bamwe mu barimu ntibari biteguye kugendana n’izo mpinduka. Mu gihe bamwe batarwumva neza kandi ari ururimi bagomba gukoresha mu kwigisha amasomo yose, birumvikana ko ari imbogamizi.”

Yakomeje avuga ko mu burezi hari aho usangaga u Rwanda rusigara inyuma mu musaruro, nubwo rwiyemeje kureba kure.

Pryce yakomeje ati “Ikindi twasanze hari abanyeshuri bakora ingendo ndende kugira ngo bagere ku ishuri. N’iyo bagezeyo, umubare w’abanyeshuri banyura imbere ya mwalimu wakomeje kuba hejuru cyane. Muri urwo rwego, twatekereje gahunda yaba irangajwe imbere na guverinoma, igamije gukemura izo mbogamizi.”

Hateguwe umushinga wa miliyoni $200 ugamijwe kubaka uburyo bwiza bw’imyigire, amashuri aboneye, abarimu bafite ireme n’ibindi bituma imyigire inoga.

Yakomeje ati “Twishimiye uburyo umushinga urimo kugenda bwangu. Ubwo hari icyorezo cya COVID-19, guverinoma yaravuze iti kubera ko abanyeshuri batari ku bigo byabo, dushobora kubaka amashuri. Icyo ni igice kimwe. Hari ibintu bifatika turimo kubona mu bikorwa byo kubaka.”

“Turimo no gukora ku gice kijyanye n’ubumenyi. Harimo guha akazi abarimu bashya, kubageraho aho bari, kuzamura ubushobozi bwabo no gushyiraho uburyo butuma bishoboka. Turashaka kubikora kubera ko urebye gahunda za guverinoma, niba igihugu gishobora guhanga imirimo yateganyijwe, ntabwo hazaba hari ubumenyi buhagije abantu bazayijyanamo.”

Muri Kamena 2020, hirya no hino mu gihugu hatangijwe ku mugaragaro iyubakwa ry’ibyumba 22 505 by’amashuri n’ubwiherero 31 932. Kugeza ubu imirimo ntirasozwa kubera impamvu zirimo ibura ry’ibikoresho.

Pryce yavuze ko niba umwana uri munsi y’imyaka itanu agize ikibazo cy’imirire mibi, ubwonko bwe butazakura neza, bityo bikazagira ingaruka no ku bushobozi bwe bwo kwiga no kumenya ibyo yiga. Bityo ngo kwita ku buzima bw’umwana mu minsi 1000 y’ibanze ni ingenzi cyane.

Yakomeje ati “Turimo kureba no ku guteza imbere ubushobozi, nubwo hari abantu benshi bajya muri kaminuza, bake ni bo bajya mu masomo ya STEM (siyansi, imibare, ikoranabuhanga na engineering) ndetse benshi muri za kaminuza ntabwo babona ubumenyi buhagije bukenewe ku isoko ry’umurimo.”

Abikorera nabo bazafashwa

Rolande Pryce yanavuze ko hari icyiciro cyagenewe abikorera, harebwa icyakorwa kugira ngo uruhare rwabo mu gihugu rurusheho kuzamuka.

Yavuze ko mu gihe kirekire, guverinoma ariyo yakunze kurangaza imbere imishinga minini y’ishoramari, ku buryo hari byinshi bishobora gukorwa kugira ngo uruhare rw’abashoramari bikorera ruzamuke.

Yakomeje ati “Urebye nko kubona igishoro, ikintu urwego rw’abikorera rwakomeje kugaragaza nk’imbogamizi ni ukubasha kubona amafaranga yishyurwa by’igihe kirekire kandi akaboneka mu ifaranga ry’igihugu. Ibijyanye no kugera kugishoro kandi kuri buri muntu wese, ni ibintu dushobora gukoraho.”

Yavuze ko mu gukemura izo mbogamizi, barimo gufatanya na Banki y’u Rwanda Itsura Amajyambere, bareba uko bafasha inzego zirimo imyubakire, ibikorwa remezo, ubuhinzi n’ibigo bito n’ibiciriritse.

Yakomeje ati “Turimo kureba uko hashyirwaho uburyo bwabafasha kuguza amafaranga y’igihe kirekire kandi ku nyungu iringaniye kugira ngo babashe kuzamura ibikorwa byabo.”

Bijyanye n’icyorezo cya Coronavirus, guverinoma yashyizeho Ikigega Nzahurabukungu kirimo gufasha inzego zitandukanye kongera kubura umutwe, nyuma yo gushegeshwa n’icyorezo cya Covid-19 bitewe n’ingamba zagiye zifatwa mu kugihashya.

Pryce yakomeje ati “Turacyari mu biganiro na Guverinoma mu gutegura inkunga yajya muri icyo kigega nzahurabukungu, ikazagengwa na Banki Nkuru, ariko hitawe ku byiciro runaka bashobora gufasha.”

Yatanze urugero bw’uko ubwo iki kigega cyatangiraga, guverinoma yaje gusanga kidafasha abantu bose babikeneye, ku buryo yagiye ivugurura amabwiriza yari yashyizweho mbere agaragaza abemerewe ku mafaranga yashyizwe mu kigega.

Banki y'Isi irimo gufatanya na guverinoma mu kubaka ibyumba bishya by'amashuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .