Iby’ingenzi bizaganirwaho mu mwiherero wa 17 w’abayobozi

Yanditswe na IGIHE
Kuya 15 Gashyantare 2020 saa 06:48
Yasuwe :
0 0

Minisitiri muri Perezidansi, Judith Uwizeye, yavuze ko Umwiherero w’abayobozi ugiye kuba uzibanda ku ngingo zitandukanye zireba ubuzima bw’igihugu, hakazanabaho umwanya wo kureba aho politiki y’u Rwanda ihagaze ku ruhando mpuzamahanga.

Kuri uyu wa Gatandatu nibwo abayobozi basaga 400 bo mu nzego bwite za leta, mu nzego z’ibanze, ibigo bya leta n’inzego z’abikorera, berekeje mu mwiherero w’iminsi ine kuva tariki 16 - 19 Gashyantare 2020, mu Kigo cy’Imyitozo cya Gisirikare i Gabiro, mu Karere ka Gatsibo.

Minisitiri Uwizeye yavuze ko umwiherero ari umwihariko w’u Rwanda, aho abayobozi bicara hamwe bakaganira ku buzima bw’igihugu, bakareba ibibazo bihari bishobora gukemurwa, byose bigamije ineza y’abaturarwanda.

Yakomeje ati “Uyu mwiherero ubaye mu gihe turangiza icyerekezo 2020 dufata icyerekezo 2050, ni ukuvuga ngo ikintu cy’umwihariko kirimo ni ukureba uburyo bwo guhindura imikorere cyangwa se uburyo tugiye gukora mu buryo budasanzwe nubwo twari dusanzwe dukora mu gihe tujya mu cyerekezo 2050.”

Yavuze ko iki ari icyerekezo gifite ibintu byinshi kandi bikomeye kubigeraho, ku buryo bisaba ko abantu bakora mu buryo budasanzwe.

Yakomeje ati “Ngira ngo nicyo kizagarukwaho cyane muri uyu mwiherero w’abayobozi, birumvikana ko tuzaganira no ku buzima, buryo ki ubuzima bwacu bushobora gukorwa mu buryo bw’umwihariko, tuzaganira no ku burezi birumvikana, buryo ki dushobora kugira uburezi buhagaze neza ku rwego mpuzamahanga, tuzaganira ndetse no ku ishoramari, uko abikorera bashobora kugira uruhare mu iterambere ry’igihugu cyacu.”

Ikindi ni ukuganira kuri politiki igezweho hirya no hino ku Isi, n’uburyo u Rwanda ruhagaze bijyanye n’iyo politiki.

Uyu mwiherero ugiye kuba mu gihe zimwe mu nzego zizaganirwaho zirimo gukorwamo amavugurura, aho kuri uyu wa Gatanu uwari Minisitiri w’Ubuzima, Dr Diane Gashumba, yeguye mu nshingano ze, umwanya yagiyeho mu 2016 asimbuye Dr Agnes Binagwaho.

Ni ukwegura Ibiro bya Minisitiri w’Intebe byatangaje ko “kuje gukurikira amakosa akomeye n’imiyoborere idakwiye yakomeje kugaragaza.”

Mu rwego rw’uburezi ruri mu zizaganirwaho kandi, haheruka kwegura Dr Isaac Munyakazi wari Umunyamabanga wa Leta ushinzwe amashuri y’inshuke, abanza n’ayisumbuye, ndetse ubu arimo gukorwaho iperereza ku byaha bya ruswa.

Mu cyerekezo 2050 gihanzwe amaso, biteganywa ko Umunyarwanda azaba yinjiza asaga miliyoni 10 Frw ku mwaka; kugira ngo bigerweho bikazakenera ko ubukungu buzamuka nibura hejuru ya 10%, bikubakira no ku nzego zirimo ikoranabuhanga no korohereza abashoramari.

Ni ibikorwa bizasaba kwitanga, kandi amateka y’ibindi bihugu agaragaza ko ari ibintu bishoboka igihe buri wese yubahirije inshingano ze, ibibazo bihari bigakemurirwa igihe, inzego z’ubuyobozi zigasigara zihanganye n’ibibazo bikeneye ubushobozi buhambaye.

Minisitiri Uwizeye avuga ko imyanzuro yagiye ifatirwa mu myiherero iheruka yagiye izana impinduka mu gihugu, ku buryo n’uyu utanga icyizere.

Abayobozi batandukanye kuri uyu wa Gatandatu berekeje mu mwiherero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .