00:00:00 IGIHE NETWORK KN KINYARWANDA EN ENGLISH FR FRANCAIS

Iburengerazuba: Urubyiruko rwiyemeje kurwanya imvugo zibiba urwango

Yanditswe na Muhire Desire
Kuya 28 Ugushyingo 2022 saa 02:54
Yasuwe :

Urubyiruko rwo mu Ntara y’Iburengerazuba ruturiye umupaka wa Repubulika Iharanira Demokarasi ya Congo rwasabwe kwirinda imvugo z’urwago, zimaze iminsi zikoreshwa cyane n’abanyapolitki ndetse n’abaturage bo muri icyo gihugu.

Muri iyi minsi hakunze kumvikana abaturage biganjemo urubyiruko muri RDC bakwirakwiza imvugo zikangurira abaturage kwica no guhohotera abanye-Congo bavuga ikinyarwanda.

Iki kibazo cyahagurukije urubyiruko rwo mu Ntara y’Iburengerazuba, ruganira ku buryo rwakoresha mu kurwanye izo mvugo zibiba inzangano ndetse n’inkuru z’ibihuha.

Ni igikorwa cyateguwe n’umuryango uharanira kwimakaza amahoro mu Karere k’ibiyaga bigari, La Benevolencia.

RDC yagarutsweho cyane ku gukoresha imvugo z’urwango, aho usanga ku mbuga nkoranyambaga cyangwa mu myigaragambyo, urubyiruko rwaho rukoresha imvugo zahuranyije zikangurira Abanye-Congo kwica, guhohotera no kwirukana muri Congo abavuga Ikinyarwanda.

Hategekimana Jean Baptiste uyobora urubyiruko mu Murenge wa Bugeshi uhana umupaka na DRC, ukanaba hafi y’ahamaze iminsi habera imirwano ishyamiranyije umutwe wa M23 n’Ingabo za FARDC, avuga ko hari ubwo urubyiruko rubona amakuru ntirutandukanye ay’ukuri, ibihuha ndetse n’icengezamatwara.

Ati "Hari ubwo tubona amakuru yose ku mbuga nkoranyambaga tukayita ukuri, nko mu baturanyi ugasanga barandika ko abavuga Ikinyarwanda baba muri Congo ari Abanyarwanda bagomba gusubizwa iwabo, kandi si byo. Tugomba kujya dushishoza tugatandukanya ukuri n’ibinyoma, ndetse ibyo babeshya tukabinyomoza."

Ni ubutumwa kandi bugarikwaho na Carine Umutesi ukuriye urubyiruko mu Murenge wa Busasana na wo uhana umupaka na Kibumba, ahamaze iminsi habera imirwano muri RDC.

Yagize ati "Usanga nka twe duturiye umupaka twumva ibihuha byinshi, bidusaba ubundi bushishozi bwo kubitandukanya n’ukuri, cyane usanga babeshya ngo u Rwanda rufasha M23 kandi mu by’ukuri ari abanyekongo baharanira uburenganzira bwabo."

Yungamo ati "Ni inshingano zacu nk’urubyiruko ni ukujya tubeshyuza amakuru y’ibihuha n’abiba inzangano, kuko ni twe baturage b’ejo hazaza h’aka Karere k’ibiyaga bigari."

King Ngoma uyobora La Benevolencia, avuga ko impamvu yo guhuriza hamwe urubyiruko bigamije kugabanya ibibazo by’umutekano muke bigaragara mu Karere k’ibiyaga bigari.

Yagize ati "Intego y’ibi biganiro ni ukugira ngo tubashe kongerera abaturiye imipaka y’ibi bihugu ubushobozi bwo gukumira icyo ari cyo cyose cyatuma bishora mu bikorwa by’ubugizi bwa nabi. Tumaze igihe twumva ibintu bishobora gutuma umuntu yahinduka mu bitekerezo n’imyumvire, harimo imbwirwaruhame zikangurira abantu kwanga abandi no kubagirira nabi."

Akomeza agira ati "Ibyo bintu bikunze gucishwa ku mbuga nkoranyambaga, mu bitangazamakuru. Hari ababikora bagamije ubugizi bwa nabi ariko hari n’ababikora bagamije kwishimisha no gushaka kumenyekana, ariko batazi ingaruka bishobora guteza ku batuye aka Karere."

Ubusanzwe urubyiruko rwo muri Repubulika Iharanira Demokarasi ya Congo rwahuraga n’urwo mu Rwanda bakarebera hamwe uko bakemura ibibazo bihari, ariko ubu ntibyashobotse kubera umwuka mubi w’intambara umaze iminsi.

Abaturiye imipaka ni bo bakunze kugerwaho n’ibihuha kuko ari na bo baba bashaka kumenya amakuru kurusha abari kure.

Kimwe mu bibazo byagarutsweho bigaragaza imvugo zibiba urwango ni nk’aho bamwe mu banye-Congo babujijwe kunywa amata no kurya inyama bivuye mu Rwanda, babeshya ko byashyizwemo uburozi bwo kubica.

Urubyiruko rwasabwe kwirinda imvugo zibiba urwango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .