00:00:00 IGIHE NETWORK KN KINYARWANDA EN ENGLISH FR FRANCAIS

Iburasirazuba: Urubyiruko rw’abakorerabushake rwasabwe kutiyibagirwa mu rugendo rw’iterambere

Yanditswe na Hakizimana Jean Paul
Kuya 21 April 2022 saa 10:38
Yasuwe :

Urubyiruko rw’abakorerabushake rusaga 260 rwaturutse mu turere turindwi tugize Intara y’Iburasirazuba, rwatangiye guhugurwa no kongererwa ubumenyi n’ubushobozi hagamijwe kwihutisha iterambere n’imibereho myiza y’abaturage.

Ni amahugurwa yatangijwe ku wa Gatatu, tariki ya 20 Mata akaba azarangira tariki ya 25 Mata aho ari kubera mu Ishuri rya Polisi rya Gishari.

Minisitiri w’Ubutegetsi bw’Igihugu, Gatabazi Jean Marie Vianney, ubwo yatangizaga aya mahugurwa, yabwiye uru rubyiruko ko Leta yifuza ko buri muntu wese w’urubyiruko yinjira muri ubu bukorerabushake ngo kuko bumuteguramo kuba umuyobozi mwiza.

Yagize ati “Ubukorerabushake twifuza ni aho buri Munyarwanda ku rwego urwo arirwo rwose yajya agira igihe cyo gukora ibikorwa by’ubwitange ku nyungu rusange biri mu mwuga we, akaba yabikorera abaturage ku nyungu rusange.”

Yakomeje avuga ko umuganga wize ubuganga akwiriye gufata iminsi 10 mu mwaka akajya aho avuka akavura abaturage ku bwitange ku buntu, yaba ari umuntu uzi kubaka akigisha abaturage ku bwtange ngo nibura buri Munyarwanda akagira ukwitanga ku bumenyi runaka afite mu kintu runaka akabyigisha abandi baturage atari bubihemberwe.

Minisitiri Gatabazi yavuze ko akazi k’ubukorerabushake kadakuraho indi mirimo umuntu akora imuha imibereho umunsi ku munsi.

Yasabye uru "rubyiruko gukora ubukorerabushake ariko bakanashakisha akandi kazi kabatunga umunsi ku munsi."

Yabashimiye uruhare rwabo mu guhangana na Covid-19, mu gukingira, kubakira abatishoboye n’ibindi bikorwa binyuranye rwakoze hagamijwe iterambere ry’abaturage kandi nta kiguzi.

Ati “Turabasaba kuba nkore neza bandebereho kandi bakanadufasha no guhangana n’abashaka kuzana amacakubiri mu gihugu cyacu. Bagomba kubaka igihugu bazabamo ubuzima bwabo bwose, bakore kandi barangwe n’ikinyabupfura.”

Minisitiri Gatabazi yasabye kandi ko amahugurwa nk’aya ategurwa no mu zindi Ntara mu gukarishya ubumenyi bw’urubyiruko rw’abakorerabushake hirya no hino mu gihugu.

Bamwe mu rubyiruko rwitabiriye aya mahugurwa rwavuze ko ruyatezeho ubumenyi butandukanye buzatuma banoza ibyo bakoraga.

Uwabera Phoibe wo mu Karere ka Bugesera yavuze ko icyo yiteze kuri aya mahugurwa ari ukumufasha mu kumwongerera ubumenyi ku mirimo bakorera abaturage n’ubufasha babaha.

Ati “Bizadufasha cyane mu kumenya uko twakorera abaturage uturima tw’igikoni mu kurwanya imirire mibi, gufasha abanyeshuri batiga bataye ishuri kongera kurisubiramo no gufasha abaturage kwiteza imbere mu buzima bwa buri munsi.”

Uwabera yavuze ko ubukorerabushake budakorwa n’urubyiruko rudafite akazi ngo kuko nabo abenshi bafite akandi kazi bakora ariko bitabababuza no gufatanya n’abandi muri iyi mirimo.

Nsanganwa Dodos waturutse mu Karere ka Gatsibo we yavuze ko aya mahugurwa ayitezeho kumufasha mu kumwubakira ubushobozi mu kugira imyumvire iteye imbere yerekeranye n’imirongo migari y’igihugu.

Yavuze ko hari byinshi basanzwe bakora birimo kubakira abatishoboye ariko avuga ko muri aya mahugurwa bazerekwa uburyo babinoza bakarushaho kubikora neza kuburyo bifasha abaturage benshi.

Muri aya mahugurwa yahawe insanganyamatsiko igira iti “Urungano rufite intego”, uru rubyiruko ruzahabwa ibiganiro bitandukanye birimo ibizarufasha mu kubongerera ubumenyi kuri gahunda za Leta.

Mu biganiro bazahabwa harimo ikiganiro cyerekana ishusho y’Intara y’Iburasirazuba mu bufatanye bw’inzego z’ibanze n’urubyiruko rw’abakorerabushake, icy’uruhare rw’urubyiruko mu kwimakaza indangagaciro z’umuco Nyarwanda, icyo ku ishusho y’umutekano ubutabera n’uruhare rw’urubyiruko rw’abakorerabushake mu gukumira ibyaha.

Hari kandi ikiganiro ku ruhare rw’urubyiruko mu bibazo bibangamiye imibereho myiza y’abaturage no guhanga udushya, ikiganiro ku isanamitima n’uruherekane rw’urungano, uruhare rw’urubyiruko rw’abakorerabushake mu kuzana impinduka zidasanzwe n’ibindi byinshi bizafasha uru rubyiruko.

Urubyiruko rw'abakorerabushake rwahuriye i Gishari rurasaga 260, rwaturutse mu turere twose tugize Intara y'Iburasirazuba
Minisitiri w’Ubutegetsi bw’Igihugu, Gatabazi Jean Marie Vianney, yasabye ko ubukorerabushake buba umuco no mu bandi bakozi
Urubyiruko rw’abakorerabushake mu Burasirazuba rwasabwe kutiyibagirwa mu rugendo rw’iterambere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .