Iburasirazuba: Inzego z’ibanze zigiye gusinya imihigo yo kurwanya inda ziterwa abangavu

Yanditswe na Hakizimana Jean Paul
Kuya 9 Ukuboza 2019 saa 09:18
Yasuwe :
0 0

Guverineri w’Intara y’Iburasirazuba Mufulukye Fred, yavuze ko uku kwezi kuzarangira banogeje uburyo buzifashishwa mu gusinya imihigo n’abayobozi b’imidugudu, ab’utugari, ibigo by’amashuri n’abandi bafite aho bahuriye n’urubyiruko, imihigo ku kurwanya inda ziterwa abangavu muri iyi ntara.

Ibi yabigarutseho kuri iki cyumweru tariki ya 8 Ukuboza 2019 mu nama yahuje inzego z’umuryango wa FPR-Inkotanyi mu Ntara y’Iburasirazuba, kuva ku Murenge kugera ku ntara.

Bimwe mu byigiwe muri iyi nama harimo kurebera hamwe uko ikibazo cy’isuku gihagaze muri iyi ntara, umutekano n’uko bimwe mu bibazo bibangamiye imibereho y’abaturage byakemuka, nk’ikibazo cy’abana baterwa inda.

Imibare ya Minisiteri y’ubuzima yo mu mwaka wa 2018 igaragaza ko mu turere dutanu twazaga ku isonga mu kugaragaramo ikibazo cy’abangavu batewe inda tune ari utwo mu burasirazuba. Nyagatare niyo iza ku isonga n’abana 1465, Gatsibo 1452, Gasabo 1064, Kirehe 1055 ndetse na Bugesera ifite 925.

Guverineri Mufulukye yavuze ko gusinyisha urubyiruko n’abayobozi bo mu nzego z’ibanze imihigo yo kurwanya inda ziterwa abangavu ndetse no mu bigo usanga bikoresha urubyiruko rwinshi ruri hejuru ya 200, bizatuma imibare igabanuka.

Ati “Ikindi ni ibigo by’amashuri bitandukanye nk’abayobozi b’ibigo by’amashuri nabo bakabigeza ku barimu kuko abarimu nibo bakwiriye kurinda abana, abayobozi b’inzego z’ibanze mu midugudu no mu tugari abo ngabo bose icyo kibazo kirabareba, tukaba twumva rero izo nzego zose dukwiriye guhagurukira hamwe tukabikora n’umutima wo kurinda abana no mu buryo bw’ubukangurambaga twegera abana.”

Mufulukye avuga ko mu rwego rw’imyumvire, abaturage bamaze kubona ko inda ziterwa abangavu ari ikibazo gihangayikishije ndetse kuba barabimenye bizatuma no kuzirwanya bigabanuka.

Yavuze ko abanyamuryango ba FPR badakwiriye kureberera ahubwo bakwiriye gufata iya mbere mu kurwanya abatera inda aba bana.

Guverineri Mufulukye yakomeje avuga ko bamaze kwemeranya n’abayobozi bo mu nzego z’ibanze ko bagomba gusoza uku kwezi ibikenewe byose babirangije ubundi bagatangirana n’ukwezi kwa Mutarama 2020.

Kayitesi Mireille uyobora urugaga rw’abagore rushamikiye ku muryango wa FPR-Inkotanyi mu Ntara y’Iburasirazuba, yavuze ko abanyamuryango ba FPR-Inkotanyi mu mudugudu batuyemo, bakwiye kumenya amakuru hakiri kare ku mwana watewe inda atarageza imyaka y’ubukure, bakamufasha gutanga ikirego.

Umwana bagerageje kubaza ntatange amakuru bakamenya ko yagize ihungabana,, bagashaka uko afashwa n’abaganga.

Yakomeje avuga ko mu gihe ikirego kigeze mu rukiko naho bakwiriye gukomeza gukurikirana kugira ngo n’abacamanza babone ko uwo mwana afite gikurikiranwa kugira ngo batange ubutabera bukwiye kuri wa muntu wateye inda wa mwana.

Imibare itangwa na Minisiteri y’ubuzima igaragaza ko mu 2017 abangavu babyariye kwa muganga bari munsi y’imyaka 19 bari 17 337, mu 2018 baba 19 832 naho mu mwaka wa 2019 guhera muri Mutarama kugeza muri Kanama ababyaye ni 15 696.

Iyi nama yitabiriwe n'abahagarariye inzego zishamikiye kuri FPR Inkotanyi kuva ku mirenge kugeza mu ntara
Guverineri Mufulukye avuga ko gusinyisha imihigo abayobozi bo mu nzego z'ibanze bizakorwa mu rwego rw'ubukangurambaga ku kurwanya inda ziterwa abangavu
Guverineri Mufulukye yasabye abanyamuryango ba FPR-Inkotanyi gutanga amakuru ku basambanya abana kugira ngo bakurikiranwe bahanwe
Umwe mu banyamuryango ba FPR-Inkotanyi Zimulinda Tom atanga igitekerezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza